რუს მღვდელს ეკლესიაში აღარ უშვებენ, რადგან მისი ცოლი "მის სექსუალურობა" გახდა

რუს მღვდელს ეკლესიაში აღარ უშვებენ, მიზეზი კი სილამაზის კონკურსში მისი ცოლის გამარჯვება გახდა, ინფორმაციას „დეილი მეილი“ ავრცელებს.

32 წლის ოქსანა ზოტოვა კრიტიკის ქარცეცხლში გაატარეს და არაერთი მუქარაც მიიღო, რაც მაგნიტოგორსკში გამართულ კონკურსში „მის სექსუალურობა“ გაიმარჯვა. ოქსანას ქმარს, სერგეი ზოტოვს სოფლის მართლმადიდებლურ ეკლესიაში შესვლა აუკრძალეს.

31 წლის მღვდელს განუცხადეს, რომ ტაძარში შესვლის ნებას მხოლოდ მაშინ მისცემენ, თუ მისი ცოლი „მოინანიებს“.

ზოტოვი ამბობს, რომ ცოლი „საკუთარ შეცდომას იაზრებს და იცის, რომ არასწორად მოიქცა“, თუმცა ოქსანას სილამაზის კონკურსში მონაწილეობა და გამარჯვება არ მოუნანიებია, ამის ნაცვლად კი ეკლესია გააკრიტიკა.

მღვდლის განცხადებით, მის ცოლს ემუქრებიან, შეურაცხყოფენ და ის აპირებს, პოლიციას მიმართოს.

ოქსანა ზოტოვას „მდიდრული ცხოვრებისთვის“, წითელი ტუჩების, ვარდისფერი კაბის, მაღალქუსლიანი ფეხსაცმლისა და „აიფონის“ გამო აკრიტიკებენ და ამბობენ, რომ მღვდლები და მათი ცოლები მოკრძალებულად უნდა ცხოვრობდნენ.

მამა თეოდორ საპრიკინი, რომელიც საეკლესიო სასამართლოს ხელმძღვანელობს, ადგილობრივ მედიასთან ამბობს, რომ მღვდლის ცოლის მსგავსი ქმედება ძალიან დიდი ცოდვაა.

„მამა სერგეი ზოტოვი არ დაბრუნდება ეკლესიაში, ვიდრე მისი ცოლი არ მოინანიებს. როგორი მღვდელია, თუ საკუთარი ოჯახის მართვა არ შეუძლია?“ - აცხადებს მამა თეოდორ საპრიკინი.

წყვილი 15 წელია, დაქორწინებულია. ოქსანამ სოციალური მედიის გვერდები გააუქმა, თუმცა მონანიების ნაცვლად „მის სექსუალურობის“ ტიტულზე განაცხადა : „დიახ, მივიღე მონაწილეობა, რა პრობლემაა?!“

მღვდლის ცოლი ადასტურებს, რომ კონკურსი დიდმარხვამდე გაგრძელდა, თუმცა მისივე განმარტებით, ფინალის თარიღი ბოლო წუთებში გადაწყდა.

„ძალიან ბევრი შრომა მქონდა ჩადებული. მივედი სახლში და ვკითხე ქმარს, როგორ მოვქცეულიყავი, მითხრა, რომ თავად უნდა გადამეწყვიტა. მეც მივიღე გადაწყვეტილება, მონაწილეობა მიმეღო,“ - ამბობს ოქსანა.

მისივე თქმით, ღრმად მორწმუნე ოჯახში გაიზარდა და ოქსანას ძმაც მღვდელია. ზოტოვა ამტკიცებს, რომ თამამად არასოდეს იცვამს, სწორედ ამიტომ გაუკვირდა ხალხს მისი ჩაცმულობა.