ორი თვის წინ დაკარგული 23 წლის შოთა სამხარაძე გარდაცვლილი იპოვეს

23 წლის შოთა სამხარაძე, რომელსაც ოჯახის წევრები და მეგობრები, 14 იანვრის შემდეგ ეძებდნენ, გარდაცვლილი იპოვეს. ამის შესახებ AMBEBI.GE-ს სამხარაძის მეგობარმა განუცხადა. მისი ინფორმაციით, იგი გარდაცვლილი გუშინ კურორტ შოვთან ახლოს, ტყეში ნახეს. 23 წლის ბიჭის ახლობლები თვითმკვლელობის ვერსიას გამორიცხავენ.

როგორც Ambebi.ge-ს შსს-ს პრესსამსახურში განუცხადეს, მომხდარზე გამოძიება სსკ-ის 115-ე მუხლით მიმდინარეობს, რაც თვითმკვლელობამდე მიყვანას გულისხმობს. გარდაცვალების მიზეზს ექსპერტიზა დაადგენს.

ახალგაზრდა მამაკაცი ონის მუნიციპალიტეტში ორი თვის წინ დაიკარგა. სამაშველო სამსახურში შეტყობინება 14 იანვარს შევიდა. თვითმხილველების თქმით, ბიჭი ბოლოს სასტუმროების მიმდებარე ტერიტორიაზე გამართულ თოვლის ფესტივალზე ნახეს, მოგვიანებით ტერიტორია დატოვა და მას შემდეგ აღარ გამოჩენილა.