სააკაშვილი პარლამენტში განვითარებულ მოვლენებს ეხმაურება - "გადავიქეცით პატარა სოფლად... ერთმა გავრილოვმა გაგაკვირვათ?"

მოვლენებს, რომელიც საქართველოში მართლმადიდებლური საპარლამენტთაშორისო ასამბლეის სხდომის ჩატარებას მოჰყვა, საქართველოს ყოფილი პრეზიდენტი მიხეილ სააკაშვილი ეხმაურება. როგორც მან "ფეისბუქის" საკუთარ გვერდზე ვიდეო მიმართვაში განაცხადა, ახლა მთავარი პრობლემა არის არა სერგეი გავრილოვის საქართველოში ყოფნა, არამედ ის, რომ მისი თქმით, ივანიშვილი ქართველი სამხედროების გასამართლებას ცდილობს ჰააგის სასამართლოში.

"საქართველოში განვითარებული მოვლენები, რა თქმა უნდა, მტკივა და განვიცდი, მაგრამ მოდით ვთქვათ: ეს ის კი არ არის, რომ დღეს ჩამოვიდა გავრილოვი. 2013 წელს საქართველოში გავრილოვიც იყო, ლუშკოვიც იყო და კიდევ ბევრი სხვა დაეთრევა. საქართველოს აქტივების უდიდესი ნაწილი, მათ შორის ბინებიც, იყიდეს რუსებმა, მაგრამ ეს ხომ მთავარი არ არის. ის, რომ გაბახებული პარლამენტის ფსევდო თავმჯდომარის სავარძელში ჩაჯდა რუსი დეპუტატი, ეს არის ახლა მთავარი პრობლემა? მთავარი პრობლემა არის ის, რომ ივანიშვილი რუსეთის დავალებით, ჰააგაში ქართველი სამხედროების გასამართლებას ჩალიჩობს. მთავარი პრობლემა არის ის, რომ ივანიშვილმა, რუსების დავალებით, მსოფლიო რუკიდან გააქრო საქართველო. მთავარი პრობლემა არის ის, რომ ჩვენ მართლაც გადავიქეცით პატარა სოფლად და აღარ ვართ მსოფლიოს ერთ-ერთი პირველი რეფორმატორი ქვეყანა. მთავარი პრობლემა არის ის, რომ ივანიშვილმა გადასცა მთელი ჩვენი აგენტების სია რუსულ სპეცსამსახურებს. 2008 წლის მონაწილეების სიები აქვს რუსეთისთვის გადაცემული და უფრო მეტიც, საქართველოში მათზე ნადირობენ. ამ ყველაფრის ფონზე ერთმა გავრილოვმა გაგაკვირვათ? მე მივესალმები ყველა ოპოზიცური ძალის გაერთიანებას. მათ, ვინც ამბობს - პოლიტიკოსები არ გამოჩნდნენ, პარტიები არ დავინახოთ - მინდა ვუთხრა: ეს არის ივანიშვილის და სუს-ის რიტორიკა" - განაცხადა მიხეილ სააკაშვილმა.