მასწავლებელი უღარიბესი სოფლიდან, რომელიც ხელფასის 80%-ს მოსწავლეებისთვის ხარჯავს - ვინ არის პიტერ ტაბიჩი

მასწავლებლის გლობალური ჯილდოს მფლობელი კენიელი პიტერ ტაბიჩი გახდა.

36 წლის პედაგოგი სოფელ პვანის საშუალო სკოლაში ასწავლის. მოსწავლეები სხვადასხვა კულტურისა და რელიგიის წარმომადგენლები არიან.

ტაბიჩის სოფელი კენიის ღარიბ რეგიონში მდებარეობს, სადაც გვალვები და შიმშილი უცხო არავისთვის არის. მოსწავლეების 95% ღარიბი ოჯახებიდანაა, თითქმის მესამედი ობოლია, ან მხოლოდ ერთი მშობელი ჰყავს. ბავშვების უმეტესობას სახლში საჭმელი არ აქვს. სოფელში წამალდამოკიდებულება, მოზარდების ორსულობა და სუიციდი ჩვეულებრივი მოვლენებია.

სკოლაში მხოლოდ 1 კომპიუტერია და ძალიან დაბალი ხარისხის ინტერნეტი. 58 მოსწავლეზე აქ 1 მასწავლებელი მოდის, რაც პედაგოგების მუშაობას ძალიან ართულებს. სკოლაში რომ მივიდნენ, მოსწავლეებს 7 კმ-ს ფეხით გავლა უხდებათ, წვიმიან ამინდში კი გზა გაუვალი ხდება.

პიტერმა სკოლაში მეცნიერების კლუბი დააარსა, ის მოსწავლეებს ეხმარება კვლევითი პროექტის განხორციელებაში და მისი მოსწავლეების 60% ეროვნულ შეჯიბრებებში მონაწილეობს. მისი ხელმძღვანელობით გასულ წელს კენიის სამეცნიერო-ტექნიკურ ბაზრობაზე მოსწავლეებმა მათ მიერ შექმნილი მოწყობილობა წარადგინეს, რომლის საშუალებითაც სმენა და მხედველობადაქვეითებულ ადამიანებს საგნების გაზომვის საშუალება ეძლევათ.

ამასთან, პიტერი და მისი ოთხი კოლეგა დაბალი მოსწრების მოსწავლეებს სკოლის გაკვეთილების გარდა დამატებითაც ამზადებენ. პიტერი უქმე დღეებში თავად დადის მოსწავლეების სახლებში, რათა მათი მშობლები გაიცნოს და პრობლემების შესახებ ჰქონდეს ინფორმაცია.

ტაბიჩი მუდმივად ზრუნავს მოსწავლეების თვითშეფასების ამაღლებაზეც. სკოლაში მოსწავლეების რაოდენობა გაორმაგდა, დისციპლინური დარღვევების შემთხვევები კი შემცირდა.

კენიელი მასწავლებელი პრესტიჟულ ტიტულთან ერთად 1 მლნ დოლარს მიიღებს.