"ბევრი წელი სრულიად მარტო ვიყავი, ახლა უბედნიერესი ვარ" - კახი კავსაძის გულახდილი ინტერვიუ და ოჯახური ფოტოები

ცნობილმა ქართველმა მსახიობმა კახი კავსაძემ ცოტა ხნის წინ ოპერაცია გაიკეთა. ახლა კი როგორც თვითონ ამბობს, ჯანმრთელობის პრობლემები აღარ აქვს, თავს კარგად გრძნობს და სურს სცენას აქტიურად დაუბრუნდეს... კახი კავსაძე ბოლო დროს თავს ძალიან ბედნიერ ადამიანად მიიჩნევს, რადგან ოჯახის წევრები ახლოს ჰყავს და სურს, ეს რაც შეიძლება დიდხანს გაგრძელდეს.

"მეუღლე რომ გარდამეცვალა, შვილი ოჯახით საზღვარგარეთ წავიდა, ძმაც საზღვარგარეთ მოღვაწეობდა და ბევრი წლების განმავლობაში სრულიად მარტო ვიყავი, რაც ურთულესი იყო" - ამბობს მსახიობი.

- სანამ მეუღლე გვერდით მყავდა, ჩემზე ბედნიერი დუნიაზე არავინ იყო! შემდეგ იყო მრავალი მარტო გატარებული წელი... წელს ჩემი შვილიშვილი ირინკა ჩამოვიდა ამერიკიდან და ჩემი ცხოვრება სრულიად შეიცვალა! ამერიკაში წასვლის შემდეგ ირინკა საქართველოში ამდენ ხანს არ ყოფილა და სულ მონატრებული ვიყავი. ახლა ძალიან ბედნიერები ვიყავით, ყველა სახლში ვიყავით დიდიან-პატარებიანად, ცხოვრება მიხაროდა! ოპერაცია რომ გავიკეთე, ჩემი შვილი ირაკლიც ჩამოვიდა. ვუყურებდით ირინკას გამოსვლებს "ცეკვავენ ვარსკვლავებში" და ძალიან კმაყოფილები ვიყავით. მშვენივრად ცეკვავს, ალბათ თქვენც ასე ფიქრობთ...

- არ გქონდათ მოლოდინი, რომ გაიმარჯვებდა?

- ეგ თქვენი, ხალხის გადასაწყვეტი იყო! რაღაც მომესმა, ჩაწყობა იყოო და გლახა ლაპარაკია ეგ... ვინ რა ჩააწყო, მიაწყო და ააწყო?! ყველაფერი ლამაზად იყო და არ მიყვარს სხვანაირი საუბრები!

- ირინკა ისევ საქართველოშია?

- ირინკა ჯერ არ წასულა... ხშირად და ბევრს ველაპარაკები. ხან დეიდასთან არის, მამიდასთან, მამიდაშვილებთან, ბიძაშვილებთან...თუ კიდევ დარჩება საქართველოში, ძალიან კმაყოფილი ვიქნები. მიხარია, ჩემს შვილიშვილს რომ ველაპარაკები ხოლმე.

- ისურვებდით ქართული ოჯახი შექმნას და საქართველოში იცხოვროს?

- რასაკვირველია! მე მინდა ყველა აქ მყავდეს, ჩემი შვილები, შვილიშვილები და ბედნიერად ვცხოვრობდეთ! მე და ჩემი ძმა - იმედი კავსაძე სულ ერთად ვართ, ყველგან ერთად გვხედავენ. იგი საოპერო მომღერალია და დიდი ხნის განმავლობაში პოლონეთში მოღვაწეობდა. ახლა თუ ჩვენი ოჯახის წევრების ერთად ყოფნა დიდხანს გაგრძელდება, ეს იქნება ძალიან კარგი, თუ არა და რას ვიზამთ! მე ყოველთვის აქტიური ცხოვრებით ვცხოვრობდი, ახლაც ასე ვარ და მსურს სცენაზე რაც შეიძლება აქტიურ მოღვაწეობას დავუბრუნდე!