შსს-მ ჭიდაობის ფედერაციის პრეზიდენტი გეგა გეგეშიძე დააკავა
შინაგან საქმეთა სამინისტრომ ჭიდაობის ფედერაციის პრეზიდენტი გეგა გეგეშიძე დააკავა. ამის შესახებ უწყების მიერ გავრცელებულ განცხადებაშია ნათქვამი.
"შინაგან საქმეთა სამინსიტრომ, საქართველოს ჭიდაობის ფედერაციის პრეზიდენტი თამაზ (გეგა) გეგეშიძე, სპორტის სასახლეში მომხდარ ფაქტთან დაკავშირებით, სისხლის სამართლის კოდექსის 126-ე მუხლის 1-ლი ნაწილით დააკავა, რაც ძალადობას გულისხმობს.
შინაგან საქმეთა სამინისტრომ, საქმის ფაქტობრივი გარემოებების დასადგენად აქტიური საგამოძიებო მოქმედებები ჩაატარა. ასევე, ინფორმაციის ნებაყოფლობით მოწოდებაზე უარის თქმის გამო, კონფლიქტის შემსწრე პირები დაიკითხნენ მაგისტრატ მოსამართლესთან. გამოძიებით დადგინდა, რომ მიმდინარე წლის 11 იანვარს, სპორტის სასახლეში მომხდარი დაპირისპირებისას, თამაზ გეგეშიძემ ფიზიკური შეურაცხყოფა მიაყენა სპორტსმენ ზურაბ დათუნაშვილს.
შინაგან საქმეთა სამინისტროში სპორტის სასახლეში მომხდარ ფაქტთან დაკავშირებით, გამოძიება საქართველოს სისხლის სამართლის კოდექსის 126-ე და 239-ე მუხლებით გრძელდება" - ნათქვამია განცხადებაში.
VIDEO: როგორ გამოჰყავთ დაკავებული გეგა გეგეშიძე პოლიციის შენობიდან - პირდაპირი კადრები
შეგახსენებთ, 11 იანვარს მომხდარი ინციდენტის შესახებ ინფორმაცია რამდენიმე დღის წინ მოჭიდავე ზურაბ დათუნაშვილმა "ფეისბუქით" გაავრცელა. მისი თქმით, გეგა გეგეშიძემ საქართველოს ჩემპიონატზე მას თავში რკინის ბლაგვი საგანი ჩაარტყა.