30
მარტიდღის ზოგადი ასტროლოგიური პროგნოზი
"ქარდინგი", რაც პლასტიკური ბარათის მონაცემების უნებართვოდ მოპოვებას გულისხმობს, კიბერდანაშაულის ერთ-ერთი ყველაზე გავრცელებული ფორმაა.
საზოგადოებრივი მაუწყებლის გადაცემა "ახალი კვირის" ინფორმაციით, აღნიშნული ბრალდებით გასულ წელს თბილისში ახალგაზრდა ქალი დააკავეს. ის ერთ-ერთ ცნობილ სუპერმარკეტში მოლარედ მუშაობდა და სამი თვის განმავლობაში 24 მოქალაქის პლასტიკური ბარათის ინფორმაციის მოპოვებით, 10 ათას ლარზე მეტი მიითვისა.
დაზარალებულებს შორის იყო გიორგი მირაშვილიც, რომელმაც "ახალ კვირასთან" ისაუბრა.
"ჩემი ანგარიშიდან განხორციელდა სამი ტრანზაქცია, ჩამოიჭრა 600 ლარი. თანხა ჩაირიცხა ერთ-ერთი ქართული ტოტალიზატორის მომხმარებლის პირად ანგარიშზე. მივმართე ბანკს, რომელმაც მირჩია, განცხადება დამეწერა პოლიციაში, რის შემდეგაც დამერიცხებოდა ანგარიშზე თანხა, რომელიც ბარათის დაზღვევის გათვალისწინებით მეკუთვნოდა. აღიძრა საქმე, თუმცა როგორ დამთავრდა ეს ყველაფერი, არ ვიცი. ჩემთვის აღარავის მოუმართავს. ბანკმა წარდგენილი დოკუმენტების საფუძველზე ამინაზღაურა მაქსიმალური თანხა, რაც მათი დაზღვევის პირობების მიხედვით მეკუთვნოდა - 400 ლარი" - ყვება დაზარალებული.
გამოძიების ინფორმაციით, სამუშაო საათებში მოლარე ფარულად ფოტო და ვიდეო გადაღების საშუალებით, უკანონოდ დაეუფლა პლასტიკური ბარათის შესახებ ინფორმაციას, შემდეგ კი თაღლითური გზით თანხის განაღდებაც შეძლო. გამომძიებელი ნიკოლოზ სულაშვილი იმ სქემაზე საუბრობს, რასაც ახალგაზრდა ქალი თანხის მითვისებისთვის იყენებდა:
"ამ შემთხვევაში, ყურადღებას აქცევდა რამდენიმე ციფრს. პლასტიკური ბარათის ერთ მხარეს დატანილი არის 16-ციფრიანი კოდი, მას არ სჭირდებოდა თექვსმეტივეს დამახსოვრება, თუმცა, მეორე მხარეს ამოტვიფრული სამივე ციფრის დამახსოვრება აუცილებელი იყო. ის მყიდველს არ აძლევდა ქვითარს, თავად იტოვებდა და ქვითარზე დაფიქსირებულ ციფრებს უმატებდა დამახსოვრებულ ციფრებს. ამის შემდეგ ის თანხას რიცხავდა ერთ-ერთი ონლაინკაზინოს არავერიფიცირებულ ანგარიშზე, რომლის უკანაც, ფაქტობრივად, პიროვნება არ დგას და იმიტირებული თამაშის მეშვეობით „აგებდა“ მასთან ამ თანხას.
საბოლოოდ, მოგებული პიროვნება თანხას საკუთარ, უკვე ვერიფიცირებულ ანგარიშზე რიცხავდა" - ამბობს გამომძიებელი ნიკოლოზ სულაშვილი "ახალ კვირასთან" ინტერვიუში.
ჩადენილი დანაშაულის გამო, მოლარე გოგონას 4 წლით თავისუფლების აღკვეთა ემუქრება. მან სპეციალურ ანგარიშზე საბოლოოდ 10 000 ლარის გადარიცხვა მოახერხა და როგორც ირკვევა, მან ერთი კონკრეტული ბანკის კლიენტების დაზარალება შეძლო, თანხის განაღდება კი ინტერნეტტოტალიზატორის სამაგიდო თამაშების საშუალებით მოახერხა. არსებული ინფორმაციით, ყველა დაზარალებულს თანხა დაუბრუნდა.
ქართველი სამართალდამცველები მოქალაქეებს მოუწოდებენ, არასანქცირებული ფულადი ტრანზაქციის შემთხვევაში ბანკთან ერთად, პოლიციასაც დროულად მიმართონ.
ასევე დაგაინტერესებთ: თუ ბარათზე ეს პინ-კოდები გაქვთ, აუცილებლად შეცვალეთ
