"მივიღე წერილი მაღალჩინოსნისგან, პირდაპირი მუქარით..." - რაზე ისაუბრა მამუკა ხაზარაძემ პარლამენტში

"თიბისი ბანკის“ დამფუძნებლებმა მამუკა ხაზარაძემ და ბადრი ჯაფარიძემ პარლამენტში, საფინანსო-საბიუჯეტო კომიტეტის სხდომაზე დეპუტატების მიერ დასმულ შეკითხვებს უპასუხეს.

"თიბისი ბანკის" სამეთვალყურეო საბჭოს ყოფილი თავმჯდომარემ არჩევნების პირველი ტურის შემდეგ მიღებული წერილის შესახებ ისაუბრა, რომელშიც მას პირდაპირ დაემუქრნენ:

"არჩევნების მეორე ტურის წინ მე მივიღე წერილი, ერთ-ერთი ძალიან მაღალჩინოსნისგან, სადაც პირდაპირი მუქარით გვეუბნება რომ, ისინი დაანგრევენ ჩვენს რეპუტაციას ადგილზე და საერთაშორისო ასპარეზზე. ეს წერილი მე მაქვს. მიკვირს, რომ ეს წერილი დაწერეს და სიტყვიერად არ გვითხრეს ეს ყველაფერი. იქ იყო მოთხოვნები, რომლებიც რა თქმა უნდა, ჩვენ არ შევასრულეთ", - აღნიშნა ხაზარაძემ საუბრისას.

"თიბისი ბანკის" დამფუძნებლის განცხადებით, ის აგრძელებს დავას, როგორც ეროვნული ბანკის, ისე პროკურატურის წინააღმდეგ:

"მე გავაგრძელებ დავას საქართველოში და მის ფარგლებს გარეთ, იმიტომ რომ, ეს სცილდება ყოველგვარ ნორმას, ზღვარს და ა.შ. საქართველოში ამ საკითხთან დაკავშირებით ჩამოსული იყო ძალიან ბევრი დელეგაცია. არ დარჩენილა არც ერთი ევროპელი ელჩი და ბანკის პირველი ან მეორე პირები, რომლებიც არ ჩამოვიდნენ, ცალ-ცალკე არ შეხვდნენ მთავრობას და ეროვნულ ბანკს და ეუბნებოდნენ, რომ ასეთი მიმართულებით ამ საქმით განვითარება არ შეიძლება. ეუბნებოდნენ, რომ ანაკლიას ჩვენ ამ ფორმატში ხელს ვერ მოვაწერთ.

მე დაგანახეთ, რომ არც ბანკს ვეფარები და არც ანაკლიას. მე გადავდექი, რომ ბანკი მძიმე მდგომარეობაში არ ჩამეყენებინა, მაგრამ როგორც მიდის ახლა პროცესები და თქვენ იცით, რომ ბანკის მიერ ყველა შესწავლა დამთავრდა, 6 მილიონს უნდა მოვაწეროთ ხელი მაის-ივნისის თვეში. მე წარმოუდგენლად მიმაჩნია, რომ ჩვენი მონაწილეობით ამ სიტუაციაში მოხდეს ამ კონტრაქტის დახურვა. არ მინდა, გამიგოთ, რომ ამას ვიყენებ რაიმე თავდაცვის მექანიზმად. მე მინდოდა, მთლიანი სურათი მეჩვენებინა თქვენთვის“, - განაცხადა მამუკა ხაზარაძემ.

იხილეთ ვიდეო: "გვეუბნება, რომ დაანგრევენ ჩვენს რეპუტაციას..." - რა ეწერა მუქარის წერილში, რომელიც ხაზარაძემ არჩევნების მეორე ტურის წინ, მაღალჩინოსნისგან მიიღო

მისივე თქმით, ეროვნული ბანკის პრეზიდენტმა კატეგორიულად დაუსვა საკითხი, რომ ის და ბადრი ჯაფარიძე სამეთვალყურეო საბჭოდან უნდა წასულიყვნენ.

"ეროვნული ბანკი“, პრაქტიკულად, მე და ბადრი ჯაფარიძეს გვაშანტაჟებდა, მისი პრეზიდენტის და მისი ახლად არჩეული ვიცე-პრეზიდენტის მხრიდან. ისინი მოვიდნენ. მათ გამოუგზავნეს წერილი "თიბისი ბანკის“ დამოუკიდებელ დირექტორებს. 7 წევრი ყავს „თიბისი ბანკს“ სამეთვალყურეო საბჭოში აქ და 9 წევრი ყავს ლონდონის ბირჟაზე. საქართველოში მყოფი ხუთი წევრი არის ლონდონის ბირჟის მიერ დანიშნული დამოუკიდებელი დირექტორი, ისინი არიან უცხოელები. მათ გამოაგზავნეს წერილი და დაგვარიცხეს პირველი ჯარიმა, 10 ათას ლარი, ის ალბათ ვიღაცამ დაუწუნა, რომ ცოტა იყო.

მე შევხვდი ეროვნული ბანკის პრეზიდენტს და ვუთხარი, რომ ჩვენ 10 ათას ლარს არ გადავიხდით, რადგან ეს არის 11 წლის წინანდელი ამბავი, გამოუშვეს ახალი დეპარტამენტი, დაგვარიცხეს მილიონი ლარი. მათ გამოგზავნეს წერილი დამოუკიდებელ დირექტორებთან და მოსთხოვეს, რომ განეხილათ ჩემი და ბადრის სამეთვალყურეო საბჭოში ყოფნის მიზანშეწონილობა, წინააღმდეგ შემთხვევაში, მოითხოვდნენ ბუფერული კაპიტალის გაზრდას.

მივედი ეროვნული ბანკის პრეზიდენტთან და ვუთხარი, რომ ჩვენ მზად ვიყავით გადავმდგარიყავით თავმჯდომარეობიდან და მოადგილეობიდან, რადგან ეროვნული ბანკი არის რეგულატორი. მათ თქვეს, რომ ჩვენ სამეთვალყურეო საბჭოს თავმჯდომარეობიდან მთლიანად უნდა წავსულიყავით. ამაზე ჩემი პასუხი იყო - ეს გავს იმას, რომ 27 წლის შვილთან არ მოგცენ უფლება, წელიწადში ოთხჯერ ნახო და მოისმინო რას აკეთებს შვილი“, - განაცხადა მამუკა ხაზარაძემ.

აქედან გამომდინარე, ხაზარაძე ამბობს, რომ მოითხოვს დადგეს ეროვნული ბანკის პრეზიდენტის და მისი მოადგილის პასუხისმგებლობის საკითხი, რომელთაც ის სრულ უნდობლობას უცხადებს:

"მე, როგორც მოქალაქეს და ამ ინდუსტრიაში 27 წლის მანძილზე ჩაფლულ ადამიანს, მინდა მისი პასუხისმგებლობის საკითხი დადგეს და მეორე, მოვითხოვ, ასევე (არ ვიცი, მაქვს თუ არა ამის უფლება და როგორ არის პროცედურულად), შეიქმნას სპეციალური კომისია, სადაც ყველა იმ დეტალს, წერილს და კიდევ ბევრ ნიუანსს გაგაცნობთ და ჩაგაყენებთ საქმის კურსში" - დასძინა "თიბისის" დამფუძნებელმა.