რუსების ნაწილი სოცქსელებში ქართველებით აღფრთოვანებულია - "დღევანდელი გმირი მთელი ქართველი ერია!"

"ტვიტერის" რუსი მომხმარებლების ნაწილი აღფრთოვანებულია ქართველების რეაქციით, რაც პარლამენტში დუმის დეპუტატის გამოჩენას მოჰყვა. ისინი წერენ, რომ მაშინ, როდესაც რუსები უიმედოდ ელოდებიან ქვეყანაში ცვლილებებს, ქართველები საკუთარ ხელისუფლებას შეცდომებს არ პატიობენ.

სოციალური ქსელების მომხმარებლები აღნიშნავენ, რომ მოუთმენლად ელოდებიან ხელისუფლების შეცვლას, რადგან "უხერხულობის განცდის გარეშე" შეძლონ მოგზაურობა და არ გრძნობდნენ თავს ცუდად მათი მთავრობის პოლიტიკის გამო. ისინი აკრიტიკებენ ვლადიმერ პუტინს, რომელმაც რამდენიმესაათიანი პრესკონფერენციისას ტელეეთერით ქვეყნის წარმატებებზე ისაუბრა.

„ვუყურებ - ერს ყმუილი და ისტერიკა აქვს ატეხილი, „ნახეთ, თურმე ქართველებს არ ვუყვარვართ!“ ეს იდიოტობაა თუ უნამუსობა? რატომ უნდა უყვარდეთ? იმიტომ, რომ რუსეთს მათი ტერიტორიების 20% აქვთ ოკუპირებული?“

„ჩემთვის დღევანდელი დღის გმირი მთელი ქართველი ერია! თქვენი ვირთხა კი არა, კამერების წინ მშვენიერ ქვეყანაზე რომ საუბრობს - ისინი, ვინც პარლამენტში შეიჭრნენ, რადგან იქ რუსი დეპუტატი იმყოფებოდა. იგრძენით განსხვავება.“

„საქართველოში შტურმით ცდილობენ პარლამენტის აღებას, რადგან საკუთარ თავზე და ქვეყანაზე შიშობენ. რუსეთში ხნიერი, რეალობას მოწვეტილი ბაბუა 4 საათის განმავლობაში იტყუებოდა ქვეყნის წარმატებების შესახებ, რაც ნათლად აჩვენებს, რომ არცერთი რეალური პრობლემა არ გადაიჭრება. ჩვენ ვსხედვართ და ცვლილებებს ველოდებით.“

„რუსეთის უშიშროების საბჭოს მონაცემებით, საქართველოდან დაბრუნების შემდეგ უამრავი რუსი უარს ამბობს რუსეთში დამზადებული პროდუქტის ჭამაზე, რომელიც პალმის ზეთს შეიცავს“.

რუსი მომხმარებლების ტვიტებს "ფეისბუქზე" ნინო ბექაური აქვეყნებს.

"სადმე თუ ადეკვატური რუსი არსებობს ყველა მე მყავს ტვიტერზე, ამიტომ ასეთ დღეებში ტვიტერის სქროლვა უფრო კაია, ვიდრე ფეისბუქის.

P.s. სამწუხაროდ, 30-ზე მეტად სქრინს არ მამატებინებს. არ მქონდა გათვლილი ამხელა მასშტაბებზე, არადა არ ჩერდებიან, დედის წიოკი აქვთ ატეხილი პუტინისთვის, პირიდან ხინკლის გამოგლეჯისთვის," - წერს ბექაური.