პროკურატურის ინფორმაციით, სუსლიაკმა 9 თვის ბავშვი გაყიდა, თუმცა ადვოკატის მტკიცებით, ბავშვი აბაზანაში დაიხრჩო

პროკურორის განმარტებით, ბრალდებას დასაბუთებული ვარაუდის სტანდარტით აქვს დადგენილი ის ფაქტი, რომ უკრაინის მოქალაქემ იულია სუსლიაკმა ერთი ბავშვი საქართველოში ჩამოსვლამდე სავარაუდოდ გაყიდა.

როგორც პროკურორმა თეა გიორგაძემ სასამართლო სხდომის დასრულების შემდეგ აღნიშნა, დაცვის მხარემ ვერ წარადგინა დამაჯერებელი მტკიცებულება, რომ ერთ-ერთი ბავშვი ნამდვილად გარდაიცვალა.

პროკურორის თქმით, ბავშვის გაყიდვის ფაქტზე ეჭვებს ისიც ამძაფრებს, რომ გარდაცვალების მომენტში ბავშვი 9 თვის უნდა ყოფილიყო და აქედან გამომდინარე, წარმოუდგენელია ის სააბაზანოში მარტო ყოფილიყო.

„მტკიცებულებეზე კონკრეტულად ვერ მოგაწვდით ინფორმაციას. მიმდინარეობს გამოძიება, ეს არ არის მხოლოდ საქართველოში ჩადენილი დანაშაული. ბრალდებულის მხრიდან ადგილი ჰქონდა არასრულწლოვნების გადაყვანას ერთი ქვეყნიდან მეორე ქვეყანაში. საქართველოში ჩამოსვლამდე ერთი ბავშვის გაყიდვასაც ჰქონდა ადგილი. ბრალდების მხარე დასაბუთებული ვარაუდის სტანდარტით დადგენილად მიიჩნევს, რომ ეს ფაქტი მოხდა. გარდაცვალების მოწმობა არ არსებობს. დაცვის მხარემ წარმოადგინა დასკანერებული ფურცელი, სადაც მითითებულია, რომ არასრულწლოვანი, 9 თვის ბავშვი გარდაიცვალა აბაზანაში ბანაობის დროს, რაც ეჭვის საფუძველს ნამდვილად ქმნის", - აღნიშნა პროკურორმა.

თეა გიორგაძის ინფორმაციით, ვინაიდან დანაშაული მხოლოდ საქართველოში არ არის ჩადენილი, პროკურატურა სამართლებრივი დახმარების თხოვნით სხვა ქვეყნებსაც მიმართავს.

უკრაინელი ქალის ადვოკატი ზურაბ თოდუა კი მისი დაცვის ქვეშ მყოფისთვის აღკვეთის ღონისძიების სახედ პატიმრობის შეფარდებას აპროტესტებს. მისი თქმით, პროკურატურამ სასამართლო პროცესზე წარდგენილი ბრალის შესაბამისი მტკიცებულებები ვერ წარადგინა.

„სასამართლო პროცესზე პროკურატურამ ვერ წარმოადგინა ვერც ერთი მტკიცებულება შერაცხული ბრალის ირგვლივ. მაგალითად, რა მტკიცებულებებით დასტურდება ბავშვების ყიდვის ფაქტი, ვერ წარმოადგინა რა მტკიცებულებებით დასტურდება გარდაცვლილი ბავშვის გაყიდვის ფაქტი. რატომ არ არის დღემდე ჩატარებული დნმ ექსპერტიზა მაშინ, როდესაც უკვე 8 დღეა ანალიზები აღებული აქვთ? რატომ არ უნდათ, აიღონ ბიოლოგიური მასალა მამისგან, რომელიც მზადყოფნას გამოთქვამს, საქართველოში ჩამოვიდეს და ჩააბაროს ეს? რატომ არ უნდათ ბავშვების ბებიის ჩამოსვლა, რომელიც ასევე თანახმაა ბიოლოგიური მასალა ჩააბაროს? რა საფუძვლებს ემყარება მათი მოსაზრება, რომ ბავშვი არის გაყიდული?“ - განაცხადა ზურაბ თოდუამ.

იულია სულიაკის ადვოკატმა ჟურნალისტებთან საუბრისას ასევე აღნიშნა, რომ სასამართლო პროცესზე მან დოკუმენტაცია წარადგინა იმის დასადასტურებლად, რომ სანამ მისი დაცვის ქვეშ მყოფი საქართველოში ჩამოვიდოდა, მისი ერთი ბავშვი რუსეთში უბედური შემთხვევის შედეგად გარდაიცვალა. მისი განმარტებით, 9 თვის ბავშვი აბაზანაში დაიხრჩო, რის გამოც იულია სუსლიაკი რუსეთიდან საქართველოში 11-ის ნაცვლად 10 ბავშვით ჩამოვიდა.

„სასამართლოზე ჩემ მიერ წარმოდგენილი დოკუმენტით უტყუარად დასტურდება, რომ 9 თვის ბავშვის გარდაცვალების მიზეზია უბედური შემთხვევა, კერძოდ სააბაზანოში დახრჩობა. ასევე წარმოდგენილი მაქვს გარდაცვალების მოწმობა. პროკურორმა სასამართლოზე თავხედურად განაცხადა, რომ ჩემს მიერ წარმოდგენილი დოკუმენტი არის ქსეროასლი. მოსამართლე მაკა გველესიანს სრული საფუძველი ჰქონდა, არ დაეკმაყოფილებინა პროკურორის შუამდგომლობა, მაგრამ თავი არ აიტკია,“ - განაცხადა ზურაბ თოდუამ.

შეგახსენებთ, რომ უკრაინის მოქალაქე იულია სუსლიაკი წარდგენილ ბრალს არ აღიარებს და აცხადებს, რომ ათივე ბავშვი მისი შვილია. ბრალდებული, მიმდინარე წლის 25 აპრილს, ქუთაისის ერთ-ერთ საავადმყოფოში დააკავეს. შინაგან საქმეთა სამინისტროს ინფორმაციით, იულია სუსლიაკი საქართველოში 10 მცირეწლოვან ბავშვთან ერთად რუსეთიდან 2019 წლის 8 აპრილს ჩამოვიდა და აფხაზეთის ოკუპირებულ ტერიტორიაზე გადასვლას აპირებდა.