10
ივნისიდღის ზოგადი ასტროლოგიური პროგნოზი
მშრალი ჰაერი, მინუს ტემპერატურა, ქარი - ეს ყველაფერი კანის მდგომარეობას ცვლის. ცხიმიანი და ნორმალური კანი შრება, მშრალი კი უფრო მგრძნობიარე ხდება. როგორ უნდა მოვამზადოთ კანი გაზაფხულისთვის, სეზონისთვის, რომელსაც ყოველთვის თან ახლავს ალერგია და სხვა სახის ვიზუალური გამოხატულებები... როგორ უნდა მოვიქცეთ, რომ კანი გადაღლილი, უფერული და გაცრეცილი არ იყოს, ამის შესახებ ექიმი-კოსმეტოლოგი თინა რევაზიშვილი გვესაუბრება:
- ხშირად კანი სიცივეში ჭრელდება, ღიზიანდება და აქვს წვრილი ან სულაც მკაფიოდ გამოხატული გამონაყარი. როგორ უნდა მოვუაროთ კანს, რომ მსგავსი უსიამოვნებები თავიდან ავიცილოთ?
- მთელი ზამთრის განმავლობაში კანი ბინძურდება, გამომშრალია, აკლია კოლაგენები, ამისთვის პირველ რიგში, ვაკეთებ ფრაქციულ მეზოთერაპიას, ვწმენდთ სახეს მსუბუქად, ვაკეთებთ დემაკიაჟს და პილინგს, რომ ფორები გაიხსნას და შევიყვანოთ კოქტეილები, რომელმაც კანის კოლაგენები უნდა აამოძრაოს. ეს ასევე მისწრებაა აკნე-გამონაყარზე. ეს კეთდება 10-15 დღეში ერთხელ და ძალიან კარგია გამომშრალი კანისთვის.
- ბოლო დროს კოსმეტოლოგები არ აღიარებენ ე.წ. კოვზით გაწმენდას...
- მე არ ვეთანხმები იმ კატეგორიას, ვისაც მიაჩნია, რომ კოვზით სახით გაწმენდა არ არის სასარგებლო, ჩემი გამოცდილებით გეტყვით, რომ კოვზი, ელექტრონულ აპარატებთან შედარებით, კანში ჩამჯდარ შავ წერტილებს და ცხიმებს სიღრმისეულად ასუფთავებს... შემდეგ დეზინფექციისთვის, ვაკეთებთ ეზუმატის პილინგს, ანუ კანი სპეციალური ხსნარით უნდა გაიწმინდოს, რომელიც კანს ოდნავ დასუსხავს, მაგრამ რამდენიმე წუთში გადაუვლის... სახის ასეთი პროცედურები ძალიან საჭიროა, რადგან ახლა კანი გამომშრალია. ზოგადად, კანის პრობლემებიდან ყველაზე გავრცელებულია - გამომშრალი კანი, ლაქები, აჭრელებული კანი, პოსტაკნე... ასეთ კანს მჟავებით გაწმენდა და შესაბამისი ვიტამინებით დატენიანება სჭირდება.
ახალს არაფერს ვამბობ ალბათ, მაგრამ ქალბატონებს მინდა კიდევ ერთხელ ვურჩიო, რომ თქვენი ცხოვრების წესი აისახება თქვენს კანსა და ფიგურაზე. აუცილებელია კვების სწორი რეჟიმი, დღის განმავლობაში უნდა მიიღოთ 2-ლიტრამდე წყალი, მოწესრიგებული ძილი არის მთავარი წინაპირობა, რომ კარგად გამოყურებოდეთ. 8 საათი მაინც უნდა გეძინოთ, რომ არ გამოიფიტოთ.
- ალბათ იცით კანისთვის "დამხმარე საშუალებებიც..."
- დიახ, ალოე ვერას ფოთლები კარგად უნდა გარეცხოთ, გამოაშროთ და 3-4 დღე სიბნელეში დატოვოთ. შემდეგ კი, საკეპ მანქანაში გაატაროთ, ფაფისებრი სიცხე სუფთად გადაწურეთ, წვენში გაურიეთ იმდენივე რაონოდების თაფლი და დღეში სამჯერ, ჭამის წინ 30 წუთით ადრე, ჩაის კოვზით მიიღეთ.. რაც შეეხება დარჩენილ მასას, ყინულის კუბიკებში ჩადეთ, გაყინეთ და ყოველ ღამე, ძილის წინ ამ "ალოეს კუბიკებით" სახე დაიმუშავეთ... ამ პატარა ეშმაკობის შემდეგ, სახე თანდათან გამოცოცხლდება, დატენიანდება და ერთ ფერზე "დაჯდება".
სხვათა შორის, ბოლო დროს კანის მოვლაზე ზრუნვა დაიწყეს მამაკაცებმაც, როგორც ახალგაზრდა ბიჭებმა, ასევე, ასაკოვნებმაც... ასევე ძალიან მახარებს ასაკოვანი ქალბატონების გააქტიურებაც, რომლებიც ცდილობენ მოვლილი კანი ჰქონდეთ. წლების წინ ეს ასე არ იყო... დროს ჩვენ ვერ შევაჩერებთ, მაგრამ რაღაც დონეზე შენელება შეგვიძლია.
- ბოლო დროს ძალიან ტრენდულია ტონალური კრემები, დეკორატიული კოსმეტიკა, რომელიც კანის ფერს ერთ თანაბარ ფერში "აჯენს". რამდენად საზიანოა მისი ხშირი მოხმარება კანისთვის?
- ვიდრე ტონალურზე გადავალთ, აუცილებლად უნდა ვთქვა, რომ მაკიაჟის ფუნჯების, სახის პირსახოცისა და თუნდაც ბალიშისპირის ჰიგიენაზე, რომელიც ასევე ძალიან მნიშვნელოვანია კანისთვის. ყველა მათგანი არის ბაქტერიების გავრცელების საფრთხე, რომელიც უყურადღებობის შემთხვევაში, კანს გაგიფუჭებთ. რაც შეეხება ტონალურს, მათი მუდმივი ხმარება არ არის კარგი, ასევე აუცილებელია ძილის წინ მისი სახიდან მოშორება. ტონალურით დაძინება არაფრით არ შეიძლება.
