13-დღიანი სამაშველო ოპერაცია ესპანეთში ტრაგიკულად დასრულდა - 110 მეტრის სიღრმის ჭაში ჩავარდნილი ორი წლის ბიჭუნა, მაშველებმა გარდაცვლილი ამოიყვანეს.
ბიჭის სხეულს მაშველებმა 26 იანვარს, ხანგრძლივი ოპერაციის შემდეგ მიაკვლიეს. ხულენ როსელლო (Julen Rosello) ვიწრო ხვრელში 13 იანვარს ჩავარდა, როცა ესპანეთის სამხრეთით, ტოტალანში მშობლებთან ერთად პიკნიკზე იმყოფებოდა.
სამაშველო ოპერაციამ ორი კვირის განმავლობაში მსოფლიოს ყურადღება მიიპყრო, თუმცა 26 იანვარს, სამწუხარო ინფორმაცია გაავრცელა ადგილობრივი ხელისუფლების წარმომადგენელმა:
"ღამით 1:25 საათზე სამაშველო ჯგუფმა მიაღწია ადგილს, სადაც ბიჭი ეგულებოდათ და სამწუხაროდ, მისი უსიცოცხლო სხეული იპოვეს. ჩემი სამძიმარი ოჯახს" - ნათქვამია განცხადებაში.
ქვეყნის პრემიერ-მინისტრმა პედრო სანჩესმაც გააკეთა განცხადება: "მთელი ესპანეთი დამწუხრებულია და იზიარებს ხულენის ოჯახის მწუხარებას. ჩვენ ერთად ვადევნებდით თვალს, როგორ უახლოვდებოდნენ მაშველები მას. ყოველთვის დავაფასებთ იმ ადამიანების ძალისხმევას, რომლებიც თავდაუზოგავად ეძებდნენ ბიჭს ამ ხნის განმავლობაში".
სამაშველო ოპერაციაში 100 მაშველი და სამედიცინო პერსონალი მონაწილეობდა. ვიწრო ჭაში სამუშაოები მათ რობოტი-კამერის დახმარებით დაიწყეს, რადგან ხვრელში მოზრდილი ადამიანი ვერ ჩაეტეოდა.
როგორც ცნობილია, ბავშვი პიკნიკის დროს, საღამოს საათებში მშობლების თვალთახედვიდან გაქრა და ხვრელში ჩავარდა. ოპერაციის მიმდინარეობას მთელი ესპანეთი ადევნებდა თვალს, ადგილზე უამრავი ადამიანი მივიდა როსელლოების ოჯახის მხარდასაჭერად. 2017 წლის მაისში წყვილმა უფროსი შვილი, ოლივერი დაკარგა. ბავშვი გულის თანდაყოლილი დაავადების შედეგად გარდაიცვალა.
ოპერაციის დასრულებამდე რამდენიმე დღით ადრე, ბიჭის მამამ ხოსემ ჟურნალისტებს განუცხადა:
"მე და ჩემი მეუღლე მკვდრები ვართ. იმედს არ ვკარგავთ, რომ გვყავს ანგელოზი, რომელიც მას აქედან ამოგვაყვანინებს. ოლივერ, არ დაივიწყო შენი ძმა ხულენი. შენ იცი რამდენი ხანი ველოდით მას... ვიცი რომ მას იცავ, ჩემო პატარა მეფე".
იხილეთ ვიდეო: 2 წლის ბიჭი, რომელიც 100 მეტრის სიმაღლის ჭაში ჩავარდა, 13 დღის შემდეგ გარდაცვლილი ამოიყვანეს - ესპანეთის სამაშველო ოპერაციის გრაფიკული ვიდეო
