რაჯ კაპურის საქართველოში ვიზიტის აქამდე უცნობი კადრები - "კახეთში რთველში მოილხინა..."

ფილმი "ავარა" მხოლოდ ყოფილ სსრკ-ში 64 მილიონმა ადამიანმა ნახა და საბჭოთა კავშირის არსებობის მანძილზე ეკრანებზე გამოსულ უცხოურ ფილმებს შორის, გაყიდული ბილეთების რაოდენობით, მესამე ადგილზეა. ამავე წელს რაჯ კაპური ინდოელ კინემატოგრაფისტებთან ერთად საქართველოს ეწვია. მათ მოინახულეს ფუნიკულიორი, კინოსტუდია, რუსთაველის თეატრი... პროდიუსერი, კინომცოდნე, ინდოლოგი დავით ბეჟიტაშვილი Ambebi.ge-ს ექსკლუზიურად აწვდის ლეგენდარული რაჯ კაპურის უნიკალურ კადრებს და მის საქართველოს სიყვარულზე გვიამბობს...

- დეკემბერში ინდური კინოს ლეგენდას, ცნობილ მსახიობსა და რეჟისორს რაჯ კაპურს 94 წელი შეუსრულდებოდა. დღემდე ინდური კინო რაჯ კაპურის სახელთან ასოცირდება! სწორედ მისი ფილმებით "ავარა" და "ბატონი 420"-ით ინდური კინო მსოფლიომ გაიცნო. გასული საუკუნის 50-იან წლებში რაჯ კაპური ყოფილ საბჭოთა კავშირში არნახულად პოპულარული გახდა მას შემდეგ, რაც სამი წლის დაგვიანებით, 1954 წელს ეკრანებზე გამოვიდა მისი 1951 წელს გადაღებული ფილმი "ავარა"... ფილმი მხოლოდ ყოფილ სსრკ-ში 64 მილიონმა ადამიანმა ნახა და საბჭოთა კავშირის არსებობის მანძილზე ეკრანებზე გამოსულ უცხოურ ფილმებს შორის, გაყიდული ბილეთების რაოდენობით მესამე ადგილზეა. ამავე წელს რაჯ კაპური ინდოელ კინემატოგრაფისტებთან ერთად საქართველოს ეწვია. მათ მოინახულეს ფუნიკულიორი, კინოსტუდია, რუსთაველის თეატრი... იმყოფებოდნენ კახეთში რთველზე, სადაც კარგად მოილხინეს.

რაჯ კაპური რთველში კახეთში...

კინოსტუდიაში ისინი დაესწრნენ ქართული ფილმის "ისინი ჩამოვიდნენ მთიდან" გადაღებების პროცესს...… გადაღებების შემდეგ ლეილა აბაშიძეს შეხვდნენ, რუსთაველის თეატრში "ოტელოს" დაესწრენ და სპექტაკლის დამთავრებისას აკაკი ხორავამ მათ გულთბილი შეხვედრა მოუწყო. ლეგენდარული რაჯ კაპური მეუღლესთან ერთად, საქართველოს მეორედაც ეწვია, ეს მოხდა 1965 წელს, მოსკოვის საერთაშორისო კინოფესტივალის ფარგლებში.

რაჯ კაპური და მისი მეუღლე ფუნიკულიორზე

2017 წელს ჩემი მოწვევით, საქართველოში იმყოფებოდა მისი შვილი, ასევე პოპულარული ვარსკვლავი - რიში კაპური, რომელიც მაყურებელმა მამამისის ასევე ცნობილი ჰიტით - "ბობი" გაიცნო, რომელშიც ის მთავარ როლს ასრულებდა. მას იგივე მარშრუტი გავატარე, რომელიც 63 წლის წინ ლეგენდარულმა მამამისმა გაიარა. შემდეგ ფუნიკულიორზე გადავუღე ზუსტად ისეთივე ფოტო, რომელივ მამამისმა გადაიღო. 1962 წელს ინდოეთში გასტროლებზე იმყოფებოდნენ "სუხიშვილები"და მათ სწორედ რაჯ კაპურმა უმასპინძლა თავის სტუდიაში...

რაჯ კაპური და ანსამბლი სუხიშვილები

თენგიზ სუხიშვილი, რაჯ კაპური, ილიკო სუხიშვილი (უფროსი)