ადვოკატი: „საქართველოს ბანკის“ დაყაჩაღებაში ბრალდებულები სასამართლოს აღიარებით ჩვენებას მისცემენ

გლდანში „საქართველოს ბანკის“ დაყაჩაღებაში ბრალდებულები ნიკა ქარსელაძე და კახა გამხუაშვილი ჩადენილ დანაშულს აღიარებენ და აღიარებით ჩვენებას სასამართლოს ერთ კვირაში მისცემენ, - ამის შესახებ AMBEBI.GE-ს ბრალდებულების ადვოკატმა ლაშა მიქაუტაძემ განუცხადა.

ბრალდებულები მიმდინარე წლის 8 მარტს, გლდანში „საქართველოს ბანკს“ დაესხნენ თავს. ბრალდებულებს სასამართლომ აღკვეთის ღონისძიების სახით პატიმრობა შეუფარდა. ყაჩაღურ თავდასხმაში ბრალდებულები წარსულში ნასამართლევი 20 და 21 წლის ნიკა ქარსელაძე და კახა გამხუაშვილი ამჟამად გლდანის მერვე საპყრობილეში წინასწარ პატიმრობაში იმყოფებიან.

შსს-ს ინფორმაციით, აღნიშნული პირები ყაჩაღობის, პოლიციელზე თავდასხმის, ცეცხლსასროლი იარაღის მართლსაწინააღმდეგო შეძენა-შენახვა-ტარებისა და თავისუფლების უკანონო აღკვეთის ბრალდებით დააკავეს. აღნიშნული საქმის პროკურორის ინფორმაციით, ბანკიდან წაღებულია დაახლოებით 8 100 ევრო, 13 000 დოლარი და 10 000 ლარი.