როგორ სელფს გადაიღებდა დავით აღმაშენებელი დიდგორის ბრძოლის წინ - "ისტორიული სელფები", რომლებმაც "ფეისბუქი" აალაპარაკა

ალბათ, იშვიათად მოიძებნება ადამიანი, რომელსაც ერთი სელფი მაინც არ გადაუღია. "სელფს" ხომ ბევრი 21-ე საუკუნის სენად მიიჩნევს, თუმცა ოდესმე გიფიქრიათ, როგორ "სელფებს" გადაიღებდნენ ჩვენი წინაპრები? როგორც ჩანს, ამაზე უკვე იფიქრა ვიღაცამ და წარმატებითაც განახორციელა.

რამდენიმე დღეა "ფეისბუქზე" გამოჩნდა გვერდი "ისტორიული Sელფერი", სადაც საინტერესო "სელფებს" წააწყდებით. მინაწერებით ადვილად გამოიცნობთ დახატულ პერსონებს - დავით აღმაშენებელს, შოთა რუსთაველს, ვახტანგ გორგასალს, ფარნავაზ მეფესა და სხვა ისტორიულ ფიგურებს, რომლებიც მათთვის დამახასიათებელ გარემოში "იღებენ სელფს".

მაგალითად, ფარნავაზ მეფე იბერიის სამეფოდან "პოსტავს" საკუთარ სელფს ასეთი მინაწერით: "ႠႫႨႤႰႨႣႠႬ ႱႠႩႳႧႠႰႨ ႣႠႫႼႤႰႪႭႡႠ ႢႥႤႵႬႤႡႠ" (ამიერითგან საკუთარი დამწერლობა გვექნება)

კიდევ ერთი სელფით და მისი მინაწერით - "ადგილსა ამას ტფილისი ეწოდოს!", ადვილად მიხვდებით, რომელი მეფეა "კადრში" ხოხბისა და ჩანჩქერის ფონზე. რა თქმა უნდა, ვახტანგ გორგასალი.

განსაკუთრებული გამოხმაურება მოჰყვა სელფს დიდგორის ველიდან, რომელსაც დავით აღმაშენებელი "იღებს". ფოტოს აქვს მინაწერი: ""1121 წელი, 11 აგვისტო. ხვალ დიდი გამარჯვების დღეა!"

ისტორიულმა სელფებმა ინტერნეტმომხმარებელში დიდი აჟიოტაჟი გამოიწვია. ყველას აინტერესებს, ვინ დგას მეფეებისა და სხვა ცნობილი ისტორიული სახეების სელფების უკან. თითოეულ სელფს ასობით გაზიარება და კომენტარი აქვს:

"ერთდროულად მეტირება და მეცინება... ჩვენი დიდი მეფეები"

"ამ ნამდვილ სასწაულებს ვინ ჰქმნის?"

"ავტორი ვინ არის, მშვენიერი შესრულებაა!"

"მთელი სამეგობრო ვმსჯელობთ, რომელი სელფი იქნება შემდეგი. რას მოვესწარით, ხალხმა მეფეებზე საუბარი დაიწყო ყოველდღიურ ცხოვრებაში!"

"რომ არა ეს სელფები, ხომ ვერ გავიგებდით რა ხდებოდა საუკუნეების წინ?!" - წერენ ინტერნეტმომხმარებლები კომენტარებში. თუმცა, პოზიტიური გამოხმაურების გარდა, "ფეისბუქ-მომხმარებლების ნაწილი სელფებს მკრეხელობად მიიჩნევს და წერს, რომ ქართველი მეფეები და წმინდანები "ამას არ იმსახურებენ".

ყველა ისტორიული სელფის ბოლოს არის ჰეშთეგები: #იკითხესაქართველოსისტორია და #ქართველიმეფეები. როგორც ჩანს, გვერდის შემქმნელები ინტერნეტმომხმარებელს საქართველოს ისტორიის უკეთ შესწავლისკენ მოუწოდებენ.