ყოფილი დეპუტატი "არგოს" აგებს და არგონავტების "გაცოცხლებას" აპირებს - "ძვირი ჯდება, დაახლოებით, 15-20 ათასი"

საქართველოს მერვე მოწვევის პარლამენტის დეპუტატი, ასოცირებული პროფესორი ომარ ნიშნიანიძე "არგონავტების გემს" აშენებს. ყოფილი პარლამენტარი ამბობს, რომ სურს ისტორიის გაცოცხლება და არგონავტების გზის გარკვეული მონაკვეთის გავლა თავის სტუდენტებთან ერთად. როგორც ომარ ნიშნიანიძე AMBEBI.GE-სთან საუბარში აღნიშნავს, ახალი „არგოს“ მისია ქუთაისის პოპულარიზაცია იქნება.

როგორ დაიბადა „არგოს“ იდეა და როდის იგეგმება პრეზენტაცია - ამ თემაზე ყოფილი დეპუტატი, პროფესორი და „არგოს“ იდეის ავტორი ომარ ნიშნიანიძე AMBEBI.GE-სთან ინტერვიუში თავად საუბრობს.

"ეს იდეა დიდი ხანია მაწუხებს, მე კი არა, ეს იდეა აწუხებდა ლევან სანიკიძეს, პროფესორ გურამ გაბუნიას - ის რომ ქუთაისში ყოფილიყო „არგონავტიკის“ მუზეუმი და მეტი დაფასება ჰქონოდა ამ თემას. ქუთაისის ისტორიას გვიანფეოდალური ხანიდან ვიცნობთ, მაშინ როცა მანამდელი ქუთაისი არის არაჩვეულებრივი მოვლენა ჩვენს ისტორიაში და მსოფლიოს 5 უძველეს ქალაქთა შორის არის დასახელებული, ამიტომ ძველი კოლხეთის, „აიეტის“, „მედეას“ თემა წამოსაწევია და მეტადაა გამოსაყენებელი.

მას შემდეგ, რაც „აიეტის“ ძეგლზე მოქანდაკე ზურაბ წერეთელს უარი ვუთხარით, სულ მქონდა იდეა, ჩემი ძალებით, მეგობრების დახმარებით „არგონავტიკის“ თემა განმეახლებინა, მითუმეტეს ისტორიის პროფესორი ვარ. ამიტომ, შარშან გადავწყვიტეთ და წელს სტუდენტების აქტიურობით წელს დავიწყეთ მუშაობა. ორგანიზება გავუკეთეთ, გეგმა შევადგინეთ. მით უმეტეს საიუბილეო წელია - ტიმ სევერინის მოგზაურობიდან 35 წელი სრულდება (ტიმ სევერინი - მსოფლიოში ცნობილი ბრიტანელი მკვლევარი, ისტორიკოსი და მწერალი, რომელმაც 1984 წელს თანამედროვე არგონავტებთან ერთად საბერძნეთის ქალაქ ვოლოსიდან, თურქეთის გავლით გვიანი ბრინჯაოს ხანის ხომალდის მოდელის მიხედვით შექმნილი 12-ნიჩბიანი ხომალდით კოლხეთისკენ იმოგზაურა).

- რამდენად რთული ამ გემის აგება და რა ხარჯებთანაა დაკავშირებული?

- ამ ქვეყანაში მარტივი არაფერია, ძვირი ჯდება. მეგობრები მეხმარებიან, მაგრამ მაინც რთულია. ჯერ პირველი ნაბიჯები გადავდგით, კერძო პირები მეხმარებიან. ზოგადად, ქუთაისში იდეას ენთუზიზმით შეხვდნენ, მაგრამ საქმე საქმეზე რომ მიდგა, უარი თქვეს. რამდენიმე პიროვნება მეხმარება. ვანელებმა უფრო გამოჩინეს ინიციატივა და ამიტომ გავრისკე. დაახლოებით, 15-20 ათასი ლარი დაჯდება უხეში გათლებით. ჩემთვის დიდი თანხაა, რადგან ბიზნესმენი არ ვარ, მაგრამ მაინც გავრისკე.

ეს ტურიზმისთვის ძალიან მნიშვნელოვნად მიმაჩნია, რადგან ქუთაისში ეკონომიკის განვითარება გვიჭირს. საქართველოში ორი ქალაქი ვითარდება მხოლოდ, ამიტომ ვთვლი, რომ ქუთაისს ეს თემა მაინც წამოწვეს. ეკონომიკის ერთ-ერთი სეგმენტი ხომ ტურიზმია. ვთვლი, ცნობადობა გაიზრდება. რუსეთმა წაიღო და გვართმევს „არგონავტიკის“ თემას, აქეთ თურქებს უნდათ და ჩვენ ვერ ვიყენებთ და ვერ ვაფასებთ?!

- რომელი უნივერსიტეტის სტდენტები არიან ჩართულნი და როგორ შეარჩიეთ ისინი?

- აკაკი წერეთლის სახელობის უნივერსიტეტში ვასწავლი ისტორიას და ისტორიის ფაკულტეტის სხვადასხვა კურსის სტუდენტები არიან ჩართულნი პროექტში. თავად ითხოვენ რომ ჩავრთოთ, დაინტერესება დიდია. ეს იქნება სახიერი შოუ, გაცოცხლდებიან გმირები, ამიტომ სტუდენტების შესარჩევად კონკურსიც გამოცხადდება. ვინც დაიმსახურებს, ვისაც უკეთ ეცოდინება ჩვენი ისტორია, ის წამოვა, ღირსეულები უნდა იყვნენ წარმოდგენილი!

- რა ვადებში დასრულდება "არგოს" მშენებლობა და როდის გეგმავთ პრეზენტაციას?

- რადგან ვანელებმა გამოიჩინეს ინიციატივა, ამიტომ 2 ივნისს, ვანელობის დღესასწაულს დავამთხვევთ. ტიმ სევერინმა ჭყვიშამდე მიიყვანა „არგო“, ვაპირებთ ჩვენც გალაკტიონის სახლ-მუზეუმამდე მივიყვანოთ და იქ მოვაწყოთ შეხვედრა "აიეტის", „მედეას“ და ა.შ.

გემი ფოთიდან გამოვა და მასზე სხვადასხვა გმირი იქნება - წარმოდგენილი გვექნება შოუ და ისტორია გაცოცხლდება. გემზე 12 ნიჩბოსანი იქნება, ჯამში, ალბათ 20 ადამიანი გავემგზავრებით, მათ შორის მეც, რადგან უმეთვალყურეოდ ვერ დავტოვებ.

- ვინ მუშაობს გემის კონსტრუქციაზე და რამდენად მიახლოებული იქნება ისტორიულ "არგოსთან"?

- ფოთში ვერ გარისკეს ამის გაკეთება. მე გავბედე - მხატვრები, კონსტრუქტორები მოვიწვიე და მათი დახმარებით ავაგეთ კონსტრუქცია. მათ შეადგინეს როგორი ფორმის და რა ზომის უნდა ყოფილიყო. აწყობილი კონსტრუქცია რამდენიმე დღის წინ ჩავიტანეთ ფოთში. იქ აიგება და მომზადდება საბოლოოდ. მიახლოებული იქნება ისტორიულ „არგოსთან“. მარტო ხის კონსტრუქცია ვერ გავრისკეთ, რადგან ჩვენ არ ვართ გამოცდილი გემთმშენებლები და რკინა გამოვიყნებეთ, თუმცა რკინა არ გამოჩნდება.

- რა ბედი ელის შემდგომ „არგოს“ და არის თუ არა ეს იდეა „ქუთაისის პორტის“ გახმაურებულ იდეასთან კავშირში?

- ქუთაისში ვერ ვხსნით პორტს, მაგრამ ვანში გავხსნით, ეს ხუმრობით... მე არასოდეს მითქვამს, რომ ქუთაისში უნდა იყოს პორტი, მე გავიხსენე ისტორია, სადაც საუბარი იყო პორტზე ვარციხეში, ქუთაისთან ახლოს იგეგმებოდა მშენებლობა, მაგრამ მერე სხვა პორტების მშენებლობა დაიწყო და გადაიფარა ეს თემა. მე წაკითხული მქონდა და გავიხსენე, ვინც არ იცოდა, შავი პიარი ააგორეს, თუმცა ჩემი ცნობადობა გაზარდეს.

ჩემი იდეა მხოლოდ „არგო“ არაა, ვგეგმავთ ამ თემაზე მუზეუმი მოვაწყოთ. ვმუშაობ „არგონავტიკის“ მუზეუმზე, ვაგროვებთ ექსპონატებს, რომ დამთავრდება ცერემონია გემი მუზეუმთან დაიდგმება და სრულად იქნება ეს თემა წარმოდგენილი.