რომელი ქართველი დიზაინერები ზრუნავენ სალომე ზურაბიშვილის სტილზე - "რაც პრეზიდენტი გახდა, სიტყვას ასრულებს..."

პოლიტიკოსების ჩაცმულობა ყოველთვის იწვევს საზოგადოების ინტერესს. ქართულ პოლიტიკაშიც არის რამდენიმე მკვეთრად გამორჩეული სახე, რომელიც პოლიტიკური საქმიანობის მიღმა, საკუთარი ჩაცმის სტილით და გემოვნებით იქცევს საზოგადოების ყურადღებას.

მართალია, საქართველოს პრეზიდენტი მნიშვნელოვანი გადაწყვეტილებებით თავს ვერ გვაწონებს და უფლებამოსილებაც ძალიან შეზღუდული აქვს, სამაგიეროდ გემოვნებიანი სტილით გამოირჩევა. სალომე ზურაბიშვილი საფრანგეთში ემიგრაციაში გაიზარდა და ევროპული გავლენა მის ჩაცმულობას ყოველთვის ეტყობოდა - უყვარს ფერადი სამოსი, შარფები და აქსესუარები.

მას შემდეგ რაც პრეზიდენტი გახდა, აქტიურად უწევს პოპულარიზაციას ქართველ დიზაინერებს და ბევრ მათგანთან თანამშრომლობს კიდეც. ერთი შეხედვით სალომე ზურაბიშვილს მრავალფეროვანი გარდერობი აქვს, მაგრამ თუ კარგად დააკვირდებით, ხშირად იხილავთ ერთსა და იმავე სამოსში ოფიციალურ შეხვედრაზე. მაგალითად, ჯაბა დიასამიძის მიერ, ინაუგურაციისთვის შექმნილი სამოსი, ზურაბიშვილს აზერბაიჯანში ვიზიტისასაც ეცვა.

აშკარაა, რომ სალომე ზურაბიშვილს საკუთარი გარდერობიდან ძალიან უყვარს წითელი ორეული (რომლის დიზაინერი ჩვენთვის უცნობია), რადგან ეს კოსტიუმი რამდენიმე ოფიციალურ ღონისძიებაზე ეცვა - ემანუელ მაკრონთან, შემდეგ კი პოლონელ კოლეგასთან შეხვედრისას.

AMBEBI.GE დაინტერესდა რომელი ქართველი დიზაინერები აცმევენ ქვეყნის პრეზიდენტს. როგორც ზურაბიშვილთან დაახლოებულმა წყარომ გვითხრა, მისი საყვარელი დიზაინერები არიან: ჯაბა დიასამიძე, ქეთი ჩხიკვაძე, სოფო ესტადაშვილი, გვანცა ჯანაშია და სხვები. პრეზიდენტი ცოტა ხნის წინ, თბილისში ჩატარებულ მოდის კვირეულსაც დაესწრო, სადაც თამუნა ინგოროყვას სამოსით მოიხიბლა და უახლოეს მომავალში აპირებს მასთანაც ითანამშრომლოს.

დიზაინერ ქეთი ჩხიკვაძესთან სალომე ზურაბიშვილმა პირველად გასულ წელს ითანამშრომლა. მასთან მოდელმა თაკო ჩხეიძემ მიიყვანა და შვილის, თეიმურაზ გორჯესტანის ქორწილისთვის ორი კოსტიუმი შეიკერა.

"ქალბატონ სალომეს შვილის ქორწილისთვის კაბა, ხოლო ქორწილის მეორე დღისთვის - სამეული შევუკერე. მას შემდეგ სისტემატიურად ვთანამშრომლობთ. მან თქვა, რომ ქართველ დიზაინერებს თავად გაუწევდა პოპულარიზაციას მთელ მსოფლიოში და რაც პრეზიდენტი გახდა, სიტყვას ასრულებს კიდეც. ხშირად გვიწევს მასთან თანამშრომლობა მისი გაპრეზიდენტების შემდეგ, ბოლოს შავ-თეთრი კაბა შევუკერეთ.

- რაც პრეზიდენტი გახდა, გარკვეული დრეს-კოდის დაცვა მოუწევს, რა წესებს იცავს?

- კლასიკური სტილი უნდა იყოს დაცული, თუმცა უყვარს კაბის კონკრეტული სიგრძე, ფერები მოსწონს და კლასიკური, დახვეწილი გემოვნება აქვს, რაც მის ჩაცმულობაშიც ჩანს.

- ე.წ. პრიმერკებზე სიარულს ახერხებს?

- როცა მზადდება სამოსი, ვურეკავთ და ზოგჯერ თვითონ მოდის სახელოსნოში, ზოგჯერ ჩვენ მივდივართ მასთან და ვასინჯებთ სამოსს.

საქართველოს პირველ ქალ პრეზიდენტს ძალიან უყვარს მასიური აქსესუარები და შარფები. როგორც გავარკვიეთ, განსაკუთრებით მოსწონს „გამრეკელის“ შარფები, რომელთა ღირებულება 60 ლარიდან იწყება. აქსესუარებზე მხატვარ ირაკლი გამრეკელის ნახატებია გადატანილი.

ზურაბიშვილი სამკაულების ცნობილი მოყვარულიცაა. მას ხშირად უკეთია მასიური საყურეები, სამაჯურები და ბროშები. როგორც გავარკვიეთ, პრეზიდენტი აქსესუარების დიზაინერის სოფი ესტადაშვილის ნამუშევრებითაა მოხიბლული.

"ჩვენს გალერეაში იყვნენ სტუმრები, რომლებმაც შეარჩიეს ჩემს მიერ შექმნილი საკოლექციო ნამუშევრები - საყურეები და ბროში, რომელიც საქართველოს გაერთიანების სიმბოლოდ აღიქვეს და როცა გადიოდნენ, სწორედ მაშინ შევიტყვე რომ ეს ნამუშევრები პრეზიდენტისთვის უნდა ეჩუქებინათ.

ეს არ არის ოქროსგან და ბრილიანტისგან შექმნილი სამკაულები, არის ვერცხლის და ძვირფასი ქვისგან დამზადებული, რომელსაც გამორჩეული დიზაინი აქვს და მეორე ასეთი ნამუშევარი არ შეიქმნება. ფასს რაც შეეხება, არაეთიკური იქნება ფასის დასახელება", - გვითხრა აქსესუარების დიზაინერმა.