რა უნდა გავითვალისწინოთ, რომ ჰოსპიტალიზაცია სტრესული არ იყოს

გეგმიური ოპერაცია და მასთან დაკავშირებული ჰოსპიტალიზაცია, პაციენტისთვის თითქმის ყოველთვის სტრესის ფონზე მიმდინარეობს. უამრავი საორგანიზაციო სახის კითხვა, რომელიც საავადმყოფოში დაწოლასთან ასოცირდება, ჯანმრთელობასთან დაკავშირებულ შიშს და დაძაბულობას კიდევ უფრო ამძაფრებს.

„ნიუ ჰოსპიტალსის“ სამედიცინო დირექტორი გიორგი კორძახია პაციენტებს წინასაოპერაციო სტრესის დაძლევაში რჩევებით დაეხმარება და ასევე, განუმარტავს თუ რაზე უნდა გაამახვილონ ყურადღება ჰოსპიტალიზაციის სამზადისის დროს, რომ პროცესმა პროდუქტიულად, მკურნალობამ კი - წარმატებით ჩაიაროს.

რით უნდა დავიწყოთ ჰოსპიტალიზაციისთვის სამზადისი?

დაიწყეთ კითხვების დასმით თქვენი ექიმისა და ექთნის მისამართით. პაციენტების ნაწილს კითხვების დასმა ერიდება, რადგან ფიქრობენ, რომ ექიმი დაკავებულია. მან კი ისეთი კითხვა უნდა დაუსვას, მაგალითად როგორიცაა - მექნება თუ არა საავადმყოფოში Wi-Fi ან როგორია კვების მენიუ. აუცილებლად იკითხეთ ყველაფერი, რაც თქვენთვის მნიშნველოვანია, რადგან ასეთ შემთხვევაში თავდაჯერებული იქნებით. პაციენტის პოზიტიური განწყობა კი მკურნალობის პროცესში ექიმისთვის ძალიან მნიშვნელოვანია.

რა უნდა ჰკითხოს პაციენტმა ექიმს პირველ რიგში?

ჰკითხეთ ყველაფრის შესახებ, რაც სტაციონარში ყოფნის პერიოდსა და რეჟიმს ეხება - რამდენი ხანი გაგრძელდება ჰოსპიტალიზაცია, რა მოხდება გაწერის შემდეგ, შესაძლებელი იქნება სამსახურში დაუყოვნებლივ დაბრუნება თუ საჭიროა სარეაბილიტაციო პერიოდი, რა შეზღუდვები დაგიწესდებათ რეაბილიტაციის დროს, უნდა დაიცვათ თუ არა დიეტა, სხვ.

აუცილებელია, იცოდეთ, იქნება თუ არა საჭირო ოპერაციის შემდეგ რაიმე სპეციალური მოწყობილობა. მაგალითად - თუ პაციენტს ტრავმატოლოგიური ოპერაცია უტარდება მუხლზე, მას დასჭირდება ხელჯოხი ან ყავარჯენი. ექიმისთვის ეს ცხადია, პაციენტმა კი, შესაძლოა, არ იცოდეს. ამიტომ, უმჯობესია ადრევე იზრუნოს, ვიდრე გაწერის დღეს დაურეკოს ახლობლებს, სასწრაფოდ მოუტანონ ყავარჯნები. დააზუსტეთ, ასევე, უნდა წაიღოთ თუ არა თან კბილის ჯაგრისი, პასტა, სავარცხელი, ჩუსტები, ხალათი და სხვა პირადი ნივთები, თუ ამ ყველაფერს საავადმყოფოში მოგცემენ.

უნდა გავაფრთხილოთ თუ არა ექიმი, თუ რამე მედიკამენტს ვიღებთ?

ექიმს აუცილებლად უნდა უთხრათ თქვენი გეგმიური მედიკამენტოზური მკურნალობის შესახებ. უნდა მოუყვეთ, რა წამლებს სვამთ ყოველდღიურად. თუ ჰიპერტონული დაავადება, შაქრიანი დიაბეტი ან ბრონქული ასთმა გაქვთ, წინასწარ დაწერეთ ყველა პრეპარატის დასახელება, დოზა, მიღების დრო.

ეს ძალიან მნიშვნელოვანია, რადგან ზოგი პრეპარატი შესაძლოა იყოს მოსახსნელი წინასაოპერაციო პერიოდში. ამ პირობების დარღვევის შემთხვევაში ოპერაცია გადავადდება.

კიდევ რა უნდა ვუთხრათ ექიმს?

ჰოსპიტალიზაციამდე მკურნალი ექიმი ან ანესთეზიოლოგი გკითხავთ, რა დაავადებები გაქვთ გადატანილი, ჩატარებული თუ გაქვთ რაიმე ოპერაცია, როგორი იყო ანესთეზია, სხვ. მნიშვნელოვანია ექიმის ყველა კითხვას უპასუხოთ.

რა ნიუანსებია გასათვალისწინებელი სტაციონარში მკურნალობის თანხის გადახდის დროს?

უმჯობესია წინასწარ იცოდეთ, გადახდის რა პირობები მოქმედებს კლინიკაში, მაგალითად შეგიძლიათ თუ არა ბარათით ან გადარიცხვით გადახდა, როდის უნდა გადაიხადოთ თანხა - ჰოსპიტალიზაციამდე თუ გაწერის შემდეგ.

რატომ არის აუცილებელი საავადმყოფოში დროულად მისვლა?

საბუთების გაფორმების პროცესი ხშირად დროს მოითხოვს, ამიტომ ყველას ვურჩევ, დაგეგმილ დროზე ადრე მივიდნენ კლინიკაში. დრო რომ არ დაკარგოთ, გაარკვიეთ, როგორ მიხვიდეთ საავადმყოფომდე, არის თუ არა საცობები, შესაძლებელია თუ არა კლინიკასთან ახლოს მანქანის პარკირება.

ასევე, მნიშვნელოვანია გაითვალისწინოთ, რომ დრო, როდესაც ოპერაცია ინიშნება, პირობითია. შესაძლებელია, რომ რომელიმე სხვა პროცედურა ან ოპერაცია დანიშნულ დროს არ დასრულდეს და შემდეგი ოპერაციის დრომ გადაიწიოს. ასეთი რამ ყველგან ხდება, ამიტომ უმჯობესი იქნება თუ ამ საკითხს მოთმინებით მიუდგებით.

რა უნდა იცოდნენ ჰოსპიტალიზაციის შესახებ პაციენტის ოჯახის წევრებმა?

ჰოსპიტალიზაცია არა მხოლოდ პაციენტებისთვისაა სტრესული, არამედ მისი ახლობლებისთვისაც. ამიტომ, უნდა უთხრათ, რამდენ ხანს დაჰყოფთ საავადმყოფოში, რომელ საათებში შეძლებენ თქვენს ნახვას, ან ტელეფონით დარეკვას. ჩვენთან, „ნიუ ჰოსპიტალსში“ პაციენტის ახლობლებისთვის განსაზღვრულია მონახულების საათები. რაც შეეხება ბავშვების ჰოსპიტალიზაციას, ჩვენთან უახლოეს დღეებში ფუნქციონირებას იწყებს ბავშვთა ჯანმრთელობის ცენტრი. ცენტრში არსებული ყველა პალატა აღჭურვილია ავეჯით, სადაც მშობლის განთავსება არის შესაძლებელი.

ოპერაციის შემდეგ შესაძლოა პაციენტი მოთავსდეს ისეთ სივრცეში სადაც მობილური ტელეფონებით სარგებლობა აკრძალულია, მაგ. პოსტოპერაციული პალატა ან ინტენსიური თერაპიის განყოფილება, ამიტომ, უმჯობესი იქნება, დააზუსტოთ ექიმთან, როდის შეძლებთ ახლობლებთან დაკავშირებას, ან სთხოვოთ, თავად დაუკავშირდეს მათ და აცნობონ თქვენი ჯანმრთელობის მდგომარეობის შესახებ.

„ნიუ ჰოსპიტალსში“ არსებული სამედიცინო სერვისების და მედპერსონალის შესახებ ინფორმაციის მოძიება შესაძლებელია ჰოსპიტალის საიტზე www.newhospitals.ge ან ტელეფონის ნომერზე 2 190 190.