გაუჩინარებული პრინცესა კვლავ არსად სჩანს - მაროკოს მეფემ მეგანს და ჰარის ცოლის გარეშე უმასპინძლა
მაროკოს გაუჩინარებული პრინცესა ლალა სალმა მსოფლიოს მედიის ყურადღების ცენტრში კიდევ ერთხელ მოექცა - ქვეყანაში სტუმრად მყოფ ბრიტანელ პრინც ჰარისა და მის ცოლს, მეგან მარკლს მეფე მოჰამედ მეექვსე ცოლის გარეშე შეხვდა. ლალა სალმა კვლავ არსად სჩანს.
2018 წელს გავრცელდა ინფორმაცია, რომ მეფე და მისი ცოლი ერთმანეთს დაშორდნენ, თუმცა სამეფო სასამართლომ ცნობები ოფიციალურად არც უარყო და არც დაადასტურა.
თემას მაროკოს მედია არასოდეს აშუქებს, თუმცა საერთაშორისო გამოცემები ლალა სალმაზე მუდმივად წერენ. არავინ იცის, სად არის პრინცესა - ვარაუდობენ, რომ შესაძლოა, ის ევროპაში იყოს, თუმცა ინფორმაცია ძალიან მწირია. ვრცელდებოდა ხმა, რომ ის შვილებთან ერთად დასვენებისას შენიშნეს, თუმცა ერთადერთი, რისი თქმაც ჟურნალისტებს დარწმუნებით შეუძლიათ, არის ის, რომ ლალა სალმა 2017 წლის შემდეგ საზოგადოებაში აღარ გამოჩენილა. მას არცერთ ღონისძიებაში მიუღია მონაწილეობა, არც ოფიციალურ სტუმრებს დახვედრია. ლალა სალმას ადგილი მისმა მულმა, პრინცესა ლალა მერიემმა დაიკავა, ის „პირველი ლედის“ ყველა ფუნქციას ითავსებს.
დასავლური მედიის მტკიცებით, ბავშვებზე მეურვეობა მამას აქვს აღებული, თუმცა პრინცესა შვილებს რეგულარულად ნახულობს. ინფორმაცია არც მისი ტიტულების შესახებ ვრცელდება, თუმცა სხვადასხვა მედიასაშუალება ვარაუდობს, რომ როგორც მომავალი მეფის დედას, წოდებები შეუნარჩუნდება.
