რუსეთში სამუშაოდ წასული ქმრის სახლში დასაბრუნებლად დედამ 9 თვის შვილს რკინის ნემსები შეარჭო - ტაჯიკი ქალი დააპატიმრეს

ტაჯიკი ქალი, რომელმაც 9 თვის ბავშვს სხეულის სხვადასხვა ნაწილში რკინის ნემსები შეარჭო, ციხეში 8 წელს გაატარებს, ამის შესახებ „დეილი მეილი“ წერს.

მუხაიო იაკობოვას ბავშვის, მუდასირ კარიმოვის სხეულის დაზიანებაში დასდეს ბრალი.

გამოძიების ინფორმაციით, ნემსების შერჭობა იყო რიტუალის ნაწილი, რომელიც, მისი მტკიცებით, რუსეთში სამუშაოდ მყოფ ქმარს სახლში დააბრუნებდა.

მუდასირი გასული წლის ზაფხულში საავადმყოფოში გადაიყვანეს - ბავშვს ერთ-ერთმა ნათესავმა პირში ნემსი აღმოუჩინა. რენტგენმა ბიჭის სხეულში 10 რკინის ნემსი აჩვენა. მუდასირს თავის ქალიდან, ცხვირიდან, კისრიდან, მკერდიდან და ფეხებიდან ნემსების ამოსაღებად რამდენიმე ოპერაციის ჩატარება დასჭირდა.

დუშანბეში მდებარე საავადმყოფოს წარმომადგენელმა განაცხადა, რომ რამდენიმე ნემსი უკვე დაჟანგებული იყო.

პოლიციამ მომხდართან დაკავშირებით საქმე აღძრა და იაკუბოვა ინციდენტის შემდეგ მალევე დააკავეს. გამოძიების ინფორმაციით, მან დანაშაული აღიარა, თავად იაკუბოვა კი ამბობს, რომ აღიარება აიძულეს და კრიმინალი არ ჩაუდენია.

„დაკითხვის დროს დამემუქრნენ, რომ გამაუპატიურებდნენ, უფროს შვილს კი ობოლთა თავშესაფარში გადაიყვანდნენ, თუ დანაშაულს საკუთარ თავზე არ ავიღებდი.

არ ვიცი, როგორ აღმოჩნდა ბავშვის სხეულში ნემსები. არცერთი დედა არ გაუკეთებს შვილს ასეთ რამეს,“ - განაცხადა იაკუბოვამ, რომელიც სასამართლოს განაჩენის გასაჩივრებას აპირებს.