"გავარდნა არავის აგვცდება, "ევროვიზიაზე" მიდის მხოლოდ ერთი!" - "საქართველოს ვარსკვლავის" პირველი ტური და მომღერლების ემოციები

"საქართველოს ვარსკვლავის" პირველი ლაივ-შოუ შედგა. პროექტი ორმა კონკურსანტმა დატოვა - მარიამ კახელიშვილმა და ბესო ნემსაძემ. პირველივე ლაივზე არც ერთი ელოდა, თუ პროექტს მიღმა აღმოჩნდებოდა, მაგრამ მაყურებელმა ასე გადაწყვიტა - მათ ყველაზე დაბალი ქულები დააგროვეს. ლაივ-კონცერტის ლიდერი ხმების მიხედვით, ოთო ნემსაძე აღმოჩნდა.

აუტსაიდერებში მოხვდა პროექტის კიდევ ერთი მონაწილე - ნინი ცნობილაძე, თუმცა მან ქულათა რაოდენობით ორივეს აჯობა და "საქართველოს ვარსკვლავში" დარჩა. შოუში მონაწილეობას 8 კონკურსანტი აგრძელებს.

მარიამ კახელიშვილი დამარცხებით იმედგაცრუებულია. მომღერალს "ევროვიზიაზე" მონაწილეობის მისაღებად სურდა წასვლა, ის წლების წინ, 2010 წელს "საბავშვო ევროვიზიის" მონაწილეც გახლდათ:

"სიმართლე გითხრათ, საერთოდ არ ველოდი აუტსაიდერებში თუ მოვხვდებოდი და არც იმას, რომ კონკურსს დავტოვებდი. არც ვიცი, რა ვთქვა... მხოლოდ იმას ვიტყვი, რომ პროექტი ჩემი არ არის. მაყურებელი მიცნობს და იცის რეალურად ვინ ვარ. ვთვლი, რომ ეს იყო ჩემთვის ბოლო კონკურსი საქართველოში, რადგანაც მანამდეც ასე მიმაჩნდა, რომ აქ არც ერთ კონკურსში მივიღებდი მონაწილეობას.

ერთადერთი, რის გამოც "საქართველოს ვარსკვლავში" გადავწყვიტე მონაწილეობა, ეს "ევროვიზია" იყო და ამიტომ მინდოდა აქ ყოფნა. ახლა დავრწმუნდი იმაში, რომ პროექტი და კონკურსი ჩემი არ არის! არავის არაფერს ვუმტკიცებ, მართლა არ ვიცი, მეტი რა ვთქვა"...

ნინი ცნობილაძე:

- აუტსაიდერობას ყველანი ველოდით - ვინ არის აქ ისეთი, რომ ამას არ ელოდეს? მოკლედ, მეც მოვხვდი, მაგრამ მაყურებლის გადაწყვეტილებით, პროექტში დავრჩი. ახლა იმაზე უკეთესი უნდა შევთავაზოთ მაყურებელს, ვიდრე წარმოვადგინე. ვინც გვირეკავს, გვგულშემატკივრობს, ყველას მადლობას ვეუბნები თუნდაც თითოეული ზარისთვის. თუმცა, მათი მხარდაჭერა კიდევ გვჭირდება, მხარი უნდა დაგვიჭირონ, რომ გავაგრძელოთ კონკურსში მონაწილეობა. ეს არის პროექტი, ისეთი მონაწილეებით, რომელთაგან ვერც ერთს გამოარჩევ.

გული მწყდება, რომ მარიამი და ბესო პროექტიდან წავიდნენ, მაგრამ ეს არავის აგვცდება, "ევროვიზიაზე" მიდის მხოლოდ ერთი! ჟიურის შეფასებით კმაყოფილი ვარ, ყველაფერში ვეთანხმები. რაც შეეხება ფავორიტ კონკურსანტს, ყველა კარგია, ვერავის გამოვარჩევ. შეიძლება ჩემს გემოვნებაში ერთი ჯდება, სხვა - სხვისაში, მაგრამ მთავარია, რომ ყველანი მაგრები არიან. აქამდე თითოეულს ვიცნობდი, მაგრამ აქ მეტად დავმეგობრდით.

თიკო ბერძენიშვილი, ჟიურის წევრი:

"ძალიან ძლიერი კონკურსანტები გვყავს, მაგრამ გაკვირვებული ვარ იმით, რომ მარიამ კახელიშვილმა შოუ დატოვა. არ დავმალავ, ჩემი ერთ-ერთი ფავორიტი იყო. ვფიქრობ, რომ ასევე ერთ-ერთი საუკეთესო ვოკალური შესრულება ჰქონდა, რაც კი ჰქონია. მასაც ვუთხარი და აქაც გავიმეორებ, რომ ცოტა მეტი სითამამე და ამბიციურობა სჭირდება, რომელიც სხვა მომღერლებს სცენაზე უხვად აქვთ. მარიამის კონკურსს მიღმა დარჩენა იმაზე მიანიშნებს, რომ უფრო მეტი მაყურებელი უნდა ჩაერთოს, მეტმა ადამიანმა დაურეკოს კონკურსანტებს.

პასუხისმგებლობა უნდა იგრძნონ ჩვენმა მოქალაქეებმა, რომ ეს თამაში არ არის, ნამდვილი კონკურსია, სადაც სხვა არაფერია, გარდა გამარჯვებისა

ალბათ იშვიათია, როცა ერთ კონკურსში ოჯახის ორ წევრს მიუღია მონაწილეობა, ასეთი "საქართველოს ვარსკვლავი" აღმოჩნდა. მასში მუსიკოსი ძმები - ოთო და ბესო ნემსაძეები ერთად მონაწილეობენ, თუმცა ბესოს პირველსავე ლაივზე კონკურსის დატოვება მოუხდა, რასაც არც ის და მისი ძმა ოთო ელოდნენ. ლაივამდე აი, რას ამბობდა ოთო ნემსაძე:

- ოჯახიდან ორივე ვმონაწილეობთ, სახლში არ იციან, მხარი ვის დაუჭირონ და სრული საგიჟეთია, ასეთივე ხდება ჩვენს საერთო სამეგობროშიც. მოკლედ, დიდი გაუგებრობაა. მაგრამ ვიცი, რომ ბესოსთვის ამ პროექტში მონაწილეობა უკვე დიდი წარმატებაა, მუსიკალურად ძალიან უნდა გაიზარდოს, იმედი მაქვს, რომ ფინალამდე ერთად მივალთ. როგორც მე გამიხარდება "ევროვიზიაზე" გამგზავრება, ისე გამიხადება ბესოსი, იმიტომ, რომ კარგი ადამიანია და ასეთივე მუსიკოსი.

- მასში კონკურენტს ვერ ხედავ?

- ჩემი ძმა ჩემი კონკურენტი ვერასდროს იქნება! ისევე როგორც მე ვერ ვიქნები მისი კონკურენტი, ასეთი დედმამიშვილების არ მჯერა. ბესოს მომავალში როგორც საავტორო სიმღერის შემსრულებელს, ისე ვხედავ. ძალიან მაგარი სიმღერები აქვს. ვიცი მისი შესაძლებლობები კომპოზიტორული მიმართულებით. ძალიან ბევრი მისი სიმღერა მეც მიმღერია. მოკლედ, ვხედავ ბესოს გიტარით ხელში და თავისი სიმღერებით.

- საქმეში ცოტათი ხელს ხომ არ შეუშლის შენი ძმობა?

- არა, პირიქით, ყველაფერში მივეხმარები. აბსოლუტურად განსხვავებული ნემსაძე მოვიდა პროექტში. მაგრამ იმის თქმა, რომ ის ოთოს უნდა გავდეს, ნებისმიერი ადამიანისგან ძალიან საწყენია, ვთვლი, რომ ბესო ჩემით არ უნდა ფასდებოდეს. მე არ ვარ მუსიკის მეტრი, ჩემამდე ბევრნი იყვნენ და ჩემს მერეც ბევრნი იქნებიან. მუსიკა არის მუსიკა, ყველას თავისი გემოვნება და სტილი აქვს. ზუსტად ვიცი, ამ პროექტის შემდეგ ბესოს შეაფასებენ როგორც ბესო ნემსაძეს და არა როგორც ოთო ნემსაძის ძმას.