"როდემდე უნდა იყვნენ ღორები და მონები ჩვენი ქვეყნის საჭესთან?" - ჟურნალისტი გიორგი ზურაბიშვილი ახალ პოლიტიკურ მოძრაობას ქმნის

"რესპუბლიკური პარტიის" ერთ-ერთი ლიდერის, დავით ზურაბიშვილის ვაჟი, სპორტული ჟურნალისტი გიორგი ზურაბიშვილი პოლიტიკაში მოსვლას აპირებს. ამის შესახებ გიორგი ზურაბიშვილი "ფეისბუქის" პირად გვერდზე წერს:

"გუშინ ვუყურე ბიძინას და ისევ იგივე ტაქტიკა აქვს არჩეული - ცდილობს ყველაფერი ნაცებს დააბრალოს და ამის ხარჯზე შეინარჩუნოს ძალაუფლება. ასეთი მოცემულობა კატასტროფამდე მიიყვანს ჩვენს ქვეყანას. ეს ორი სამარცხვინო პოლიტიკური გაერთიანება ერთმანეთს ასაზრდოებს და აზიანებს ჩვენს ისედაც გაღატაკებულ სახელმწიფოს.

მაგრამ, მინდა დაგამშვიდოთ, რომ ძალიან მალე აღარ იდგება ეს გულის ამრევი პოლიტიკური დღის წესრიგი. უკვე ჩამოყალიბების პროცესშია ახალი სამოქალაქო/პოლიტიკური მოძრაობა, რომელიც ძირითადად ახალგაზრდა და მთლიანად სუფთა ადამიანებით იქნება დაკომპლექტებული! ჩვენ ვიქნებით არა მესამე, არამედ პირველი ძალა, რომელიც მთლიანად შეცვლის პოლიტიკურ კონიუქტურას ჩვენს ქვეყანაში! ძალიან მალე გაიგებთ თუ ვინ იქნება ამ მოძრაობაში და რა იქნება ჩვენი სამოქმედო გეგმა. თქვენი მხარდაჭერის იმედი მაქვს! ერთხელ და სამუდამოდ უნდა დასრულდეს ის მარაზმი, რაც ქართულ პოლიტიკაში ხდება! ყველამ უნდა გავაცნობიეროთ ჩვენი წილი პასუხისმგებლობა. უნდა შევცვალოთ დღევანდელი უმოქმედო ხელისუფლება, გამოვიდეთ შუა საუკუნეების ფეოდალიზმიდან და დავიწყოთ ძლიერი სახელმწიფო ინსტიტუტების მშენებლობა", - წერს ჟურნალისტი.გიორგი ზურაბიშვილი სოციალურ ქსელში პოლიტიკური სტატუსებით გამოირჩევა. სამოქალაქო მოძრაობის ჩამოყალიბებასთან დაკავშირებით "ფეისბუქში" იგი ცოტა ხნის წინაც წერდა:

"მართლა დავიღალე ქართული "პოლიტიკის" გვერდიდან ყურებით და ყოველ დღე ნერვების შლით. როდემდე უნდა გაგრძელდეს ასე? როდემდე უნდა იყოს პოლიტიკა უბინძურესი სფერო? რატომ არ უნდა უნდოდეთ ნორმალურ ადამიანებს თავიანთი ქვეყნის სადავეები აიღონ ხელში? როდემდე უნდა განაგებდენ ჩვენს დღის წესრიგს საბჭოთა მახინჯი აზროვნების ვადაგასული კომსომოლები? როდემდე უნდა იყვნენ ღორები და მონები ჩვენი ქვეყნის საჭესთან? როდემდე უნდა გაგრძელდეს ქვეყნის დოვლათის ძალაუფლებაში მყოფ ადამაიენბზე და მათ მონებზე გადანაწილება? გაჭირვებული ადამიანები როდემდე უნდა იხოცებოდენ შიმშილით, ანაც იმის გამო, რომ ელემენტარულად უსაფრთხოების პირობები არ არის დაცული? და საერთოდ როდემდე უნდა გაგრძელდეს ეს სამარხვინო რეალობა, შუა საუკენეების ფეოდალიზმი, რომელშიც ყოველ დღე ვიღვიძებთ? არ უნდა დასრულდეს არასდროს?

ერთი დიდი ჭაობია ჩვენი პოლიტიკური სპექტრი და როდემდე უნდა იყოს ასე? მართლა ასეთი წარმოუდგენელია, რომ პატიოსანი, წესიერი, განათლებული, საღად მოაზროვნე ადამიანების ჯგუფი შეიქმნას და მოვიდეს ხელისუფლებაში? მართლა ასეთი დაუჯერებელია ეს ამბავი? იმის გათვალისწინებით, თუ რა რეალობაც გვაქვს დღეს, არ უნდა ჩანდეს ეს ყველაფერი ასეთი წარმოუდგენელი. მთავარია მოტივაცია გაუჩნდეთ ნორმალურ ადამიანებს, რომ გააქტიურდენ, გვერდიდან აღარ შეხედონ პროცესს და იქნებ გვეშველოს რამე. ვფიქრობ, აუცილებლია შეიქმნას რამე სამოქალაქო მოძრაობა, რომელიც გააერთიანებს ბევრ ასეთ ადამიანს და რომელიც ძირითადად ახალგაზრდებით იქნება დაკომპლექტებული. არსებული ვითარებიდან გამომდინარე დაფინანსების მოძიებაც არ უნდა იყოს პრობლემა და დანარჩენი უკვე ტექნიკის საქმეა. მე პირადად მზად ვარ, რომ ჩავერთო ასეთ მოძრაობაში და იმის მზაობაც მაქვს, რომ ასეთი მოძრაობის ჩამოყალებიბისთვის დიდი შრომა გავწიო. პირველი ნაბიჯები არის ყველაზე რთული, რომ შეიკრას ნორმალური ხალხი. ვფიქრობ მალე დავიწყო ეს ამბავი, უბრალოდ საიდან დავიწყო ეგ არ ვიცი".