"მგლოვიარე ხალხი შეურაცხყოფილი ვართ" - გარდაცვლილი მელანო ფუტკარაძის ნათესავების აქცია ბათუმის რეფერალურ საავადმყოფოსთან

ბათუმში გარდაცვლილი 29 წლის მელანო ფუტკარაძის ნათესავები რეფერალურ საავადმყოფოსთან აქციას მართავენ. როგორც გარდაცვლილი გოგონას ბიძამ ნოდარ ქათამაძემ ჟურნალისტებს განუცხადა, ექიმების მიერ გამართულ სოლიდარობის აქციას აპროტესტებენ, რომლებმაც ექიმ ეკა ფუტკარაძეს მხარდაჭერა გამოუცხადეს.

გარდაცვლილი გოგონას ახლობლები ამბობენ, რომ ექიმების აქციით ისინი შეურაცხყოფილად გრძნობენ თავს და შესაბამის უწყებებს ფაქტის დროულ გამოძიებისკენ მოუწოდებენ.

"დღეს მდუმარე აქცია გვაქვს. გუშინ ექიმებმა გამართეს აქცია. როგორ არ ცხვენიათ! ბრმანაწლავით 21 -ე საუკუნეში ადამიანი არ უნდა კვდებოდეს. აქციებს გავაგრძელებთ. ველოდებით ექსპერტიზის პასუხს. დღეს მგლოვიარე ხალხი შეურაცხყოფილი ვართ, ექიმებმა თავი იმართლეს. უცოდინარი ექიმი თავს ვერასდროს გაიმართლებს", - განაცხადა მზევინარ ფუტკარაძემ.

ბათუმში, აბაშიძის ქუჩაზე სხვადასხვა კლინიკის ექიმები გუშინ შეიკრიბნენ და რეფერალური საავადმყოფოს ექიმს ეკა ფუტკარაძეს სოლიდარობა გამოუცხადეს, რომელმაც პროფესიული საქმიანობა ორი დღის წინ შეიჩერა. შეგახსენებთ, რომ 28 წლის მელანო ფუტკარაძემ ბათუმის რეფერალურ საავადმყოფოს რამდენიმე დღის წინ მუცლის მწვავე ტკივილით მიმართა. ოჯახის წევრების თქმით, გოგონა ექიმების რეკომენდაციით მეორე დღეს კლინიკიდან სახლში გაწერეს, სადაც მისი ჯანმრთელობის მდგომარეობა დამძიმდა. მელანო ფუტკარაძე მეორე დღეს კლინიკა "მედცენტრში" ოჯახის წევრებმა მიიყვანეს, სადაც გარდაიცვალა. ოჯახი რეფერალური საავადმყოფოს ექიმებს გულგრილობაში ადანაშაულებს.