ვინ არის 27 წლის ქართველი ექიმი, რომელიც ჰოლივუდის ცნობილი სახეების პლასტიკურ ქირურგთან მუშაობდა და რას საქმიანობს ის ამჟამად საქართველოში?

მარიამ თოფურია 27 წლისაა, ამჟამად ის კლინიკა „მაჟეს“ დირექტორია და ამავდროულად, კუზანოვის კლინიკაში პლასტიკურ ქირურგად მუშაობს.

ახალგაზრდა პლასტიკურმა ქირურგმა ოცნებების დევნასა და თანამედროვე ტენდენციების ძიებაში მსოფლიოს სხვადასხვა ქვეყანის წამყვან სპეციალისტებთან იმუშავა, მათ შორის: აშშ-ში, ისრაელში, ბრაზილიაში, ესპანეთში, რუსეთში, საფრანგეთსა და იტალიაში.

ქართველმა ქირურგმა მარიამ თოფურიამ AMBEBI.GE-ს საინტერესო ცხოვრებისეული თავგადასავლები უამბო და საყვარელ პროფესიასთან დაკავშირებული ხედვაც გააცნო.

- როგორია თქვენი, როგორც პლასტიკური ქირურგის მთავარი სამუშაო პრინციპი?

- უნდა დავანგრიოთ სტერეოტიპი, რომლის მიხედვითაც, როგორც წესი, ადამიანებს ეტყობათ პლასტიკური ქირურგიის კვალი. მაქსიმალურად ბუნებრივ, ნატურალურ ვიზუალთან ჰარმონიაში მყოფი შედეგის მიღწევის გარდა, ვმუშაობ პრინციპით, რომელიც რუტინას ემიჯნება. თითოეული პაციენტი განსაკუთრებული შემთხვევაა და იმსახურებს, რომ ეს იგრძნოს.

- რატომ გადაწყვიტეთ პლასტიკური ქირურგის პროფესიის არჩევა და როგორ დაიწყეთ ამ მიზნის განხორციელებისთვის ზრუნვა?

- 7 წლის ვიქნებოდი, ტელევიზორთან მჯდომი, როცა პლასტიკური ოპერაციის ტრანსლირებას ვუყურებდი და ნანახით დავინტერესდი. მშობლებმა, რომლებიც ექიმები არიან, ჩემს შეკითხვებს უპასუხეს. ტექნიკური საგნები მიტაცებდა და მგულშემატკივრობდნენ, რომ სხვა, შედარებით მსუბუქი პროფესია ამერჩია, თუმცა ერთხელ გაჩენილი სურვილი არასოდეს გამნელებია და ცხადია, მედიცინა ავირჩიე. მორიგ მიზნად საქართველოში უნივერსიტეტის დამთავრება დავისახე და პარალელურ რეჟიმში, საზღვრებს გარეთ საუკეთესო ესთეტიკურ კლინიკებში პრაქტიკული გამოცდილების მიღება გადავწყვიტე. თავად ვარჩევდი იმ პროფესიონალებს, რომლებიც ჩემთვის სანიმუშო აღმოჩნდნენ და წლების განმავლობაში მათთან მუშაობამ გამზარდა.

- რომელ ქვეყნებში გადაწყვიტეთ სწავლის გაგრძელება, გამოცდილების მიღება და საბოლოო ჯამში, როგორ აისახა ეს თქვენს პროფესიონალიზმზე?

- რეზიდენტურის პირველ კურსზე ვიყავი, როცა ისრაელში რეკონსტრუქციული ქირურგიის შესასწავლად წავედი. მინდოდა ჯერ აღნიშნული მიმართულება ამეთვისებინა და შემდეგ ესთეტიკურ ქირურგიაში განვითარებაზე მეზრუნა. ისრაელში, ლიბანის საზღვართან, სამხედრო ჰოსპიტალში გავიარე პრაქტიკა და დიდი გამოცდილება მივიღე. შემდეგ იყო ბრაზილია − სან-პაულუ და რიო დე ჟანეირო, მოსკოვი და საუკეთესო ქირურგებთან გატარებული 6 თვე; საფრანგეთსა და იტალიაში გავლილი პრაქტიკა და ოპერაციებში მონაწილეობა.

ემორის უნივერსიტეტში, ესთეტიკის ცენტრში ვნახე ის, რასაც ამდენი ხანი ვეძებდი. ვიყავი ფად ნაჰაისა და მარკ კოდნერთან − ატლანტის საუკეთესო პლასტიკურ ქირურგებთან. მარკისა და ემორის ესთეტიკის ცენტრისგან შემოთავაზებაც მივიღე, რომ მათთან დავრჩენილიყავი, თუმცა ეს ჩემს დღის წესრიგში არ დგას. ლოს-ანჯელესში ჩასვლისას რინოპლასტიკის წამყვან ქირურგებთან − აარონ კოსინისთან და ჯეი კალვერტთან მუშაობის საშუალება მომეცა. მათ ამერიკაში „რინოპლასტიკის ანგელოზებად“ მოიხსენიებენ. ამ მართლაც საოცარმა პროფესიონალებმა ახალი შესაძლებლობებისა და ცოდნის კარი გამიღეს. ხანდახან არც მჯეროდა, რომ ჩემს ცხოვრებაში ეს ნამდვილად ხდებოდა.

- თქვენ მუშაობდით ბევერლი ჰილზის წამყვან ქირურგთან - ბენ ტალეისთან, რომელიც ჰოლივუდის ცნობილ სახეებს ემსახურება. რა გამოცდილება მოგცათ ასეთ პროფესიონალთან მუშაობამ?

- მრავალგზის მოგზაურობის, ბევრი საინტერესო სიახლის გაცნობის შემდეგაც აღმოჩნდა, რომ ყველაზე მთავარი შთაბეჭდილება წინ მქონდა − გამიმართლა და შევხვდი ბენ ტალეის, რომელსაც შორიდან დიდი ხანია ვეთაყვანები. ბენი ბევერლი ჰილზის წამყვანი ქირურგია, რომელიც ჰოლივუდის ცნობილ სახეებს, მათ შორის კარდაშიანებსაც ემსახურება. მასთან მოხვედრაზე არც მიოცნებია, რადგან ბენ ტალეისთან კომუნიკაციის დამყარება ფაქტობრივად შეუძლებლად მეჩვენებოდა. ძალიან გამიმართლა და ამერიკაში გავიცანი გადაცემა „ექიმების“ ერთ-ერთი წამყვანი − ენდრიუ ორდონი. დავმეგობრდით, სწორედ მისმა რეკომენდაციამ და ერთმა ზარმა განაპირობა ბენთან ჩემი მოხვედრა. ასე აღმოვჩნდი ბენ ტალეის ბევერლი ჰილზის კლინიკაში − საოცნებო და საუკეთესო ადგილას, სადაც ოდესმე მოვხვედრივარ, რადგან პროფესიონალიზმისა და მომსახურების უმაღლესი დონე, რომელიც იქ ვიხილე, მანამდე არსად მქონდა ნანახი.

- უცხოეთში პრაქტიკული ცოდნის მიღების შემდეგ დაბრუნდით და გადაწყვიტეთ, თქვენი გამოცდილება საქართველოში გამოგეყენებინათ. ამჟამად რითი ხართ დაკავებული?

- ამჟამად ვმუშაობ პლასტიკურ ქირურგად კუზანოვის კლინიკაში, სადაც გავიარე რეზიდენტურა. ჩემი ხელმძღვანელების − ივა და ალექსანდრე კუზანოვების წვლილი საკუთარ პროფესიულ ზრდაში განუზომელია. სიამოვნებით დავთანხმდი შემოთავაზებას, გავმხდარიყავი მათი გუნდის წევრი.

ამ ეტაპზე, ჩემთვის განსაკუთრებით საინტერესოა ის, რაც ბენთან მუშაობისას ვისწავლე − რინოპლასტიკა, სახისა და ტუჩის ლიფტინგი (აწევა) მისეული მეთოდით. ტექნიკა, რომელსაც დავეუფლე, გამორჩეული და უნიკალურია. მე, როგორც ბენის მოსწავლე, მისი მეთოდის დანერგვას ვაპირებ ჩემს პრაქტიკაში.

- როგორი განცდა დაგეუფლათ პირველი ოპერაციის ჩატარებისას?

- თითქოს წაშლილია დროსთან ის საზღვარი, როცა პლასტიკურ ქირურგიას არ ვემსახურებოდი. იმ დროისათვის, როცა პირველი ოპერაცია გავაკეთე, ყოველმხრივ შეჩვეულ საქმიანობასთან კონტაქტი შედგა; მაშინაც კი, როცა ობზერვერის ამპლუაში ათეულობით ოპერაციას ვესწრებოდი, ნათლად წარმოვიდგენდი, თავად როგორ ვიმოქმედებდი, წავუძღვებოდი ოპერაციას. ხოლო როცა ეს დრო დადგა, არც რეალური პასუხისმგებლობა აღმოჩენილა უცხო, რადგან ჯერ კიდევ რეზიდენტობისას თითოეულ ოპერაციაზე დასწრებას საკუთარი პასუხისმგებლობის საკითხად აღვიქვამდი.

- პლასტიკურ ქირურგად ჩამოყალიბების სურვილის მქონე ადამიანისთვის თანამედროვეობაში დიდი ასპარეზია − მათ შეუძლიათ დეტალურად შეისწავლონ სხვადასხვა ტექნიკა და წარმატებით დაეუფლონ ხელობას, თუმცა ის, რაც არ ისწავლება, გემოვნებაა. როგორ ხელმძღვანელობთ საკუთარი გემოვნებით?

- ჩემი თვალები გამუდმებით ეძებს და პოულობს სხვადასხვა "პაციენტს" - ზოგჯერ ანგარიშმიუცემლად, ზოგჯერ კი დაჟინებით ვაკვირდები სახეებს და სხვადასხვა ნაკვთს, დეტალს ვარგებ; შესაძლოა მინიმალური ცვლილებებით, რომელიც განსაკუთრებით რთული შესასრულებელია. ჩემი გემოვნება ჩემი ხელწერაა, რომელიც იმ შემთხვევაში, თუ სტანდარტულად ერთგვაროვანი მიდგომა არ გახასიათებს, ქირურგს ყველასგან გამოგარჩევს.

- როგორ ფიქრობთ, რისი დამსახურებაა, რომ 27 წლის ასაკში დიდი გამოცდილების დაგროვება მოახერხეთ და იმის გამო, რომ ძალიან ბევრს მუშაობთ და სწავლობთ, არასოდეს გიგრძნიათ, რომ რაიმეს აკლდებით?

- ერთადერთი, რაც ყოველთვის მენანება, დროა. მას არასოდეს ვაცდენ. არასოდეს მიფიქრია, რომ რაიმეს ვაკლდები, რადგან ჩემთვის განსაკუთრებით ნაყოფიერი დღე მაშინაა, როცა ყველაზე მეტი საქმე მაქვს. პარადოქსია, თუმცა ასეთ დროს, კიდევ უფრო მეტის მოსწრებას ვახერხებ და საღამოს, კლინიკიდან გამოსვლისას, მეგობრებთან შეხვედრა, განტვირთვა ჩემთვის უფრო მეტად ღირებულია.

- ძალიან გადატვირთული რეჟიმი გაქვთ. ყოველდღიურად ცდილობთ, ფეხი აუწყოთ სიახლეებს. როგორ ახერხებთ ყოველთვის სასურველი შედეგების მიღებას?

- ყველაზე დიდი ბედნიერებაა როდესაც პაციენტი კმაყოფილი და ბედნიერია მიღწეული შედეგით. ვუსმინო მათი სიტყვებით აღწერილ შეგრძნებებს, თუ როგორ ტრანსფორმაციას ახდენს მინიმალური და ზუსტად გათვლილი გარეგნული ცვლილება ცხოვრების ხალისზე. სილამაზე დიდი ძალაა, რომლისკენაც ბევრი მიილტვის, მეც ესთეტიკის თაყვანისმცემელი ვარ, სწორედ ამიტომ ვუძღვნი ჩემს ცხოვრებას სწავლას, მოგზაურობას და გამუდმებულ განვითრებას, რათა ჩემს პაციენტებს შევთავაზო 21 საუკუნის თანამედროვე მიდგომები, გავითვალისწინო მათი მოთხოვნები და გავუზიარო ჩემი ხედვა მაქსიმალურად ბუნებრივი შედეგის მისაღწევად.