„ვენდის“ ამერიკული რესტორანი „გალერეა თბილისში“ გაიხსნა

"ვენდის“ ამერიკული რესტორნების ქსელი საქართველოში განვითარებას განაგრძობს და მორიგ რესტორანს სავაჭრო ცენტრ „გალერეა თბილისში“ ხსნის. „ვენდი“ „გალერეა თბილისში“ სტუმრებს ახალი ფორმატით უმასპინძლებს. ერთგულ მომხმარებელს „ვენდის“ რესტორნისა და “ვენდის” კაფის ტრადიციულ მენიუსთან ერთად, ნამდვილი, მხოლოდ იტალიური ინგრედიენტებისგან დამზადებული პიცების დაგემოვნებაც შეეძლებათ.

„ვისოლ ჯგუფმა“ პიცერიების ქსელის განვითარების შესახებ მიმდინარე წლის დასაწყისში განაცხადა და საწყის ეტაპზე პიცის კუთხეების ინტეგრირება „ვენდის“ ამერიკულ რესტორნებში დაიწყო, თუმცა, როგორც კომპანიაში აცხადებენ, „ვენდის“ პიცის რესტორნები ცალკე მდგომ ქსელადაც განვითარდება.

„გალერეა თბილისში“ "ვენდის" რესტორნის ოფიციალურ გახსნას “ვენდის“ საერთაშორისო ვიცე-პრეზიდენტი რაჯეევ საბარვალ რაჯივი, "ვენდის" საერთაშორისო საოპერაციო დირექტორი გაბორ ჰავარი და კომპანიის ადგილობრივი წარმომადგენლები დაესწრნენ.

"ჩვენი და "ვისოლ ჯგუფის" პარტნიორობა ძალიან წარმატებული აღმოჩნდა, რის შედეგადაც, დღეს "ვენდის" მე-11 რესტორანი გავხსენით. ჩვენთან დამზადებული პროდუქტები არის უმაღლესი ხარისხის, ახალი და რაც მთავარია, ქართული. ჩვენ ყოველთვის ორიენტირებული ვართ მომხმარებელზე, რისთვისაც "ვენდის" ჯგუფი ბევრს მუშაობს." - აღნიშნა რაჯეევ საბარვალ რაჯივმა.

"საქართველოში ქსელის განვითარების პირველივე დღიდან დასახული ამბიციური გეგმებით ჩვენ შევძელით, რომ გაგვეზიარებინა საერთაშორისო "ვენდისთან" ყველაზე მნიშვნელოვანი პრიორიტეტები - საკვების უმაღლესი ხარისხი, მისი უსაფრთხოება, მომსახურების გამორჩეული სტანდარტი და კორპორაციული სოციალური პასუხისმგებლობის ღირებულებები. ჩვენ მუდმივად ვცდილობთ შევასრულოთ დანაპირები - "ხარისხი ჩვენი რეცეპტია" და თბილისის გულში, „გალერეა თბილისში“ გახსნილი ახალი ფორმატის ვენდის რესტორანში მასპინძლობით გავაკვირვებთ როგორც ჩვენს ერთგულ მომხმარებლებს, ისე ტურისტებს. მოხარული ვართ, რომ „ვენდის“ საერთაშორისო დელეგაციაც ჩვენთან ერთად იზიარებს ბრენდის წარმატებას ქართულ ბაზარზე", განაცხადა "ვენდის" გენერალურმა დირექტორმა, გიორგი მშვილდაძემ.

”ვენდის“ ახალ რესტორანში 20 ადამიანი დასაქმდა. დღესდღეობით უკვე „ვენდის“ 11 რესტორანი ფუნქციონირებს მთელი საქართველოს მასშტაბით.

საქართველოში “ვენდის" ამერიკული რესტორნების ქსელის განვითარება 2013 წელს დაიწყო. „მეტი ქართული პროდუქტის“ ინიციატივის ფარგლებში კი უკვე 2 წელია ამერიკული რესტორნების ქსელმა „ვენდიმ“ პროდუქციის იმპორტი ქართული პროდუქტებით ჩაანაცვლა და მომხმარებელს საქართველოში დამზადებულ ყოველდღიურად ახალ, მაღალი ხარისხის საქონლისა და ფრინველის ხორცს, ბურგერის პურსა და სხვა სთავაზობს.

R

თეკლე ჯანელიძე