15
ივლისიდღის ზოგადი ასტროლოგიური პროგნოზი
კომპანია "თელასი" ელექტროენერგიის სამომხმარებლო ტარიფის გაზრდას 2015 წლამდე არ გეგმავს , - ამის შესახებ დღეს გამართულ ბრიფინგზე კომპანიის გენერალური დირექტორის მოვალეობის შემსრულებელმა, მამუკა ქობალიამ განაცხადა.
"მინდა, სრული პასუხისმგებლობით განვაცხადო, რომ "თელასი" ტარიფის გაზრდას არ გეგმავს, არ მიუმართავს ეროვნული მარეგულირებელი კომისიისთვის და კომპანია 2015 წლამდე სამომხმარებლო ტარიფის გაზრდას არ აპირებს", - აღნიშნა ქობალიამ და დასძინა, რომ არ იგეგმება არც სამეწარმეო ტარიფის შეცვლა.
"თელასის" განცხადებით, გუშინ გავრცელებული ინფორმაცია ტარიფის შესაძლო გაზრდასთან დაკავშირებით უსაფუძვლოა და საზოგადოების შეცდომაში შეყვანას ისახავს მიზნად.
როგორც კომპანიაში აცხადებენ, "თელასი" საქართველოში მოქმედი კანონმდებლობის ფარგლებში საქმიანობს და მომხმარებელთან ანგარიშსწორებას საქართველოს ენერგეტიკისა და წყალმომარაგების მარეგულირებელი ეროვნული კომისიის მიერ დადგენილი ნორმატიული აქტების შესაბამისად ახორციელებს.
არსებული სატარიფო კანონმდებლობის მიხედვით, ელექტროენერგიის სამომხმარებლო ტარიფი 2006 წლის 1 ივნისიდან საფეხურებად განისაზღვრა: თვეში 100კვტ/სთ მოხმარების შემთხვევაში აბონენტი 1 კვტ/სთ–ში იხდის 13.480 თეთრს; 100-დან 300–მდე 1 კვტ/სთ–ში 16.000 თეთრს; 301-იდან ზემოთ – 17. 697 თეთრს.
როგორც კომპანიაში განმარტავენ, "თელასს" სამომხმარებლო ტარიფთან დაკავშირებით ხელისუფლებასთან აქვს გაფორმებული შესაბამისი მემორანდუმი, რომლის მიხედვითაც, ტარიფის გაზრდა 2015 წლამდე არ იგეგმება.
