5
ივნისიდღის ზოგადი ასტროლოგიური პროგნოზი
სამშენებლო კომპანია „ელ ჯგუფის“ დირექტორის გრიგოლ ჭანტურიას და დიდ დიღომში დაზარალებული მოსახლეობის ადვოკატის ალექსანდრე კობაიძის განცხადებით, გამოძახებაზე მისულ „ყაზტრანსგაზის" თანამშრომლებს როდესაც უთხრეს, რომ ლიფტი მეცხრე სართულამდე ვერ ადის, მათ მეცხრე სართულზე ფეხით ასვლა და შემოწმება დაეზარათ. ამის შესახებ კობაიძემ ჟურნალისტებს პრესკონფერენციაზე განუცხადა.
„სამწუხაროდ, „ყაზტრანსგაზი" არ აპირებს საკუთარ თავზე აიღოს პასუხისმგებლობა და დაზარალებულები დააკმაყოფილოს. ჩვენ გადავწყვიტეთ, მათ წინააღმდეგ სარჩელი შევიტანოთ. გაჟღერდება ორი სასარჩელო მოთხოვნა - მატერიალური და მორალური კუთხით. სათითაოდ დავითვლით, რა მატერიალური ზიანი მიადგა. რაც შეეხება მორალურ ზიანს, აქ ალბათ, სადავო არაფერი იქნება. დაახლოებით 70 ოჯახს უშუალოდ შეეხო ეს ტრაგედია. ძალიან ბევრ ადამიანს შეერყა ჯანმრთელობა. სტრესის გამო ბავშვებს ძილი აღარ აქვთ. "ყაზტრანსგაზის" განცხადებებში მხოლოდ სამძიმარზეა საუბარი. მე მათ მოვუწოდებ, დაიწყონ ჩვენთან დიალოგი. წინააღმდეგ შემთხვევაში, ყველაფერი დღის სინათლეზე გავა. დაზარალებულების პროტესტი გამოწვეულია იმით, რომ კომპანია მათ არანაირ ყურადღებას არ აქცევს. მშენებელი კომპანია მშენებლობის პროცესში იძახებს "ყაზტრანსგაზს", რომელიც თავისი აღჭურვილობით მიდის და გაჰყავს ქსელი პროექტის მიხედვით - სად გავა მილი, სად იქნება მრიცხველი, შემდეგ ამაზე პასუხისმგებლობა "ყაზტრანსგაზს" აქვს აღებული. როდესაც მათ თანამშრომლებს უთხრეს, რომ ლიფტი მეცხრე სართულამდე ვერ ადის, მათ დაეზარათ მეცხრე სართულზე ასვლა და შემოწმება. ეს წმინდა წყლის გულგრილობაა", - განაცხადა ადვოკატმა.
ენერგოომბუდსმენის სალომე ვარდიაშვილის განცხადებით კი, თუ „ყაზტრანსგაზის" ორმა წარმომადგენელმა საფრთხის წყარო ვერ აღმოაჩინა, აქ შეიძლება საქმე ორ შემთხვევასთან გვქონდეს - ეს ან არაპროფესიონალიზმი და გამოუცდელობაა, ან საქმისადმი გულგრილი დამოკიდებულება. ამის შესახებ მან ჟურნალისტებს პრესკონფერენციაზე დიდ დიღომში მომხდარ აფეთქებასთან დაკავშირებით განუცხადა.
"ყაზტრანსგაზმა" ძალიან კარგი კამპანია ჩაატარა, როდესაც უფასოდ სთავაზობდნენ მოსახლეობას შიდა ქსელების შემოწმებას. თუმცა, რაც შეეხება კონკრეტულ შემთხვევას, ფაქტია, რომ იყო გამოძახება. მივიდა ორი პირი, თუმცა საფრთხე ვერ აღმოაჩინეს. მე მიჩნდება სუბიექტური აზრი, რომ საქმე გვაქვს ორ შემთხვევასთან. ეს არის - ან არაპროფესიონალიზმი და გამოუცდელობა, ან გულგრილი და ზერელე დამოკიდებულება საქმიანობის მიმართ. თუ პროფესიონალი მიდის ადგილზე და გაზის სუნს ვერ გრძნობს, თუმცა ხალხი ამბობს, რომ გრძნობს სუნს, ის ადამიანი ამოწმებს გარე პერიმეტრს და ეჭვი არ უჩნდება, რომ შიგნით რაღაც ხდება და არ აძლევს მოსახლეობას რეკომენდაციას, დატოვონ შენობა, გააღონ ყველა სახლი, თუ ვერ უკავშირდები ყველა სახლის მეპატონეს, მაშინ ავტომატურად უნდა გამორთო კორპუსში შემავალი გაზის ჩამკეტი. კორპუსში ელექტროენერგიაც უნდა გაითიშოს. მე მაქვს შეკითხვები "ყაზტრანსგაზის" წარმომადგენლობასთან და ველოდები მათგან ახსნა-განმარტებებს. ასევე დაველოდებით გამოძიების შედეგებს" ,- განაცხადა ენერგოომბუდსმენმა.
16 იანვარს, დიდ დიღომში, საცხოვრებელ კორპუსში მომხდარი აფეთქების შედეგად 4 ადამიანი გარდაიცვალა, აქედან ერთი მცირეწლოვანი ბავშვია. დაშავდა 8 ადამიანი, თუმცა, ისინი კლინიკებიდან უკვე გაწერეს და ამ დროისთვის იაშვილის საავადმყოფოში მხოლოდ ერთი ბავშვი განაგრძობს მკურნალობას.
