როგორ ეხმაურებიან პოლიტიკოსები და ექსპერტები სუს-ის ინფორმაციას მალხაზ მაჩალიკაშვილთან დაკავშირებით

სახელმწიფო უსაფრთხოების სამსახურის ინფორმაციით, მალხაზ მაჩალიკაშვილს ტერორისტული აქტის ორგანიზების გზით რამდენიმე პირის მკვლელობა ჰქონდა განზრახული. აღნიშნულთან დაკავშირებით სუს-ში საგანგებო განცხადება გაკეთდა. უწყება ეჭვობს, რომ ტერორისტული აქტის განხორციელების გზით რამდენიმე ადამიანის მკვლელობის თაობაზე მალხაზ მაჩალიკაშვილის გეგმის თანამონაწილე მისი ძმიშვილი მორის მაჩალიკაშვილი უნდა იყოს.

სახელმწიფო უსაფრთხოების სამსახურმა მაჩალიკაშვილისა და მისი ძმის შვილის საუბრის ჩანაწერიც გაავრცელა. ჩანაწერის მიხედვით, მალხაზ მაჩალიკაშვილი ძმის შვილს სავარაუდოდ, სუს-ის უფროსის ყოფილი მოადგილის, სოსო გოგაშვილის თვალთვალს ავალებს. ჩანაწერში მაჩალიკაშვილი მორის (ჰუსეინი) მაჩალიკაშვილს ეუბნება, რომ მისი საქმე მხოლოდ გოგაშვილია.

მოისმინეთ ჩანაწერი: "იქ რომ მივლენ, იქ უნდა გავანადგუროთ ეგენი

სუს-ის მიერ გავრცელებულ ინფორმაციას პოლიტიკოსები და ექსპერტები აფასებენ. "ევროპული საქართველოს" ერთ-ერთი ლიდერის გიგა ბოკერიას თქმით, თუ ეს ჩანაწერი ავთენტურია და ფაბრიკაცია არ არის, ეს ძალიან მძიმე სურათია და მთავრობამ შესაბამისი ნაბიჯები უნდა გადადგას.

მისი განცხადებით, ეს ჩანაწერი და საერთოდ, ეს განვითარება არ ხსნის იმ კითხვებს, რომლებიც არსებობს თავდაპირველ სპეცოპერაციასთან დაკავშირებით, რომელსაც ფატალური შემთხვევა მოჰყვა.

ამასთან, ბოკერიამ განაცხადა, რომ ის არაფრის ავთენტურობას არ აყენებს ავტომატურად კითხვის ნიშნის ქვეშ.

"ზოგადად, ფონი ნდობის თვალსაზრისით მძიმეა ხელისუფლების მიმართ, ამიტომ ვაკეთებ ამ დათქმას. რაც მოვისმინეთ, ეს, თუ ავთენტურია, ეს არის ძალიან სერიოზული და მძიმე სურათი და ამას უნდა მოჰყვეს კონკრეტული ნაბიჯები", - განაცხადა ბოკერიამ.

"ქართული ოცნება - დემოკრატიული საქართველოს" თავმჯდომარე მამუკა მდინარაძე ამბობს, რომ სახელმწიფომ, შესაბამისი უწყებების მეშვეობით, კიდევ ერთხელ ძალიან მძიმე დანაშაული აიცილა თავიდან. მისი თქმით, დააკავებენ თუ არა მალხაზ მაჩალიკაშვილს, ეს გამოძიების საქმეა და მტკიცებულებებზეა დამოკიდებული.

"რეალური როგორ არ იყო, როცა კონკრეტული მასალები არსებობს და ჩვენც ვნახეთ?! ალბათ, იმის იქეთ კიდევ არის რაღაც მონაცემები და კარგია, რომ თავიდან იქნა აცილებული ძალიან მძიმე ფაქტი. დანარჩენზე ალბათ, გამოძიება საბოლოოდ გასცემს პასუხს. მე დეტალები არ ვიცი. იქ იყო კონკრეტული მონაცემები, კონკრეტული საუბარი და ამის თავიდან აცილების ფაქტი, ბუნებრივია, დადებითად უნდა შეფასდეს. სახელმწიფომ შესაბამისი უწყებების მეშვეობით კიდევ ერთხელ ძალიან მძიმე ფაქტი აიცილა თავიდან. რაც შეეხება დაკავებას, ეს გამოძიების საქმეა, მტკიცებულებებზეა დამოკიდებული. აქ გასათვალისწინებელია ბევრი იურიდიული ნიუანსი - ჰქონდა თუ არა უკვე დამთავრებულ დანაშაულს ადგილი, თუნდაც დანაშაულის მომზადებასთან მიმართებით, თუ ეს თავიდან აცილებული იქნა განზრახვის გახმოვანებისთანავე და მოასწრეს თუ არა რაიმე დანაშაულებრივი ქმედების ჩადენა. საუბარია იმაზე, რომ მომზადების ფაქტს მაინც ჰქონდა თუ არა ადგილი. მომზადება ნიშნავს იმას, დანაშაულის ჩასადენად კონკრეტული პირობების შექმნას. თუ ამ პირობების შექმნაც ვერ მოასწრეს და პირველივე ეტაპზე, განზრახვის გახმოვანებისთანავე აღკვეთეს, აქ შეიძლება დანაშაულთან არ გვქონდეს საქმე და გვქონდეს საქმე სავარაუდო შემთხვევის თავიდან აცილებასთან. მაგრამ ფაქტია, რომ მძიმე დანაშაული, რომელიც შეიძლება მომხდარიყო, თავიდან იქნა აცილებული“, - განაცხადა მდინარაძემ.

"შენების მოძრაობის" ლიდერის დავით უსუფაშვილის თქმით, აღნიშნულ საქმეზე ობიექტური გამოძიებაა საჭირო.

"ასეთ საკითხებში, სწორედაც, სასამართლოს იმედი უნდა გვქონდეს, რომ სასამართლოში გაირკვევა მტყუან-მართალი, თუმცა ასეთ სერიოზულ საკითხებზე ჩვენს ვითარებაში სასამართლოსადმი ნდობის დეფიციტი, ზოგადად, დიდი პრობლემაა და ამიტომ ყველა თემის პოლიტიზირება ხდება. რაც შეეხება კონკრეტულად ამ ჩანაწერს, მასზე დაყრდნობით ვერაფერს გეტყვით. ბევრი ჩანაწერი მოვისმინეთ ბოლო წლების განმავლობაში, ზოგი დადასტურდა, ზოგი არ დადასტურდა, ამიტომ საჭიროა ობიექტური გამოძიება. ერთი, რაც ცალსახად შემიძლია ვთქვა, მე მგონი, მალხაზ მაჩალიკაშვილი არასწორად მოიქცა, როდესაც გამოკითხვაზე მისვლაზე უარი თქვა. ასეთ შემთხვევაში ხელისუფლებასთან, რაც არ უნდა კითხვები და პრობლემები გქონდეს, თანამშრომლობა სჯობია. ზოგადად, ხელისუფლებამ, თემირლან მაჩალიკაშვილის სიკვდილის გარემოებების ძიებისას ყველაფერი გააკეთა იმისთვის, რომ ნდობა დაბალი იყოს მის მიმართ, არამარტო მაჩალიკაშვილების ოჯახში, არამედ მოსახლეობის დიდ უმრავლესობაში. იმედი მაქვს, ახლა მაინც, თუ რამე საქმეს მოკიდეს ხელი, ეს იქნება უტყუარი მტკიცებულებებით გამაგრებული და საზოგადოებაში ნდობის მომპოვებელი. სხვა შემთხვევაში, შესაძლოა, ვითარება კიდევ უფრო გართულდეს მაჩალიკაშვილების საქმესთან დაკავშირებითაც და არამხოლოდ", - განაცხადა უსუფაშვილმა "ინტერპრესნიუსთან" საუბრისას.

სუს-ის მიერ გავრცელებულ ინფორმაციასა და აუდიოჩანაწერს ექსპერტი მამუკა არეშიძე "კვირის პალიტრასთან" საუბრისას გამოეხმაურა. როგორც არეშიძე განმარტავს, უნდა დადგინდეს ავთენტურია თუ არა ფარული ჩანაწერი და ასევე ის, რამდენად კანონიერად არის ის მოპოვებული.

"ავთენტურობა უნდა დადასტურდეს, ისიც უნდა დადასტურდეს, რამდენად კანონიერად იყო მიღებული ეს ჩანაწერი, თუმცა ვფიქრობ, რომ სუს-ი შექმნილ ვითარებაში არ დაუშვებდა, რამე უკანონო ნაბიჯი გადაედგა. თუ ავთენტურობა დადასტურდა, ტერორისტული აქტის მომზადების მცდელობაზე შესაბამისი პასუხისმგებლობა არსებობს, ისევე, როგორც პასუხისმგებლობა არსებობს იმაზე, რომ ამდენი ხნის განმავლობაში თემირლან მაჩალიკაშვილის გარდაცვალებასთან დაკავშირებით რეალური სურათი ვერ დაიდო, სიკვდილის გამოძიების ფაქტი შეიძლება მთავარი არ იყოს, მთავარი ისაა, არის თუ არა ეს ადამიანი დამნაშავე. მოკლედ ასეა თუ ისეა, მე მომხრე ვარ იმისა, რომ ვინც კანონი დაარღვია, პასუხი აგოს", - განაცხადა არეშიძემ.

რაც შეეხება იმ ფაქტს, თუ რა შედეგი შეიძლება მოჰყვეს ამ ყველაფერს პანკისში, არეშიძე აცხადებს, რომ ამას განსაკუთრებული არაფერი მოჰყვება.

"არაფერი განსაკუთრებული. ისევე როგორც სხვაგან, იქაც არაერთგვაროვანია საზოგადოება, ვიღაცას გული შესტკივა მაჩალიკაშვილის ოჯახზე, ვიღაცისთვის მიუღებელია ეს პიროვნება, თუ ხელოვნურად არ მოხდება სიტუაციის გამწვავება, სხვა გზით არაფერი ისეთი არ მოხდება", - განაცხადა არეშიძემ.