ათეისტური სულისკვეთების მქონენი ეყრდნობიან გონებას და იმ მონაცემებს, რისი შეცნობის საშუალებასაც ჩვენი გრძნობის ხუთი ორგანო იძლევა - პატრიარქი

ათეისტური სულისკვეთების მქონეთათვის სიტყვა "ცოდვა“",განწმენდა-კათარზისი“, ისეთივე გაუგებარია, როგორც "თავმდაბლობა“ ან "სინანულის განცდა“, - ამის შესახებ სრულიად საქართველოს კათოლიკოს -პატრიარქის სააღდგომო ეპისტოლეშია ნათქვამი. უწმინდესის განცხადებით, ათეისტებმა არ იციან და არც სურთ რაიმე იცოდნენ ადამიანის სულიერ ცხოვრებაზე.

„სამწუხაროდ, ყოველთვის იყვნენ და ახლა, მითუმეტეს, მრავლად არიან კადნიერნი, რომელნიც უარყოფენ ღვთის არსებობას, ან შემოქმედს სამართალს უწუნებენ და მიაჩნიათ, რომ თვითონ უნდა შექმნან ახალი რეალობა, ახალი სამყარო. ათეისტური სულისკვეთების მქონენი ეყრდნობიან თავის გონებას და იმ მონაცემებს, რისი შეცნობის საშუალებასაც ჩვენი გრძნობის ხუთი ორგანო იძლევა; მათ არ იციან და არც სურთ იცოდნენ რაიმე ადამიანის ბუნების საუკეთესო და ყველაზე მნიშვნელოვან ნაწილზე, სულიერ ცხოვრებაზე. მათთვის სიტყვა"ცოდვა“",განწმენდა-კათარზისი“, ისეთივე გაუგებარია, როგორც "თავმდაბლობა“ან"სინანულის განცდა“. ასეთთა შორის, როგორც წესი, სხეული და მიწა ბატონობს და არა ზეცა და სული,“ - ნათქვამია სააღდგომო ეპისტოლეში.

მასში ასევე აღნიშნულია, რომ დღეს, როდესაც მსოფლიოში ათეისტური ტალღა გაძლიერდა და მისი გავლენა ჩვენს ქვეყანაშიც იგრძნობა, თვალნათელი გახდა, როგორ დეგრადირდება ადამიანი უფლის გარეშე, როგორ ადვილად გადაგვარებადია იგი, როგორი უგუნური და თვითგანადგურებისაკენ მიდრეკილი ხდება ის.