ყველაზე ახალგაზრდა ქალი პრემიერი, რომელიც "პოლიტიკოსის სტანდარტებს ცვლის" - ჯასინდა არდერნმა მსოფლიო აღაფრთოვანა

ახალი ზელანდიის პრემიერ-მინისტრი ქვეყანაში მომხდარი ტერაქტების პარალელურად მსოფლიოს ყურადღების ცენტრში კიდევ ერთხელ მოექცა. კრიტიკოსები მიიჩნევდნენ, რომ ჯასინდა არდერნი საკუთარი „ვარსკვლავობით“ იყო მოხიბლული, ახლა კი ბევრი ექსპერტი აღნიშნავს, რომ ქვეყანაში შექმნილი მძიმე ვითარების დროს პრემიერ-მინისტრმა შეძლო, ლიდერისთვის საჭირო ყველა უნარი გამოევლინა.

ტერაქტიდან მალევე მისმა ხელისუფლებამ მიიღო იარაღის კანონის გამკაცრების გადაწყვეტილება, არდერნი საზოგადოებას დაპირდა, რომ კანონში ცვლილებებს 10 დღის განმავლობაში მიიღებენ. ახალ ზელანდიაში მცხოვრები ემიგრანტების მიმართ კი თანადგომა არაერთხელ გამოხატა. პრემიერ-მინისტრის განცხადებით, მიგრანტები ახალი ზელანდიელი ხალხის ნაწილია, ქვეყანა კი მათი სამშობლოა.

სხვადასხვა მედიასაშუალება წერს, რომ ტერაქტის შემდეგ პრემიერ-მინისტრს აშშ-ს პრეზიდენტმა დაურეკა. დონალდ ტრამპის კითხვაზე, რითი შეეძლო ამერიკას ახალ ზელანდიას დახმარებოდა, არდენმა უპასუხა „ყველა მუსულმანის მიმართ სიყვარულითა და სიმპათიით“.

„არდერნის რეაქცია და გადაწყვეტილებები არაჩვეულებრივია და მჯერა, რომ მას მოიწონებენ როგორც ქვეყანაში, ასევე - საერთაშორისო ასპარეზზე,“ - ამბობს ველინგტონის ვიქტორიას უნივერსიტეტის პოლიტიკის ანალიტიკოსი ბრაის ედვარდსი.

ექსპერტების შეფასებით, ჯასინდა პოლიტიკოსებისთვის ახალ სტანდარტებს ამკვიდრებს.

ბევრისთვის სამაგალითო აღმოჩნდა პრემიერ-მინისტრის მიერ გამოხატული სოლიდარობაც - ტერაქტის მეორე დღეს ჯასინდა არდერნი გარდაცვლილთა ოჯახებთან ჰიჯაბით მივიდა. ატირებულმა პრემიერ-მინისტრმა მთელი ერის სახელით მათ თანადგომა გამოუცხადა.

საზარელი ტერაქტი ახალი ზელანდიის ქალაქ ქრაისთჩერჩში მდებარე ალ ნურის მეჩეთში პარასკევის ლოცვის დროს მოხდა, შენობაში შეიარაღებული მამაკაცი შევარდა და მლოცველებს ცეცხლი გაუხსნა. თავდასხმის შედეგად 50 ადამიანი დაიღუპა, კიდევ ათეულობით მლოცველი დაშავდა. თავდასხმის დროს ერთ მეჩეთში 200-მდე, ხოლო მეორეში 300-მდე ადამიანი იმყოფებოდა.

38 წლის ასაკში არდერნი მსოფლიოს ყველაზე ახალგაზრდა ქალი ლიდერია. ის არ არის დაქორწინებული, თუმცა პარტნიორისგან ერთი შვილი ჰყავს - პრემიერ-მინისტრის სავარძლის დაკავებამდე რამდენიმე დღით ადრე შეიტყო, რომ ორსულად იყო. 2018 წლის 21 ივნისს ის გახდა მსოფლიოს ისტორიაში მეორე ლიდერი, რომელმაც თანამდებობაზე ყოფნის დროს იმშობიარა.

ნახეთ, ასევე : პირველი ბავშვი გაეროში - ახალი ზელანდიის პრემიერ-მინისტრმა სხდომაზე 3 თვის ბავშვი მიიყვანა