"გოგონებს 14 წლიდან ასწავლეთ, როგორ მოუარონ სახის კანს" - რჩევები ექსპერტისგან და Facebook-ჯგუფი, რომელმაც ქართველ ქალებს თავის მოვლა ასწავლა

ქართულ ფეისბუქ-სივრცეში სხვადასხვა ინტერესზე მორგებული უამრავი ჯგუფი არსებობს. ამ სივრცეებში ერთმანეთს უზიარებენ გამოცდილებას - კულინარიის, ფილმების თუ პოეზიის მოყვარულები, რემონტის, ჯანსაღი კვების თუ სილამაზის ექსპერტები...

ქართველი გოგონების და ქალების ერთ-ერთი საყვარელი თავშეყრის ადგილი Beauty Lab-ია, რომელიც 45 000-მდე სხვადასხვა ასაკის, პროფესიის, ინტერესებისა და სოციალური მდგომარეობის ქალს აერთიანებს.

21 წლის სტუდენტმა და ბლოგერმა ქეთა ბაღაშვილმა Beauty Lab 2017 წლის თებერვალში, თანამოაზრესთან ერთად შექმნა. როგორც ქეთა AMBEBI.GE-სთან იხსენებს, ჯგუფის შექმნის იდეა წინასწარ დაგეგმვის და სამომავლო განვითარებაზე ფიქრის გარეშე, განსატვირთად და ვიწრო წრეში გამოცდილების გაზიარების მიზნით გადაწყვიტეს.

ჯგუფის მიზნები დროსთან და მის ზრდასთან ერთად იცვლებოდა და ფართოვდებოდა. ქეთას თქმით, ჯგუფი თავდაპირველ მიზანს არ ღალატობს და რჩება სივრცედ, სადაც ქალებს შეუძლიათ ყოველდღიური სტრესისგან განიტვირთონ, ერთმანეთს დაეხმარონ, გააძლიერონ, გვერდით დაუდგნენ, მისცენ გულწრფელი რჩევები.

Beauty Lab-ის წევრების უმეტესობამ უკვე კარგად იცის სახის კანის მოვლის დილისა და საღამოს რუტინის, რუჯის მიღების წესების, მაკიაჟის სწორად გაკეთებისა და სილამაზის სხვა დეტალების შესახებ, თუმცა იმისთვის, რომ უფრო კარგად გაგარკვიოთ სილამაზის ამ დეტალებში - AMBEBI.GE ქეთა ბაღაშვილს ესაუბრა.

- საქართველოში ბევრმა გოგონამ სწორედ Beauty Lab-ის მეშვეობით შეიტყო კანის მოვლის რუტინის მნიშვნელობის შესახებ. დეტალურად განგვიმარტე, რას ნიშნავს დილის და ღამის რუტინა, თავის მოვლის რა საშუალებები უნდა იყოს ამ დროს გამოყენებული?

- სახის მოვლის რუტინა სახის მოვლის ის ნაბიჯებია, რომლებსაც ჩვენ ყოველდღიურად უნდა მივსდიოთ. მნიშვნელოვანია არ დაგვავიწყდეს, რომ რუტინა სახის კანის ტიპისგან გამომდინარე უნდა შედგეს. კანს სხვადასხვა პროდუქტით, სწორი თანმიმდევრობით უნდა მოვუაროთ ყოველ დილას და საღამოს.

ჩემი აზრით, გოგონებს დაახლოებით 14 წლიდან უნდა ვასწავლოთ, როგორ მოუარონ თავიანთ სახის კანს მათი ასაკიდან გამომდინარე და როგორ გამოიყენონ მათთვის შერჩეული პროდუქტები.

- თავის მოვლის რა საშუალებები უნდა გამოვიყენოთ კონკრეტული ასაკობრივი კატეგორიების მიხედვით?

- სახის კანის მოვლის შესახებ ზოგადი რეკომენდაციების გაცემა ძალიან რთულია, რადგან ყველაფერი ძალიან ინდივიდუალურია. აუცილებლად უნდა გვახსოვდეს, რომ ის, რაც ერთ 20 წლის გოგონას მოუხდა, მეორე ოცი წლის გოგონასაც აუცილებლად ვერ მოუხდება. ყველაფერს განაპირობებს სახის კანის ტიპი. არასწორად შერჩეული პროდუქტი არათუ უკეთესობას, უარესობასაც მალევე გაჩვენებთ.

რაც შეეხება ასაკს, 20-30 წლის გოგონებმა პირველ რიგში სახის კანის დაცვაზე უნდა იფიქრონ, ყოველდღიურად მზისგან დამცავის გამოყენება შედეგს აუცილებლად წლების შემდეგ გამოიღებს

30 წლის შემდეგ აუცილებლად უნდა დავიწყოთ ანტიასაკობრივი პროდუქტების გამოყენება, თუმცა ამ დროს დერმატოლოგები პაციენტებს პირველ რიგში, სტრესის შემცირებისკენ მოუწოდებენ, რადგან სტრესი ერთ-ერთი პირველი ფაქტორია, რომელიც ჩვენს სახის კანზე პირდაპირ აისახება. ჰიალურონის მჟავა ამ ასაკში ქალების კიდევ ერთი საყვარელი პროდუქტია, რომელიც ახალგაჩენილ ნაოჭებს ერევა და აქრობს.

რაც შეეხება 40 წლიდან ქალებს, თუ ისინი მთელი ამ წლების განმავლობაში სწორად უვლიდნენ თავიანთ სახის კანს, იყენებდნენ დამცავებს, შრატებს, მჟავებს, არ ეწეოდნენ და ბევრ წყალს სვამდნენ, უფრო მარტივად შეუძლიათ მოუარონ კანს. მნიშვნელოვანია ძილი, რათა დაზიანებული კანი აღდგეს. ამ დროს ქალები რუტინას ამატებენ ანტიოქსიდანტებსაც, რადგან კანს ისე აღარ შეუძლია გარემოსგან თავდაცვა, როგორც 30 წლამდე ასაკში.

- როგორ უნდა მოვუაროთ თავს სეზონების მიხედვით?

- ამ შემთხვევაშიც ისევ კანის ტიპიდან უნდა გამოვიდეთ, თუმცა, საერთო ჯამში შეგვიძლია ვთქვათ, რომ ზამთარში კანი მეტად მშრალია და დატენიანება სჭირდება.

გაზაფხულზე კანი იღვიძებს, თუმცა ამავდროულად, აქტიურდება ყველა ჩვენი მიძინებული ალერგიაც, ჩნდება სიწითლეები, გვჭირდება მზისგან დამცავი კრემის ყოველდღიური ხმარება, დამატენიანებლის რაოდენობის შემცირება.

რაც შეეხება ზაფხულის სეზონს, ამ პერიოდში იმატებს ცხიმიანობა და აუცილებელია სახე სწორი პროდუქტებით გავიწმინდოთ, გამოვიყენოთ ისეთი ტონალური, რომელიც ნაკლებად გაგვიცხიმიანებს კანს.

- ზაფხულის სეზონი მოდის და რუჯი აქტუალური ხდება. როგორ მოვიქცეთ, რომ კარგი ფერი მივიღოთ და ამავდროულად, კანი მზის სხივების ზემოქმედებით არ დავაზიანოთ?

- ზოგადად, კანის მოვლა რუჯს არ ცნობს, ებრძვის მზის სხივებს და სოლარიუმს, თუმცა ამ ცდუნებისგან თავის შეკავება ძალიან გვიჭირს. რისკებს ვერსად გავექცევით, თუმცა თავდაცვისათვის მხოლოდ ის შეგვიძლია, რომ სწორად შევარჩიოთ მზისგან დამცავი, ვაკონტროლოთ ულტრაიისფერი სხივების ზემოქმედების ქვეშ გატარებული დრო და კანი მუდმივად დავიტენიანოთ ან ეს ყველაფერი უბრალოდ, დაფერვით ჩავანაცვლოთ.

- როგორ ფიქრობ, შეიძლება თუ არა ბიუჯეტური კოსმეტიკითა და თავის მოვლის საშუალებებით სასურველი შედეგების მიღება?

- ცხადია, ბიუჯეტური თავის მოვლის პროდუქტებითაც შეიძლება სასურველი შედეგის მიღება. მთავარია, სწორად შევარჩიოთ პროდუქტები ჩვენი კანის ტიპის და პრობლემების მიხედვით, სწორი თანმიმდევრობით გამოვიყენოთ ისინი და ვისწავლოთ, რა მიმართულებით უნდა ვამოძრაოთ ჩვენი ფუნჯები.

- როგორ ფიქრობ, რამდენად სასურველია ყოველდღიურად მაკიაჟის გამოყენება და რა გვერდითი ეფექტები შეიძლება ჰქონდეს მას?

- ჩემი აზრით, მაკიაჟის ყოველდღიურად გამოყენება დასაშვებია, თუმცა არა სასარგებლო. მაკიაჟის ყოველდღიურად გამოყენების ფუფუნება მაშინ გვაქვს, როცა ჩვენი კანი იდეალურად გამოიყურება. კარგი იქნება, თუ ჩვენს კანს ზოგჯერ მაინც მივცემთ სუნთქვის საშუალებას.

მნიშვნელოვანია არ დაგვავიწყდეს, რომ დღის ბოლოს მაკიაჟის მოშორება კანისათვის სასიცოცხლოდ მნიშვნელოვანია. მაკიაჟით არ უნდა დავიძინოთ!

- თუ მაკიაჟის გარეშე საკუთარ სახეს ვერ ვეგუებით, რა ნაკლებადსაზიანო საშუალებები შეიძლება გამოვიყენოთ თითქმის იმავე ეფექტის მისაღებად, რასაც ტონალურის გამოყენების დროს ვიღებთ?

- მძიმე მაკიაჟი უბრალოდ, მარტივი მაკიაჟით შეგვიძლია ჩავანაცვლოთ. არსებობს ასეთი ტერმინიც - no make up make up (მაკიაჟი მაკიაჟის გარეშე) გვგონია, რომ არაფერი გვისვია სახეზე და ჩვენი კანი ბუნებრივად ასე გამოიყურება, თუმცა სინამდვილეში, ყველა ნაკლი იდეალურადაა დაფარული.

ასეთ დროს შედარებით სქელი ტონალური უფრო თხელით, BB ან CC კრემებით შეგვიძლია ჩავანაცვლოთ, გამოვიყენოთ ბუნებრივი ფერის ტუჩსაცხი, მოვერიდოთ მკვეთრ სხვაობებს კონტურსა და ტუჩის ფერს შორის. შევეცადოთ, რომ კონტურინგი ძალიან შესამჩნევი არ იყოს და ა.შ.