"ჩვენ არ გვინდა პრორუსულ საქართველოში დაბრუნება" - ქართველი ემიგრანტების აქცია ჰამბურგში

22-23 ივნისს გერმანიის ქალაქ ჰამბურგის ცენტრში სოლიდარობის აქცია "ნუ გვაბრმავებთ" გაიმართა.

ქართველები მხარდაჭერას უცხადებენ რუსთაველზე შეკრებილ თანამემამულეებს, აპროტესტებენ საქართველოში მიმდინარე პოლიტიკურ პროცესებს და რუსეთის ოკუპაციას!

"სახელმწიფოს მთავარი მოვალეობაა დაიცვას ქვეყნის პრესტიჟი და სუვერენიტეტი. 20 ივნისს რუსეთის დუმის კომუნისტი დეპუტატის ქვეყნის უმაღლეს საკანონმდებლო ორგანოში სხდომის წაყვანის უშედეგო მცდელობამ, აბსოლუტურად სამართლებრივი საპროტესტო ტალღა გამოიწვია, რომელიც საქვეყნო ტრაგედიად გადაიქცა. ის ქმედებები, რომლებიც იმ საბედისწერო ღამეს განვითარდა არ უნდა დარჩეს დაუსჯელი! შესაბამისად უნდა გადადგეს ბატონო გ.გახარია, რომელიც უშუალოდ არის პასუხისმგებელი სპეცრაზმისა და პოლიციის ქმედებებზე. დაინიშნოს ვადამდელი პროპორციული არჩევნები! გათავისუფლდეს ყველა დაკავებული მომიტინგე და დაისაჯოს ყველა ის სამართალდამცავი, რომლთა ქმედებებმაც მომიტინგეთა დასახიჩრება გამოიწვია. და ბოლოს! ვუერთდები ქართველი ახალგაზრდების მშვიდობიან პროტესტს და სოლიდარობას ვუცხადებთ მათ! გახსოვდეთ, რომ ქართველ ემიგრანტებს ორმაგად შეგვტკივა გული ჩვენი სამშობლოს ბედზე და ბოლომდე ვიბრძოლებთ ჩვენი ქვეყნისათვის! “,- აცხადებს აქციის ერთ-ერთი მონაწილე მარიამ ჩინჩალაძე.

"რუსეთი ოკუპანტი მტერია, ძალადობრივი ისტერია, რაც უნდა ამოიძირკვოს!

ჩვენ აქ თავისუფალი და ძლიერი საქართველოს მომავლისთვის შევიკრიბეთ და ვუერთდებით იმ მოთხოვნებს რაც ჩვენს თანამემამულეებს აქვთ! მოვითხოვთ სამართლიანობის აღსრულებას და სამარადისოდ არას ვეუბნებით რუსეთს!" აცხადებს აქციის ერთ-ერთი მონაწილე, ეკატერინე ციმერმანი.

„ჩვენ არ გვინდა პრო-რუსულ საქართველოში დაბრუნება. ჩვენ ვირჩევთ თავისუფლებას და განვითარებას. ეს ყველაფერი ვერ მოხერხდება პრო-რუსულ მთავრობასთან და „მოძმე" რუსეთთან ერთად. სრულ მხარდაჭერას ვუცხადებ საქართველოში აქციის მონაწილეებს, რომლებიც არას ეუბნებიან ოკუპაციასა და ძალადობას,“ - აცხადებს აქციის ერთ-ერთიონაწილე, ნათია გოგილაშვილი.

„ჩვენ ვაპროტესტებთ უმნიშვნელოვანეს ფაქტს, ჩვენი სუვერენული სახელმწიფოს ტერიტორიის 20% "ერთმორწმუნე მეზობელს" ოკუპირებული აქვს და ჩვენ ახალგაზრდობა და მოქალაქეები თბილისში სამართალს ეძებენ, ჩვენ საქართველოსთან ერთად ვართ და ამისთვის თვალებს ნუ დაგვთხრით!”აცხადებს აქცის ერთ-ერთი მონაწილე, მარიანა ბედოშვილი.

"ბატონო გახარია, თქვენ ჩვენ თვალებში გვესროლეთ, იმისათვის რომ, ჩვენ ოკუპანტის ბოროტი ზრახვები, მშვიდობიანი ფორმით გავაპროტესტეთ. ნუ დაგვაბრმავებთ!", -აცხადებს აქციის ერთ-ერთი მონაწილე, ელენა პეტერჰენზელი.