15
ივლისიდღის ზოგადი ასტროლოგიური პროგნოზი
"ბავშვების ტრავმამ რა თქმა უნდა დეფიციტი არ გამოიწვია, მაგრამ ქვეყანაში არის სისხლის კომპონენტების დეფიციტი!" - ამის შესახებ "ინტერპრესნიუსს" შპს "სისხლს ბანკის" დირექტორმა, დავით ლოლიაშვილმა განუცხადა.
მისი თქმით, განცხადება, რომ ქვეყანაში სისხლის კომპნენტების დეფიციტია, მომხდარ ტრაგედიამდე რამდენიმე დღით ადრეც გაკეთდა, რომელიც სხვადასხვა მედიასაშუალებით გავრცელდა.
"სისხლის ბანკის" დირექტორი ფიქრობს, რომ ჯანდაცვის მინისტრს არასწორი ინფორმაცია მიაწოდეს მათ განცხადებასთან დაკავშირებით, რომელიც შემდეგ უკვე მედიაში სხვადასხვა ინტერპრეტაციით გავრცელდა.
ლოლიაშვილი მზად არის დაინტერესებულ პირებს, ასევე მედიას წარუდგინოს კონკრეტული ციფრები, თუ რამდენი სისხლია გახარჯული და რა რაოდენობის სისხლის მარაგია ამ ეტაპისთვის.
"გადაამოწმეთ არქივი და ნახავთ, რომ რამდენიმე მედიასაშუალებაში ბოლო ერთი კვირის განმავლობაში ორჯერ გამოვაცხადეთ, რომ ქვყანაში არის სისხლის კომპონენტების დეფიციტი. მე ვერ ვიგებ ეს გაღიზიანება რამ გამოიწვია. ბავშვების ტრავმამ, რა თქმა უნდა, დეფიციტი არ შექმნა. ჩვენ გვქონდა სისხლის კომპონენტები, მივაწოდეთ ყველას, მაგრამ განვაცხადეთ, რომ შეიძლება შეიქმნას დეფიციტი. ეს უბრალოდ დაემთხვა იმას, რომ გუშინ მოხდა უბედური შემთხვევა. ხალხნო, ღმერთმა დაგვიფაროს, ისეთი ბინძურები ვიყოთ, რომ ვიღაცის გამო რაღაცას ვიყენებდეთ. ამას მოწმობს ის, რომ აღნიშნული ინფორმაცია გამოცხადებული გვქონდა მომხდარ ტრაგედიამდე რამდენიმე დღით ადრე და არაერთ მედიასაშულებაში", - განაცხადა დავით ლოლიაშვილმა.
ჯანდაცვის მინისტრის დავით სერგეენკოს განცხადებით, სისხლის ბანკი ცდილობს, რომ უბედური შემთხვევა საკუთარი მარკეტინგისთვის გამოიყენოს, მოიზიდოს უფასო დონორები და დაამზადოს პროდუქტი, რომელიც შემდგომ კომერციულად უნდა გაყიდოს. მინისტრის თქმით, გუშინ კლინიკებს რვა პაციენტმა მიმართა, მათგან ექვსმა - იაშვილის კლინიკას, რის შედეგადაც სისხლის მინიმალური რაოდენობა გაიხარჯა.
"საჯარო მოხელის კოდექსი არ მაძლევს უფლებას, შესაბამისი შეფასება გავაკეთო, მაგრამ როდესაც სისხლის ბანკი ცდილობს, რომ უბედური შემთხვევა საკუთარი მარკეტინგისთვის გამოიყენოს, მოიზიდოს უფასო დონორები და დაამზადოს პროდუქტი, რომელიც შემდგომ კომერციულად უნდა გაყიდოს, ამ ფაქტის შეფასებას საზოგადოებას შევთავაზებ, თან ეს იმ ფონზე ხდება, როდესაც ქვეყანაში გლოვის დღეა გამოცხადებული და უამრავმა ადამიანმა უანგაროდ შესთავაზა დახმარება ტრაგედიის შედეგად დაზარალებულებს.
ამ ბავშვების მკურნალობის პროცესში დაიხარჯა ერთი ერთეული სისხლის პროდუქტი, რაც ძალიან ცოტაა, ამაზე ნაკლები მოცულობა უბრალოდ არ არსებობს. მარაგი, რა თქმა უნდა, შეფერხების გარეშე მიეწოდა კლინიკას. მას თავისი რესურსიც აქვს. ერთი ერთეული ყოველთვის არის", - აღნიშნა დავით სერგეენკომ.
