"ისლამური სახელმწიფოს მაჭანკალი" ბანაკში იპოვეს - "საზოგადოებისთვის საშიში არ ვარ, ნორმალური ცხოვრება მსურს"

ჯიჰადისტი ქალი, რომელიც ცნობილია, როგორც „ისლამური სახელმწიფოს მაჭანკალი“, ჩრდილოეთ სირიაში, ბანაკში აღმოაჩინეს. ინფორმაციას „დეილი მეილი“ ავრცელებს.

ტუბა გონდალი ახლა 25 წლისაა, მან ბრიტანეთი რამდენიმე წლის წინ დატოვა და საცხოვრებლად რაქაში წავიდა. ის ახლა უმ მუტანა ალ ბრიტანიას ფსევდონიმით 2 შვილთან ერთად აინ ისას ბანაკში გამოჩნდა.

წარმატებული ლონდონელი ბიზნესმენის ქალიშვილი ბოლო პერიოდში თავს ბაღუზში აფარებდა, ბოლო სოფელში, რომელსაც „ისლამური სახელმწიფო“ ფლობდა. ჟურნალისტებთან ამბობს, რომ სახლში დაბრუნება სურს.

„ბრიტანული საზოგადოება შეშინებულია, მაგრამ ჩვენზე აუცილებლად უნდა იმსჯელონ. მთელ ცხოვრებას ბანაკში ვერ გავატარებთ, ჩვენ არ ვართ საზოგადოებისთვის საშიში, მხოლოდ ნორმალური ცხოვრება გვსურს,“ - ამბობს ტუბა.

მისივე განცხადებით, ქალები და ბავშვები უდანაშაულო მსხვერპლია შექმნილ ვითარებაში.

„თუ მე არავისთვის არაფერი დამიშავებია, სირიაში არაფერი ჩამიდენია 4 წლის განმავლობაში, რა ზიანი უნდა მოვუტანო ბრიტანეთს?!“ - ამბობს გონდალი.

2016 წელს მედია მისი მასშტაბური მოწოდებების შესახებ წერდა - „მაჭანკალი“ ინტერნეტის საშუალებით პოულობდა გოგონებს, რომლებსაც „ჯიჰადის პატარძლებად“ სირიაში ეპატიჟებოდა. გოგონების უმეტესობა ძალიან ახალგაზრდა იყო.

გონდალი, რომელიც აღმოსავლეთ ლონდონში ცხოვრობდა და ლონდონის გოლდსმიტსის უნივერსიტეტში სწავლობდა, წარმატებული ბიზნესმენის უფროსი ქალიშვილია.

მისი ონლაინპროპაგანდა 2016 წელს შეწყდა. საინფორმაციო ცენტრის Rojava ცნობით, ლიბანელი ქმრის გარდაცვალების შემდეგ ის პაკისტანელ მებრძოლზე დაქორწინდა, რომელიც, ასევე მოკლეს.

ისლამურ სახელმწიფოზე მასშტაბური შეტევების შემდეგ ტუბამ ბაღუზი დატოვა, ის თურქეთის საზღვართან დააკავეს და ლტოლვილთა თავშესაფარში გადაიყვანეს.