"ნუგზარ ბაგრატიონ-გრუზინსკი სინამდვილეში სიხარულიძეა" - რაზე საუბრობენ სამეფო ოჯახის წარმომადგენლების ადვოკატები

ნუგზარ ბაგრატიონი არ არის ბაგრატიონი, ის არის სიხარულიძე და გვარს იბრალებს, - ამის შესახებ დავით ბაგრატიონ-მუხრანელის ადვოკატმა ლევან ჩხაიძემ ჟურნალისტებს განუცხადა. ადვოკატის თქმით, არსებული ინფორმაციით, საქართველოს საპატრიარქომ ანა ბაგრატიონ-გრუზინსკის ოჯახზე დნმ კვლევა ჩაატარა, რითაც დაადგინა, რომ ანა ბაგრატიონ-გრუზინსკის მამა ნუგზარ ბაგრატიონ-გრუზინსკი ბაგრატიონი არ არის და სინამდვილეში სიხარულიძეა.

"ოფიციალური მონაცემები ჩემთვის არ მოუციათ, მაგრამ ჩემთვის ცნობილია და სანდო წყაროთი ვიცი, რომ საპატრიარქომ ჩაატარა დნმ კვლევა და ნუგზარ ბაგრატიონი არ არის ბაგრატიონი. ის არის სიხარულიძე და იბრალებს გვარს. ეს ინფორმაცია ჩვენ გვაქვს. აი, ახლა წავიდნენ და მიჩივლონ. თუ არ არის სიხარულიძე მომიტანოს დნმ-ის ანალიზის დასკვნა", - განაცხადა ადვოკატმა ლევან ჩხაიძემ.

მან ისაუბრა გამოცემა "დეილი მეილთან" დაკავშირებითაც აღნიშნა, რომ ანა ბაგრატიონ-გრუზინსკის ოჯახმა ამ გამოცემას დავით ბაგრატიონ-მუხრანელის სახელის შელახვის მიზნით დეზინფორმაციის გამოქვეყნება შეუკვეთა.

ადვოკატის თქმით, სიმართლეს არ შეესაბამება გამოცემაში გამოქვეყნებული ინფორმაცია, რომლის თანახმადაც, დავით ბაგრატიონ-მუხრანელმა 3000 ფუნტის სანაცვლოდ გამოცემის ჟურნალისტს ბაგრატიონთა ჯილდოს გადაცემა შესთავაზა.

„რაც შეეხება „დეილი მეილს", მინდა საზოგადოებას და ჟურნალისტებსაც მოგიწოდოთ ინფორმაცია, რომ როცა "დეილი მეილს" იყენებთ წყაროდ, უნდა ვნახოთ რა გაზეთთან გვაქვს საქმე. ეს არის უკიდურესად მარგინალური და არასანდო გაზეთი. ეს გაზეთი თანამშრომლობს გრუზინსკებთან და ეს იყო გრუზინსკების მიერ შეკვეთილი სტატია, რათა დავით ბაგრატიონ-მუხრანელისთვის ჩრდილი მიეყენებინათ", - განაცხადა ლევან ჩხაიძემ.

თბილისი საქალაქო სასამართლოში სამეფო ოჯახის დავით ბაგრატიონ-მუხრანელისა და ანა ბაგრატიონ-გრუზინსკის საქმეზე პროცესი მიმდინარეობს.

ლევან ჩხაიძე აცხადებს, რომ ანა ბაგრატიონ-გრუზინსკი ყოფილი მეუღლის წინააღმდეგ დაწყებულ სასამართლო დავას ვერ მოიგებს.

„დავის დაწყების მიზანი ის არის, რომ არანაირი ლეგიტიმაცია არ გააჩნია ანა ბაგრატიონ-გრუზინსკის ოჯახს, რომ ისინი არიან ბაგრატიონები. სასამართლოს გზით ცდილობენ მიიღონ სახელმწიფოსგან აღიარება. მათი პოზიცია ძალიან სუსტია. ჩვენ, რა თქმა უნდა, განწყობილი ვართ ოპტიმისტურად და ამ პროცესს მოვიგებთ", - განაცხადა ადვოკატმა ლევან ჩხაიძემ სასამართლო სხდომის დაწყებამდე.

როგორც ცნობილია, ანა ბაგრატიონ-გრუზინსკი ყოფილ მეუღლეს, დავით ბაგრატიონ-მუხრანელს ადანაშაულებს და აცხადებს, რომ ყოფილი მეუღლე სამეფო ოჯახის სახელს ბოროტად იყენებს და ჯილდოებს ბაგრატიონების სახელით უკანონოდ არიგებს.

როგორც სხდომის დაწყებამდე ანა ბაგრატიონ-გრუზინსკის ადვოკატმა ლევან გორელაშვილმა ჟურნალისტებს განუცხადა, მსგავსი არაკეთილსინდისიერი ქმედება დავით ბაგრატიონ-მუხრანელმა გამოავლინა 2017 წელს, როდესაც „დეილი მეილის" ჟურნალისტმა სამეფო ჯილდოს გადაცემის სანაცვლოდ მას 3000 ფუნტი შესთავაზა, რასაც დავით ბაგრატიონი დათანხმდა. ადვოკატის თქმით, გამოცემის ეს სტატია საქმეში მტკიცებულებად დევს.

ადვოკატის თქმით, სასამართლო დავის დაწყებით, ანა ბაგრატიონ-გრუზინსკის ოჯახის მოთხოვნის საგანი არის ის, რომ დავით ბაგრატიონ-მუხრანელს აეკრძალოს საქართველოს სამეფო სახლის სახელის გამოყენება მესამე პირებთან ურთიერთობაში.

„დღეის მდგომარეობით, მტკიცებულებების სახით გვაქვს პრესაში გავრცელებული ის ინფორმაცია, რომლითაც „დეილი მეილის" ჟურნალისტის მხრიდან ჩატარდა ჟურნალისტური ექსპერიმენტი, როდესაც სატელეფონო შეთავაზებისას დავით ბაგრატიონ-მუხრანელი კონკრეტული თანხის სანაცვლოდ დათანხმდა ამ ორდენის გადაცემას. ეს არის ერთული შემთხვევა, რომელიც გამოვლინდა, თუმცა ჩვენთვის ცნობილია სხვა შემთხვევების შესახებაც, როდესაც აღნიშნულს ადგილი ჰქონდა დავით ბაგრატიონ-მუხრანელის მხრიდან. ამ საქმეში ეს არის ძალიან ვიწრო ნაწილი. იგი თავის თავს უწოდებს საქართველოს სამეფო სახლის მეთაურს. მას აღნიშნული ინფორმაცია თავის საიტზე აქვს მითითებული და ეს არის ის ძირითადი საკითხი, რასაც ჩვენ ვეწინააღმდეგებით. ჩვენი მიზანია ის, რომ მომავალში არ მოხდეს მსგავი რამ. ამისთვის ვიბრძვით“, - განაცხადა ადვოკატმა.