“მასტერშეფი” - მსოფლიოს ყველაზე რეიტინგული კულინარიული შოუ ქართულ ტელესივრცეში იწყება!

„მასტერშეფი“ - მსოფლიოში პოპულარული, რეიტინგული, ერთ-ერთი საუკეთესო გასართობი და შემოქმედებითი შოუ ქართულ ტელესივრცეში, „პირველ არხზე“ 18 მაისიდან გამოჩნდება.

„მასტერშეფი“ ყველაზე ცეცხლოვანი და დინამიკური კულინარიული გადაცემაა, რაც კი ოდესმე გინახავთ. ის აშშ-ში პოპულარული პროგრამების რეიტინგებში ყოველთვის საპატიო ადგილს იკავებს და მაყურებელიც არცერთ სეზონს არ ღალატობს.

მსოფლიოს სხვადასხვა ქვეყანაში მზარეულები „მასტერშეფის“ ტიტულისთვის არამხოლოდ იმ პრიზის გამო იბრძვიან, რაც ფინალურ ტურში ელით, არამედ სახელისა და დიდებისთვისაც, რასაც გამარჯვება მოუტანთ.

ავსტრალიასა და აშშ-ში არსებობს მაგალითები, როცა გამარჯვებულებმა ბრწყინვალე კარიერა ააწყეს და საკუთარი რესტორნებიც გახსნეს, რომელიც სტუმრების ნაკლებობას არასდროს არ განიცდის.

"მასტერშეფი“ უმაღლეს სტანდარტს ითხოვს, რომელიც მოყვარულმა მზარეულმაც კი უნდა დააკმაყოფილოს, შესაბამისად, კონკურსის მიმდინარეობისას მონაწილე დღითიდღე ვითარდება, ახალ უნარებს იძენს და საკუთარ თავში კიდევ უფრო მეტ შესაძლებლობებს აღმოაჩენს. "მასტერშეფი" კი სწორედ ის გახდება, ვინც ყველა დაბრკოლებას გადალახავს, გაუძლებს ყველაზე კომპეტენტური ჟიურის კრიტიკას, მოამზადებს ვიზუალურად მიმზიდველ, გემრიელ კერძებს და საბოლოო ჯამში, აღიარებენ, როგორც პროფესიონალ მზარეულს.

როგორც AMBEBI.GE-ს გადაცემის პროდუსერმა გიორგი ხაბურზანიამ განუმარტა, "მასტერშეფის" ტიტულის მსურველი იმდენად ბევრი აღმოჩნდა, რომ შერჩევის შემდეგ, პირველ ეტაპზე 70 მონაწილე მოხვდა, როცა აშშ-ში გადაცემა 100 კონკურსანტით იწყება. მისი შეფასებით, საქართველოში კულინარია ვითარდება, რასაც ხელი ღვინის ქვეყნად აღიარებამ და ტურიტების ინტერესმაც შეუწყო. ამ პროცესში კი „მასტერშეფი“ თავის წვლილს შეიტანს.

„ამ გადაცემის მომხიბვლელობა სწორედ სიმარტივეშია. ჩახლართული წესები არ აქვს და მაყურებელი რასაც ხედავს, პირდაპირ ის არის. გადაცემა ორი ნაწილისგან შედგება: პირველი, საქართველოს მასშტაბით კონკურსანტების მოძიებაა, რაც არ გაგვჭირვებია, რადგან ყველა კუთხიდან ძალიან ბევრი განაცხადი შემოვიდა. გადავარჩიეთ ასობით კონკურსანტი, რის შემდეგაც 70 დარჩა და ისინი 3-კაციანი ჟიურის წინაშე წარსდგეიან.

„მასტერშეფის“ წესების თანახმად, ჟიურის 3 წევრიდან თუ ორი ან სამივე მონაწილეს ეუბნება, რომ კერძი მოსწონს, კონკურსანტს ეძლევა წინსაფარი და შემდეგ ტურში გადადის. იმის მიხედვით, რამდენიც გადავა მეორე ტურში, ეძლევათ შემდეგი დავალება, საიდანაც ჟიური საუკეთესო ათეულს ამოარჩევს. სწორედ აქედან იწყება გადაცემის მთავარი ნაწილი - თითო გადაცემაში 2-2 დავალებაა, რასაც ათეულმა უნდა გაუძლოს, წაგებული კი შოუს ტოვებს. ვინ დატოვებს შოუს, ამას პროფესიონალი ჟიური წყვეტს!" - აღნიშნავს გიორგი ხაბურზანია.

ჟიურის თითოეული წევრის უკან დიდი გამოცდილება და ცოდნა დგას. კონსტანტინე თედელური სარესტორნო სფეროში 2005 წლიდანაა და მას ექსტრავაგანტული კოცეპტ-სივრცეები გამოარჩევს.

კონსტანტინემ ცნობილი რესტორანი „შეფის ბებია“ დაარსა. 2014 წლიდან ის პრეზიდენტის ადმინისტრაციის მიწვეული შეფი იყო, 2018 წელს კი Gault&Millau-ს ნომინაციაში „ახალგაზრდა ტალანტი“ გაიმარჯვა.

როგორც თედელური AMBEBI.GE-სთან საუბარში აღნიშნავს, „მასტერშეფმა“ მისცა შანსი, დაარღვიოს მზარეულის სტერეოტიპი, შექმნას ახალი სტანდარტი ქართულ გასტრო-სივრცეში და ხმამაღლა თქვას, რომ კულინარია ხელოვნებაა.

„მასტერშეფი მზარეულებსა და და რესტორნის მფლობელებს მისცემს სწორ მიმართულებას, თუ როგორ განავითარონ ხედვა, ურთიერთნდობა და მიდგომა საქმისადმი. პროექტი მზარეულებს საშუალებას მისცემს სწორად დაანახონ მათ საკუთარი შესაძლებლობები და ჩარჩოები მოხსნან "ნახატებს", შთაგონებით შექმნან კერძები და აქციონ ის ხელოვნებად“, - აღნიშნა მან.

„მასტერშეფის“ მონაწილეებს ჟიურიში კიდევ ერთი კომპეტენტური და გამოცდილი შემფასებელი - ლევან კობიაშვილი ელოდებათ. ის საქართველოს კულინარიული ფედერაციის პრეზიდენტი და მოლეკულური გასტრონომიის სპეციალისტია.

ლევან კობიაშვილს სარესტორნო სფეროში 26-წლიანი გამოცდილება აქვს. 2009 წლიდან არის ლექტორი კულინარიულ კოლეჯში „იკარუსი“, 2013-2016 წლებში კი აგრარულ უნივერსიტეტსა და კულინარიის აკადემიაში ქართულ და მსოფლიო სამზარეულოს ასწავლიდა. გარდა ამისა, ის წლების მანძილზე საქართველოს საუკეთესო რესტორნების ბრენდ-შეფი იყო.

შეკითხვაზე, როგორია მისთვის პროფესიონალი მზარეული, ლევანი პასუხობს, რომ ამ ტიტულის მოპოვებას ბევრი ეტაპი განაპირობებს.

"პროფესიონალ მზარეულად აღიარებას ბევრი ეტაპი განაპირობებს. ელოდებით, რომ გამარჯვებულს ჰქონდეს თავისი ხედვა და ცოტა ვიზუალური კრეატიულობაც გააჩნდეს. რა თქმა უნდა, პირველ რიგში, კერძი გემრიელი უნდა იყოს, არ აქვს მნიშვნელობა, ეს ოჯახის კერძი იქნება, ბებიის რეცეპტი თუ ა.შ.

საკმაოდ საინტერესო ადამიანები აღმოვაჩინეთ. გემრიელ და საინტერესო რაღაცებს გვთავაზობდნენ, მე კმაყოფილი ვარ“, - აღნიშნავს ის.

როგორც პროფესიონალი მზარეული და კულინარიის სფეროს ექსპერტი, ლევან კობიაშვილი მაყურებელს საინტერესო შოუს პირდება. „პროექტის მიზანია, გამოავლინოს კრეატიული და ნიჭიერი ადამიანები, რომლებსაც უყვართ სამზარეულო, კერძებს ხშირად ამზადებენ სახლში. მე გამიხარდება, თუ მოყვარულები აღმოჩნდებიან ისეთი კრეატიულები, ისეთი უნარებით, რომ მეც და ყველას გაგვაოცებენ“, - აღნიშნავს ის.

მესამე და ჟიურის ერთი-ერთი ყველაზე მკაცრი წევრი ლუკა ნაჭყებიაა, რომელმაც „მასტერშეფის“ პირველი გადაცემების ჩაწერის დროს კონკურსანტთა ნაწილის მიმართ კრიტიკა არ დაიშურა.

ლუკა პროფესიით სურსათის ტექნოლოგია. ის სურსათის ინდუსტრიაში 2010 წლიდან, სარესტორნო სფეროში კი 2012 წლიდან ჩაება. ლუკას კონსულტაციით 25-ზე მეტი კვების ობიექტი ამუშავდა. 2014 წლიდან დღემდე აგრარულ უნივერსიტეტსა და კულინარიულ აკადემიაში ასწავლის, ლექციებს ატარებს საერთაშორისო მასშტაბითაც.

მისი თქმით, შეფასებისას საკმაოდ ხისტია, „წრეებზე სიარული“ არ უყვარს და სათქმელს ყოველთვის პირდაპირ ამბობს. სათქმელი კი მხოლოდ ერთ რამეს - მონაწილეების განვითარებასა და მოტივაციის ამაღლებას ემსახურება.

„მე ასე ვუყურებ - სარესტორნო ინსდუსტრია საკმაოდ რთულია, ფსიქიკურადაც რთულად დასაძლევია და თუ ერთი ადამიანის სიტყვა შენზე ისე იმოქმედებს, რომ გაგტეხავს, არასწორ ინდუსტრიაში მოხვდი. ამიტომ იმედი მაქვს, რომ ჩემს ნეგატიურ შეფასებას ადამიანი გამოწვევად მიიღებს და ჩემს „ჯიბრზე“ რაღაც კარგს გააკეთებს - ასეთი შეგრძნება მაქვს მე“, - აღნიშნავს ლუკა.

როგორც ის AMBEBI.GE-სთან საუბარში აღნიშნავს, „მასტრშეფით“ სურს, ყველას აჩვენოს, რომ კულინარია საქართველოში ხელოვნება ხდება.

„ამას ყველა დაინახავს, რომ საქართველო ნელ-ნელა კულინარიაში დახელოვნებული ადამიანებით ივსება. იმედია, რომ ბევრისთვის ეს დარგი ინსპირაცია გახდება და სხვებიც გაბედავენ, რომ მასში ჩაერთონ. კულინარიის განვითარებამ მიგვიყვანა იქამდე, რომ საქართველოში „მასტერშეფის“ ჩატარება შესაძლებელია. გარდა ამისა, აუცილებელია პროფესიონალების დაფასება და მგონი, მასტერშეფი კარგი იქნება იმ ადამიანებისთვის, ვისაც ჩვენს ქვეყანაში ეს სჭირდება“, - აღნიშნავს ის.

რაც შეეხება შოუს გამარჯვებულის ჯილდოს, ეს "მასტერშეფის" პარტნიორის m2-ის მიერ დაწესებული ბინაა. ამასთან ერთად კი, გამარჯვებული ჯილდოდ მიიღებს პროფესიონალი მზარეულის ტიტულს და რაც მთავარია - ხალხის სიყვარულს!