"საძინებელში საქორწინო ცერემონიაც კი დადგა და ბეჭედი გამიკეთა" - ძალადობდა თუ არა მაიკლ ჯექსონი ბავშვებზე?

მაიკლ ჯექსონის გარდაცვალებიდან 10 წლის შემდეგ სატელევიზიო ქსელმა HBO პოპმუსიკის მეფეზე დოკუმენტური ფილმი გადაიღო, რომელმაც მსოფლიო მასშტაბით დიდი აჟიოტაჟი გამოიწვია.

ფილმი Leaving Neverland („წასვლა „ნევერლენდიდან“) უეიდ რობსონისა და ჯეიმს სეიფჩაკის ისტორიებზეა აგებული, მათ პოპვარსკვლავი ბავშვობის ასაკში გაიცნეს და ამტკიცებენ, რომ ჯექსონმა მათზე სექსუალურად რამდენჯერმე იძალადა.

4 საათიანი დოკუმენტური ფილმი დენ რიდმა გადაიღო და პრემიერა გასულ თვეს შედგა.

ჟურნალი People ფილმიდან 5 ყველაზე სკანდალური ფაქტის შესახებ წერს.

1. სექსუალური ძალადობა ბავშვებზე მცირე ასაკიდან დაიწყო

40 წლის სეიფჩაკი ამბობს, რომ ჯექსონი 1986 წელს, „პეპსის“ რეკლამის გადაღებისას გაიცნო. მისი მტკიცებით, პოპმომღერალმა ბიჭი და მისი ოჯახი მუსიკალური ტურნეს დროს თან წაიყვანა, სადაც მათმა ურთიერთობამ სექსუალური კავშირის სახე მიიღო. სეიფჩაკის მტკიცებით, ჯექსონი მას მასტურბირებას ასწავლიდა.

რობსონი, რომელიც ახლა 36 წლისაა, ფილმში ჰყვება, რომ პოპმომღერალი 5 წლისამ გაიცნო, როდესაც ცეკვის კონკურსში მონაწილეობდა. ჯილდოდ სამშობლოში, ავსტრალიაში მაიკლ ჯექსონის კონცერტზე მასთან შეხვედრა მიიღო.

როდესაც 8 წლის გახდა, ლოს-ანჯელესში დასვენების დროს ოჯახი ჯექსონს კვლავ შეხვდა. რობსონი ამტკიცებს, რომ ჯექსონმა სთხოვა ოჯახს, ბავშვი მასთან დარჩენილიყო. მშობლები კი სამოგზაუროდ წავიდნენ.

სწორედ ამ დროს, რობსონის მტკიცებით, მომღერალს მასთან ორალური სექსი ჰქონდა, შემდეგ კი უთხრა, რომ მათი შეხვედრა "ღმერთის ნება იყო".

2. ჯექსონმა ბავშვთან „ქორწინება დადგა“

სეიფჩაკი ფილმში აცხადებს, რომ ჰქონდა ძვირფასი სამკაულით სავსე ყუთი, რომელიც მაიკლ ჯექსონმა აჩუქა. სამკაულს შორის იყო ოქროს ბეჭედიც.

„თითქოს დაქორწინებული წყვილი ვიყავით, საძინებელში ქორწინების ცერემონიალიც კი დადგა,“ - ამბობს ჯეიმსი.

3. ჯექსონი სეიფჩაკს ასწავლიდა, როგორ უნდა მოეხერხებინა ურთიერთობის დამალვა

ჯეიმსის თქმით, როდესაც სასტუმროებში იყვნენ, მომღერალი ასწავლიდა, როგორ ჩაეცვა სამოსი და სწრაფად მოწესრიგებულიყო, თუ ვინმე კარზე დააკაკუნებდა.

„ყველაზე მნიშვნელოვანი იყო, არავის გამოვეჭირეთ. ეს ძალიან დიდი საიდუმლო იყო. მეუბნებოდა, რომ თუ ვინმე გვიპოვიდა, ჩვენი ცხოვრება დამთავრდებოდა“ - ამბობს სეიფჩაკი.

იმავეს აცხადებს რობსონიც :

„მითხრა, რომ თუ ვინმე შემოგვისწრებდა, დაგვაშორებდნენ და ერთმანეთს ვეღარასოდეს ვნახავდით, შემდეგ კი ორივეს დაგვიჭერდნენ.“

4. რობსონი ფიქრობდა, რომ მაკალეი კალკინმა ჩაანაცვლა

როდესაც რობსონის ოჯახი ავსტრალიიდან ლოს-ანჯელესში გადავიდა საცხოვრებლად, რათა ჯექსონთან უფრო ახლოს ყოფილიყვნენ, ის მიხვდა, რომ ოცნებები დამთავრდა, რადგან მისი ადგილი ფილმის „მარტო სახლში“ ვარსკვლავმა, მაკალეი კალკინმა დაიკავა. რობსონის თქმით, კლიპში Black or White, რომელიც 1991 წელს გამოვიდა, მას უნდა ეცეკვა, თუმცა არჩევანი კალკინზე შეაჩერეს.

„ეს ძალიან ძნელად გადასატანი აღმოჩნდა ჩემთვის. მაკალეიც იყო ხოლმე მოგზაურობების დროს იქ, სადაც მე, მაიკლ ჯექსონთან ერთად. თავი ჩამოშორებულად ვიგრძენი, მე მაიკლის მეგობარი და მისი ფავორიტი აღარ ვიყავი.

მაკალეის და მაიკლს ჰქონდათ ყველაფერი, რაც მე და ჯექსონს გვქონა მანამდე - ის კავშირი, საიდუმლო ამბები... ამისი ამოცნობა ჩემთვის ადვილი იყო. ვეჭვიანობდი, ძალიან მტკივნეულად განვიცდიდი,“ - ამბობს რობსონი.

თავად კალკინს კი არაერთხელ განუცხადებია მედიასთან, რომ მას მუსიკოსთან გულწრფელი მეგობრობა აკავშირებდა.

"ის ჩემი საუკეთესო მეგობარი იყო," - აცხადებს კალკინი და დღემდე ძალიან ახლო ურთიერთობას ინარჩუნებს ჯექსონის შვილთან, პერისთან, რომელიც მისი ნათლულია.

5. ჯეიმსის დედის მტკიცებით, მაიკლმა სთხოვა, ბიჭი 1 წლის განმავლობაში მასთან დაეტოვებინა

რობსონის დედა, ჯოი ფილმში ამბობს, რომ მუსიკოსმა სთხოვა, ავსტრალიაში გამგზავრების წინ შვილი ლოს-ანჯელესში, მასთან დაეტოვებინათ. როდესაც დედისგან უარი მიიღო, მაიკლმა უთხრა, რომ ბავშვის კარიერისთვის უამრავი რამის გაკეთება შეეძლო.

„ვუთხარი - ის ჩემი შვილია, 7 წლის და ვერ დავტოვებ შენთან-მეთქი. რამდენიმე საათის განმავლობაში გრძელდებოდა ჩვენი საუბარი, როდესაც მიხვდა, რომ ჩემი საბოლოო პასუხი უარი იყო, განმიცხადა, რომ ყოველთვის ყველაფერს იღებდა, რაც სურდა“.

ჯექსონის ძმებმა, ტიტომ, მარლონმა და ჯეკიმ მუსიკოსის წინააღმდეგ აგორებულ ტალღას აბსურდული უწოდეს. მათ ფილმი არ უნახავთ.

„არ მინდა ნახვა, არა იმიტომ, რომ ჩემი ძმა იყო. არ ვნახავ დოკუმენტურ ფილმს. მე ვიცნობდი მაიკლს, მე ყველაზე უფროსი ვარ ძმებს შორის, ვიცი, ის როგორ ცხოვრობდა. მისი მთავარი მიზანი იყო, მსოფლიო ერთად შეეკრა, ბავშვები გაებედნიერებინა, ასეთი ადამიანი იყო...“ - განაცხადა 67 წლის ჯეკიმ.

ჯექსონის 45 წლის ძმიშვილი, ტაჯი აცხადებს, რომ შესაძლოა, ბევრი ადამიანისთვის ბავშვებთან ერთად გამართული წვეულებები უცნაურად აღსაქმელი იყოს, თუმცა ჯექსონისთვის, მისი ოჯახისთვის და მეგობრებისთვის ყველაფერი ძალიან ბუნებრივად ხდებოდა. ტაჯის თქმით, მუსიკოსი ბავშვებთან ერთად უყურებდა ფილმებს, ერთობოდა მათთან ერთად და ყველაფერი ძალიან „უცოდველი“ და გულწრფელი იყო.

პოპ-მუსიკის ლეგენდა ბავშვებზე ძალადობაში არაერთხელ დაადანაშაულეს. 2005 წელს სასამართლო პროცესზე, სადაც მას 13 წლის ბიჭთან, გეივ არვიზოსთან სექსუალურ კავშირში ადანაშაულებდნენ, უეიდ რობსონი, რომელიც ფილმში მუსიკოსის მიერ მასზე განხორციელებულ ძალადობაზე საუბრობს, მაიკლ ჯექსონის დასაცავად წარდგა.

ჯექსონის ბრალი რამდენიმე ნაწილისგან შედგებოდა - ბავშვთან სექსუალური კავშირი, მისი ინტოქსიკაცია, სექსუალური ძალადობის მცდელობა, ბავშვისა და მისი ოჯახის საკუთარ სახლში დატყვევება და ბავშვის გატაცება.

განხილვა 18 თვის განმავლობაში გრძელდებოდა, სასამართლომ 140 მოწმე დაკითხა, ჩატარდა ექსპერტიზებიც და დადგინდა, რომ მუსიკოსი ყველა ბრალდებაში უდანაშაულო იყო.

ჯექსონის წინააღმდეგ იმავე ბრალდებით საქმე 1993 წელსაც აღიძრა, ჯონ ჩენდლერის მშობლები მუსიკოსს შვილზე ძალადობაში ადანაშაულებდნენ. თუმცა, დაცვის მხარის მტკიცებით, მშობლები ბავშვს აიძულებდნენ, ძალადობის შესახებ მათ მიერ მოგონილი ისტორია მოეყოლათ.

მაიკლ ჯექსონი 2009 წელს საკუთარ სახლში გარდაცვლილი იპოვეს. მას სამი შვილი ჰყავს, პრინც მაიკლი, პერიზი და ბლენკეტი.