ავსტრიის კანცლერი და მისი მთავრობა გადააყენეს - მიზეზი პოლიტიკაში რუსული ფულის გამოჩენა და სკანდალური ვიდეოჩანაწერი აღმოჩნდა
ბოლო წლების განმავლობაში პირველად, ავსტრიის კანცლერის მიმართ ადგილობრივი მოსახლეობის ნდობა უპრეცენდენტოდ დაეცა. დასავლური მედიის ცნობით, ომის შემდგომ, ეს არის პირველი შემთხვევა ქვეყნის ისტორიაში, როდესაც ხელისუფლებას ასეთი დაბალი რეიტინგი აქვს.
ადგილობრივ პარლამენტში სოციალ-დემოკრატების ინიციატივას, სებასტიან კურცის მთავრობის გადაყენებისა და მათთვის უნდობლობის გამოცხადების შესახებ, მხარი თავად კურცის ყოფილმა კოალიციურმა პარტნიორმა, ულტრამემარჯვენე "თავისუფლების პარტიამაც" დაუჭირა.
bbc.com-ს ცნობით, მმართველი კოალიციის მიმართ უარყოფითი განწყობა, კოალიციის წევრი "თავისუფლების პარტიის" ქმედებებმა გამოიწვია. კერძოდ, მას შემდეგ, რაც "თავისუფლების პარტის" ლიდერის ვიდოეჩანაწერი გავრცელდა, სადაც ის უცნობი პირისგან მისი პარტიის დაფინანსების შესაძლებლობაზე საუბრობს, მმართველ კოალიციაში განხეთქილება დაიწყო, საბოლოოდ კი, დაიშალა. ჩანაწერში საუბარი იყო რუს ოლიგარქზე, რომელიც პარტიის ლიდერს "სახელმწიფო კონტრაქტების სანაცვლოდ, რუსულ ფულს სთავაზობს".
ახლა ავსტრიის პრეზიდენტმა უნდა გადაწყვიტოს, ვინ იქნება ახალი კანცლერი და ვინ ჩაუდგება მთავრობას სათავეში ვადამდელ არჩევნებამდე, რომელიც სექტემბერშია დაგეგმილი. სებასტიან კურცი 32 წლისაა და ის ავსტრიასა და ზოგადად, მსოფლიოში ყველაზე ახალგაზრდა ლიდერად იყო აღიარებული. თავად კურცი აცხადებს, რომ მას ყველაფერი მოუწყვეს და ამომრჩეველი თავის სიტყვას სექტემბერში იტყვის.
ყველაფერი გასულ კვირას დაიწყო. გერმანული Süddeutsche Zeitung da Der Spiegel წერდა, რომ მემარჯვენე პარტია "თავისუფლების" ლიდერის, ჰაინც კრისტიან შტრასეს შესახებ გავრცელებული ვიდეოჩანაწერი სკანდალურ ინფრომაციას შეიცავდა. პოლიტიკოსი რუს ქალთან ერთად იყო გადაღებული, რომელიც თავის თავს რუსი ოლიგარქის ნათესავს უწოდებდა.
ვიდეოჩანაწერში, რომელიც 2017 წელს, ავსტრიის არჩევნებამდე ცოტა ხნით ადრე იბიცაზეა გადაღებული, "თავისუფლების პარტიის" ლიდერი, ვიცე-კანცლერი ჰაინც-კრისტიან შტრასე იმავე პარტიის საპარლამენტო ჯგუფის ლიდერთან, იოჰან გუდენუსთან ერთად არის გადაღებული. ისინი რუსი ოლგარქის წარმომადგენელს, საპარლამენტო არჩევნებში მხარდაჭერას, გარკვეული სახელმწიფო პროექტების სანაცვლოდ ჰპირდებოდნენ.
ამ ჩანაწერს ავსტრიის მმართველ კოალიციაში განხეთქილება, ქვეყანაში კი, პოლიტიკური კრიზისი მოჰყვა. თავის მხრივ, შტრასე აცხადებს, რომ მას "ეს ყველაფერი მოუწყვეს".
გასულ შაბათს ავსტრიულმა მედიამ და გერმანულმა Bild-მა გაავრცელეს ავსტრიელი იურისტის წერილი, რომელსაც Bild-ი რამინ მირფაჰრაიდ მოიხსენიებს. ის ირწმუნება, რომ რუსი ოლიგარქის წარმომადგენელთან მაღალი რანგის პოლიტიკოსების შეხვედრა მისი ორგანიზებით მოხდა.
"გოგონა, ალიონა მაკაროვა თავის თავს რუსი ბიზნესმენის იგორ მაკაროვის ნათესავს უწოდებდა, - განმარტავს მირფაჰრაიდი, - საუბარი ეხებოდა სამოქალაქო საზოგადოების მიერ მხარდაჭერილ პროექტებს". ვინ იდგა ამ იდეის უკან, ავსტრიელი იურისტი არ აკონკრეტებს.
"ალიონა მაკაროვას ფიგურა კითხვებს აჩენს, რადგან იგორ მაკაროვს, რომელიც რუსული გაზის კომპანია Итера-ს დამფუძნებელია, ნათესავები, კონკრეტულად დისშვილი ან ძმისშვილი, საერთოდ არ ჰყავს. ამასთან, არავითარი მტკიცებულება იმისა, რომ ამ მოლაპარაკებაში ვიღაც რუსეთიდან მონაწილეობდა, არ არსებობს. არც შტრასეს აუღია ფული "ალიონასგან" და მეტჯერ არც შეხვედრია", - წერს რუსული მედია.
ავსტრიის ხელისუფლებისთვის სკანდალური აღმოჩნდა ის, რომ ვიცე-კანცლერი მზად იყო, ფულის სანაცვლოდ, რუსებთან ეთანამშრომლა. ჩანაწერში "ალიონა" შტრასეს სთავაზობდა, რუსული ფულით გავლენიანი ავსტრიული ტაბლოიდი Kronen Zeitung-ი ეყიდა და მხარი დაეჭირა "თავისუფლების პარტიითვის". სანაცვლოდ, შტრასე მას სახელმწიფო პროექტს სთავაზობდა, რომლის ფარგლებშიც ისეთი მედიაჰოლდინგი შეიქმნებოდა, როგორიც უნგრეთშია. უნგრეთში პრემიერ-მინისტრ ვიქტორ ორბანის დროს, მის მიმართ ლოიალურად განწყობილმა ბიზნესმენებმა უმსხვილესი საინფორმაციო საშუალებები ან დახურეს ან მოისყიდეს, რის შედეგედაც, მათ პრემიერის კრიტიკა შეწყვიტეს.
"თავისუფლების პარტია" ავსტრიაში, სხვადასხვა მოსაზრებების გამო, პრორუსულად მიიჩნევა. ის რუსეთის წინააღმდეგ დაწესებულ სანქციებს მუდმივად აპროტესტებს. მეტიც, 2016 წელს მან პარტია Единой Россия-სთან ურთიერთთანამშრომლობის ხელშეკრულება გააფორმა, რამაც ავსტრიული მედიის ნაწილი გააღიზიანა.