„პრაქტიკული აკადემია“ პროფესიული განათლების გერმანულ-ქართულ დღეებზე დუალური განათლების პროგრამებს წარმოადგენს

პროფესიული განათლება ჩვენი ქვეყნის განათლების სფეროსთვის პრიორიტეტული ხდება და მისი პოპულარიზაციის მიზნით ახალი პროექტები იწყება.

აღნიშნული მიმართულებით ახალი რეფორმები გათვალისწინებულია განათლების სამინისტროს სამომავლო გეგმებშიც, რომელთა განხორციელებაც უკვე დაიწყო. გარდა ამისა, პროფესიული განათლების სრულყოფისთვის საქართველოს მეგობარი და პარტნიორი სახელმწიფოებიც ეხმარებიან, მაგალითად, ისეთი, როგორიც გერმანიაა.

სწორედ აღნიშნული პარტნიორობის ფარგლებში, 15 და 16 ივნისს, თბილისში, „უნარები საქართველოსთვის - პროფესიული განათლების ქართულ-გერმანული დღეები“ გაიმართება. ამ მასშტაბური ღონისძიების მასპინძლები საქართველოსა და გერმანიის მთავრობის წარმომადგენლები არიან. ეს იქნება პროფესიული განათლების მიმართულებით ყველაზე დიდი ღონისძიება, რაც კი საქართველოში ამ დრომდე ჩატარებულა, რადგან მას პროფესიული განათლების 20-ზე მეტი გერმანელი ექსპერტი და 8000-ზე მეტი ვიზიტორი ესტუმრება.

პროფესიული განათლების მიმართულებით, ეკონომიკურად განვითარებულ ქვეყნებში დიდი ხანია, დუალური განათლება პოპულარობით სარგებლობს. დუალური განათლება მეტ პრაქტიკულ სწავლებას და ნაკლებ თეორიულ მასალებს გულისხმობს.

4 წლის წინ „პრაქტიკული აკადემია“ ჩვენს ქვეყანაში დუალური განათლების დანერგვის მიმართულებით, ფაქტობრივად, პიონერი იყო. დღეს კი უკვე 6 მიმართულებით ასწავლის და მისი კურსამთავრებულები პარტნიორ კომპანიებშიც საქმდებიან.

პროფესიული განათლების გერმანულ-ქართული დღეების ფარგლებში „პრაქტიკული აკადემია“ საკუთარი სტენდით იქნება წარმოდგენილი, დაინტერესებულ პირებს კი დეტალურ ინფორმაციას აკადემიის კურსამთავრებულები მიაწვდიან.

„პრაქტიკული აკადემიის“ დირექტორი ნინო ფეიქრიშვილი AMBEBI.GE-სთან საუბარში განმარტავს, რომ აკადემიაში სწავლის ნებისმიერ მსურველსმისთვის საინტერესეო პროფესიულ პროგრამებზე რეგისტრაციის გავლა ადგილზევე შეეძლება.

უფრო კონკრეტულად, როგორ იქნება „პრაქტიკული აკადემია“ წარმოდგენილი პროფესიული განათლები გერმანულ-ქართული დღეების ფარგლებში, AMBEBI.GE-ს მისი დირექტორი ნინო ფეიქრიშვილი ესაუბრა.

რატომ გადაწყვიტა, პრაქტიკულმა აკადემიამ ქართულ-გერმანული თანამშრომლობის ფარგლებში გამართულ დღეებში მონაწილეობა მიეღო?

პრაქტიკული აკადემია უკვე 4 წელია, რაც საქართველოს საგანმანათლებლო ბაზარზე ოპერირებს. აკადემიაში ამ ეტაპზე 6 აქტიური მოდულია, რომელიც დაინტერესებულ პირებს ასაკის შეუზღუდავად აძლევს შესაძლებლობას, ისწავლონ , გაიარონ პრაქტიკა და დასაქმდნენ ჩვენს პარტნიორ ორგანიზაციებში. 15 ივნისს, პროფესიული განათლების დღეების ფარგლებში, 12 საათიდან თვითონ პრაქტიკული აკადემია იქნება წარმოდგენილი საგანმანათლებლო ზონაში. თითოეულ დაინტერესებულ პირს კი საშუალება ექნება, რომ ჩვენი პროგრამების შესახებ დეტალური ინფორმაცია მიიღოს.

„პრაქტიკული აკადემიის“ პროგრამები არის დუალური სწავლების ფორმარტზე აგებული, შესაბამისად, თითოეულ პროგრამაში ძალიან მცირე ნაწილი ეთმობა თეორიას და მოდულის ძირითადი ნაწილი ეთმობა პრაქტიკულ სამუშაოებში სტუდენტების ჩართვას .

რატომ არის „პრაქტიკული აკადემიისთვის“მნიშვნელოვანი პროფესიული განათლების ქართულ-გერმანულ დღეებში ჩართვა?

ვფიქრობ, რომ აღნიშნული ღონისძიების მასშტაბურობიდან გამომდინარე, ეს არის ძალიან კარგი შესაძლებლობაა პროფესიული განათლების მიღების მსურველებს გავუზიაროთ ინფორმაცია ჩვენს აკადემიაში არსებული პროგრამების შესახებ. ამიტომ, 15-16 ივნისს მოსული სტუმრები გაეცნობიან როგორც პროფესიულ პროგრამებს, ასევე ექნებათ შესაძლებლობა გაიცნონ სტუდენტები, რომლებიც უკვე წარმატებით არიან დასაქმებული ჩვენს პარტნიორ ორგანიზაციებში.

ვინ გააცნობს „პრაქტიკული აკადემიის“ საქმიანობას დაინტერესებულ პირებს და ამასთან, რეგისტრაციაშიც დაეხმარებიან?

დაინტერესებული პირები საგანმანთლებლო ზონაში შეხვდებიან „პრაქტიკული აკადემიის“ წარმომადგენელს, რომელიც ამომწურავ ინფორმაციას მიაწვდის მათ და დაეხმარება პროფესიული განათლების პროგრამებზე რეგისტრაციაში.

აღნიშნული პროგრამების ხანგრძლივობა არის საკმაოდ ინტენსიური და დაახლოებით, 3 თვიდან 5 თვემდე ვადას გულისხმობს. ამ პერიოდის განმავლობაში აკადემიის სტუდენტები ყოველდღიურ პრაქტიკულ სამუშაოებში არიან ჩართულები და სხვადსხვა პროფესიის დაუფლებისთვის მუშაობენ. კურსის დასრულების შემდეგ კი ცოდნა რეალობაში გადააქვთ და საქმდებიან.

რატომ გადაწყვიტეთ, დუალურ განათლების მიმართულებით წარმართულიყო „პრაქტიკული აკადემიის“ კურსები?

„პრაქტიკულ აკადემიას“ პარტნიორები მუდმივად უზიარებდნენ ინფორმაციას, რომ მათთან საკადრო მიმართულებით კონკრეტული პოზიციები საკმაოდ რთულად შესავსები იყო. აკადემიის საქმიანობაში დუალური განათლების ჩართვის იდეა სწორედ აქედან გაჩნდა.

შესაბამისად შეიქმნა პროგრამები, პროფესიონალი, პრაქტიკოსი მეტორების ჩართულობით და სწორედ ეს პროგრამები უწყობს ხელს, რომ როგორც კერძო კომპანიებისთვის, ასევე ზოგადად, დასაქმების ბაზრისთვის მომზადდეს პერსონალი, რომელიც კონკრეტული ორგანიზაციის საჭიროებებს დააკმაყოფილებს სხვადასხვა ვაკანტურ პოზიციებზე.

დაინტერესებულ პირებს პრაქტიკულ აკადემიაში მოსახვედრად რა პროცედურის გავლა ესაჭიროებათ?

ნებისმიერ დაინტერესებულ პირს შეუძლია გაიაროს რეგისტრაცია პრაქტიკული აკადემიის ვებ-გვერდზე. პროფესიული განათლების ქართულ-გერმანული დღეების ფარგლებში კი, ჩვენი წარმომადგენელი მიაწვდის მათ ამომწურავ ინფომაციას.