"ბევრი რამ დაგროვდა და გიორგი სამართლიანად გაბრაზდა..." - რატომ აგინა მთავრობას გიორგი ყიფშიძემ და რას ამბობს შვილზე ზურა ყიფშიძე

მსახიობ გიორგი ყიფშიძის სოციალურ ქსელში გაკეთებულმა განცხადებამ დიდი ვნებათაღელვა გამოიწვია. მსახიობმა "ოცნების" ხელისუფლებას ფეისბუქ-პოსტში აგინა და მათ დილეტანტები უწოდა.

"არაფერი საინტერესო არ ხდება, ხელფასს თავის დროზე არ გვაძლევენ და საერთოდ ამ მთავრობას მოვუ..ან დილეტანტი დედები. გულის ამრევები ესენი" - დაწერა ყიფშიძემ "ფეისბუქის" პირად გვერდზე.

მოგვიანებით მსახიობმა სტატუსი წაშალა, თუმცა საზოგადოებაში მაინც გაჩნდა გაურკვევლობა, განსაკუთრებით იმ ფონზე, რომ ზურა და გიორგი ყიფშიძეები სალომე ზურაბიშვილის მხარდამჭერი კლიპის მონაწილეები იყვნენ და აქტიურად უჭერდნენ მხარს "ქართული ოცნების" მხარდაჭერილ საპრეზიდენტო კანდიდატს.

ზურა ყიფშიძე სპორტის სასახლეში გამართულ მხარდამჭერ ღონისძიებაზე ემოციური სიტყვითაც გამოვიდა, სადაც განაცხადა, რომ სალომე ზურაბიშვილმა "ძალიან კარგად იცის იმ ადამიანების ბედი, გრძნობები, რომლებიც დიდი ხანია, საზღვარგარეთ სამშობლოს გარეშე ცხოვრობენ. ყველაფერი ესმის, ძალიან ბევრი უნდა დავინახოთ და უნდა დავაფასოთ... დიდი დამსახურებაა, რომ ისეთ მომენტებში, როცა უნდა ეთქვა თავისი სიტყვა, თქვა. არავისი არ მოერიდა, არის პირდაპირი, არაჩვეულებრივად განათლებული და ჭკვიანი ქალბატონი".

ვცადეთ გიორგი ყიფშიძესთან დაკავშირება, თუმცა მას ტელეფონი გამორთული აქვს. შემდეგ კი ზურა ყიფშიძეს დავუკავშირდით და დავინტერესდით, რა გახდა მისი ვაჟის განრისხების მიზეზი და ემთხვევა თუ არა მამის და შვილის პოზიციები ამ საკითხზე ერთმანეთს.

- ბატონო ზურა, თქვენ და გიორგი საპრეზიდენტო არჩევნების წინ მთავრობის აქტიური მხარდამჭერები იყავით... რამ გამოიწვია ახლა გიორგის ასეთი გაბრაზება მთავრობის მიმართ?

- არ ვიცი რა ხდება, ალბათ გიორგის უნდა მიმართოთ დეტალებზე სასაუბროდ... უამრავი პრობლემაა. ბინა გაგვიყიდეს, წართმეულია!

- ამჯერად სად ცხოვრობთ მთელი ოჯახი?

- ყველანი ჩემი ცოლის სახლში ვცხოვრობთ, ხილიანზე. როგორც მოგახსენეთ, ბევრი რამ დაგროვდა და გიორგის სამართლიანი გაბრაზება გამოიწვია. ხელფასები არ მოგვცეს ამ თვეში, გადააცილეს. რატომღაც ყოველ წელს ასე ხდება საახალწლოდ.

- თქვენც გაბრაზებული ხართ და გიორგის სიტყვებს იზიარებთ?

- არა ბატონო, რას ამბობთ! მე გავბრაზდი გიორგის სიტყვებზე! არ შეიძლება ასე საჯაროდ გამოხატო ყველაფერი! ამით შემდეგ ბნელი ძალის წარმომადგენლები სარგებლობენ...