ელისო ჩაფიძე ტყუპის დედა გახდა - რას წერს ყოფილი დეპუტატი "ფეისბუქზე"
ყოფილი დეპუტატი, "ქართული ოცნების" ყოფილი წევრი ელისო ჩაფიძე ტყუპი გოგონების დედა გახდა. ბავშვები ორი თვის წინ, ნაადრევად მოევლინენ ქვეყანას და გარკვეული პერიოდი მათზე ექიმები ზრუნავდნენ.
ყოფილი დეპუტატი 45 წლის ასაკში პირველად გახდა დედა. ელისო ჩაფიძე 2013 წელს დათო მიქაბერიძეზე დაქორწინდა. ექიმებისადმი მადლიერება, რომლებმაც ახალშობილი პატარები გადაარჩინეს და გამოაჯანმრთელეს, ჩაფიძემ "ფეისბუქის" პირად გვერდზე ვრცელ პოსტში გამოხატა.
"მადლიერება ადამიანის ერთ-ერთი საუკეთესო თვისებაა და მისი თქმა არასოდეს არაა ზედმეტი, თუ მლიქვნელობისგან დაცლილია. ახლა, როცა უფლის წყალობითა და ძლიერი პროფესიონალების დახმარებით ყველაფერი კარგადაა, არ შემიძლია, საჯარო მადლობა არ გადავუხადო საქართველოს ჯანდაცვის სისტემას და ღუდუშაურის სახელობის კლინიკის პროფესიონალ ექიმებს იმ უდიდესი ძალისხმევისათვის, რაც არა მხოლოდ ჩემი და ჩემი შვილების, არამედ თითოეული იმ ადამიანისათვის გასწიეს, ვინც მათ ხელში ხვდება.
საქართველოში ცოტა თუ მოიძებნება ადამიანი, რომელშიც პროფესიონალიზმი, ინტელექტი და ადამიანურობა ისეა შერწყმული, როგორიც ბატონ რეზო სულუხიაშია. ის არა მხოლოდ ახალ სიცოცხლეებს ჩუქნის ქვეყანას, არამედ ზნეობრივ მაგალითსაც აძლევს პაციენტებს. მშობიარეებისათვის უდიდესი შვებაა, როცა იციან, რომ მათი პატარა, დროულად თუ ოდნავ ნაადრევად გაჩენილი, უძლიერესი პედიატრის, პერინატალური ცენტრის ნეონატალური განყოფილების ხელმძღვანელის, ქალბატონ შორენა ჭანკვეტაძის ხელში მოხვდება.
ორი თვეა, მაქვს ამ განყოფილების სამედიცინო პერსონალთან ურთიერთობა და დავრწმუნდი, რომ აქ უმაღლეს დონეზე და განურჩევლად მშობლების ვინაობისა, ზრუნავენ ჩვილებზე... სწორედ ამიტომ კლინიკა ისეთ საოცრებებს ახდენს, როგორიცაა 25 და 26-ე კვირაზე გაჩენილი ჩვილების არა მხოლოდ გადარჩენა, არამედ მათი ჯანმრთელობის სრული უზრუნველყოფა.
უდიდესი მადლობა ჩვენი განყოფილების სამედიცინო პერსონალს, ექიმებს, ქალბატონ ნინო წულაიას, მაკო კვარაცხელიასა და თამარ გოგოლაძეს იმ ზრუნვისა და სიყვარულისათვის, რომელსაც თითოეული ახალშობილის მიმართ იჩენენ. კარგი მაგალითები გადამდებია, სიკეთე კი ანათებს და ასხივებს. ვისურვებდი, ჩვენს სამშობლოში ყველა საქმის პროფესიონალი სწორედ ასე ზრუნავდეს მოქალაქეებზე და ქვეყანაზე...
ამ ადამიანების ძალისხმევით ჩვენი ოჯახი დღეს ორი პატარის: მარიამისა და თამარის ბედნიერი მშობლები გავხდით. ყველას ბედნიერებას და ჯანმრთელობას გისურვებთ და ბოდიშს გიხდით უგრძესი პოსტისათვის, რომელშიც არც კი ჩაეტია სათქმელი" - წერს ელისო ჩაფიძე "ფეისბუქის" პირად გვერდზე.
"თქვენ მამა წამართვით და ამას არასდროს გაპატიებთ!" - მოკლული ნოდარ ცხადაძის შვილი ბრალდებულ ბექა კვიციანის მშობლებს მიმართავს
"ტვინის გამომრეცხავი რუსული არხების მაგივრად ჩაგვირთეთ "პალიტრანიუსი" - რას სთხოვს ოქრუაშვილი წულუკიანს ციხიდან
