"თავს გადასარევად გრძნობს, მეუღლესთან ერთად მაისში ჩამოვა" - რას ამბობს ქეთი მელუას ბიძა გავრცელებულ ინფორმაციაზე

მსოფლიოს ქართველი მეგავარსკვლავის ქეთი მელუას შესახებ როგორც ინგლისურ, ისე ქართულ მედიაში ვრცელდება ინფორმაცია, თითქოს იგი დიდი ხანია პარანოიით იტანჯება და მეუღლესაც კარგა ხანია გაშორდა. ამ ინფორმაციის გადასამოწმებლად მომღერლის ბიძას არჩილ მელუას დავუკავშირდით:

- დაახლოებით სამი კვირის წინ ქეთის კონცერტი ჰქონდა და თავს გადასარევად გრძნობს. ახლახან სახლის რემონტი დაასრულეს, ჩემს ოჯახს ელოდებიან სტუმრად ლონდონში და ამისთვის განსაუთრებულად ემზადებიან. ტყუპი ვაჟები მყავს, რომლებზეც ქეთი გიჟდება და მათ სულ საჩუქრებით ანებივრებს. მესმის, რომ თბილისში ღონისძიებებზე ზოგჯერ მარტო ჩამოდის, მაგრამ ეს იმას არ ნიშნავს, რომ მეუღლეს გაშორდა. პირიქით, ერთმანეთზე გიჟდებიან და არ მესმის ამ ჭორის რა საფუძველი არსებობს?! ერთადერთი რაც ვიცი, ჩხუბი მოუვიდათ, კედელზე რომელი სურათი ჩამოეკიდათ. ქეთის სხვა სურდა, მეუღლეს - სხვა და ეგ იყო მათი უკმაყოფილების მაქსიმუმი... როდესაც ადამიანი ცნობილი ისე ხდება, რომ მის ირგვლივ არანაირი სკანდალი არ არის, მერე ალბათ რაღაც უნდა მოიგონონ.

- ანუ სრულიად გამორიცხავთ ორივე ინფორმაციას?

- რასაკვირველია, რაც არ არის, აბა როგორ დავადასტურებ?! ჯეიმსს თავისი ბიზნესი, თავის საქმე აქვს და ღონისძიებაზე თუ ქეთი თბილისში მარტო ჩამოდის, არ ნიშნავს, იძახონ, ქმარი მოუკვდა, ან გაშორდაო! ლონდონში სტუდიის დაქირავება ძალიან ძვირი ღირს და სათანადო მიხედვა სჭირდება! საქართველოში რომ ვაცდენთ სამსახურს, როცა მოგვინდება, ლონდონში ასე არ არის! სახლი დაასრულეს, ქეთის დედა ამბობდა, ბოლო სავარძელი შევიტანეთო და ძალიან გახარებული არიან. ქეთის ძალიან უყვარს ეზოიანი სახლი და სურდა, როგორც თბილისში გვაქვს, ლონდონშიც ყველაფერი ისეთ სტილში მოეწყო. რაც შეეხება პარანოიას, ადამიანს მართლა პარანოია უნდა ჭირდეს, რომ მივიდეს და ამის შესახებ ინტერვიუ პრესას მისცეს. ქეთის თუ ჯანმრთელობის პრობლემა აქვს, დაუყოვნებლივ მამამისს ეუბნება, რომელიც ძალიან გამოცდილი ექიმია! ქეთი პასუხისმგებლობით სავსე გოგოა, ამდენს მუშაობს და რომელი პარანოიის მქონე შეძლებს ამდენს?! ერთადერთი ადრე მახსოვს, ევროტურის დროს ცუდად იგრძნო თავი, პანიკური შეტევები ჰქონდა, რადგან ჯერ სულ ოცი წლის იყო, უზარმაზარი საპასუხისმგებლო გამოსვლები ჰქონდა... იმდენად გადატვირთული გრაფიკი აქვს, ერთხელ ვკითხე, ახლა რომელ ქალაქში იმყოფები კონცერტით-მეთქი და არ ახსოვდა, სასტუმროს ჟურნალში ნახა და მიპასუხა, რომ პარიზში იყო.

ახლაც იმდენი გეგმები აქვს, ამბობს, აღარ ვიცი რომელ ერთს დავუთმო დროო. 24 მარტს პოლონეთში კონცერტი ექნება. საქართველოში მაისში მეუღლესთან ერთად ჩამოვა და მაშინ რაღას იტყვიან?! დედაჩემის წლისთავია მაისში და ქეთი ძალიან ტრადიციული გოგოა, ოჯახური ტრადიციები უმნიშვნელოვანესია მისთვის! მისი მეუღლე მხოლოდ ქეთისთან კი არა, მთელ ჩვენს სანათესაოსთან შეხმატკბილებულია. ამას წინათ ჩემს ბაიკერ მეგობარს თბილისში ბაიკერის ქურთუკის შოვნა გაუჭირდა და როგორც კი ჯეიმსს ვუთხარი, ეგ რა პრობლემააო, ლონდონიდან გამოგვიგზავნა.