"ქართველებმა ტრაგედიის დროს მხარდაჭერა იციან..." - როგორ ეხმაურებიან რუსი ინტერნეტმომხმარებლები თბილისში მომხდარ აფეთქებას

16 იანვარს თბილისში მომხდარ აფეთქებას დიდი გამოხმაურება მოჰყვა პოსტსაბჭოთა სივრცეში. რუსული მედიის ცნობით, ქართული საზოგადოება შეძრა ფოტომ, სადაც მამაკაცს ხელში უჭირავს ბავშვი და მის გულისცემას უსმენს.

"სოციალურ ქსელში სრული შოკი გამოიწვია გუშინდელმა ფაქტმა, რომელიც თბილისში, დიდ დიღომში მოხდა. ფოტოკადრმა, სადაც დანგრეულ ბინაში მამაკაცს ხვეულთმიანი, თითქმის უსიცოცხლო ბავშვი უჭირავს და მისი პულსის მოსმენას ცდილობს, საზოგადოება შეძრა... ერთი ოჯახიდან გარდაიცვალა 4 წლის ბავშვი და დედა...

ადგილობრივი მოსახლეობის თქმით, მათ მთელი დღის განმალობაში გაზის სუნი სცემდათ და თანამშრომლები გამოიძახეს, თუმცა, მათ პრობლემას ვერ მიაკვლიეს... ცოტა ხანში ძლიერი აფეთქება მოხდა, რასაც 4 ადამიანის, მათ შორის 4 წლის ბავშვის სიცოცხლე შეეწირა", - წერს Вести.Ru.

მომხდარ ტრაგედიას რუსები სოციალურ ქსელშიც ეხმაურებიან. მათი თქმით, საბჭოთა კავშირიდან თითქმის მეოთხედი საუკუნის გასვლის შემდეგ, ყველა ქვეყანას, ვინც ამ სივრცეში ცხოვრობდა, დღემდე ერთნაირი პრობლემები აწუხებს: არაპროფესიონალიზმი, გულგრილობა და კანონის მიმართ დაუდევრობა. რამდენიმე დღის წინ მსგავსი ფაქტი რუსეთშიც მოხდა - 14 იანვარს, როსტოვის ოლქის ქალაქ შახტიში ცხრასართულიან სახლში სავარაუდოდ გაზის აფეთქების შედეგად, ბოლო ორი სართული ჩამოინგრა. მაშველებმა 2 ადამიანის ცხედარი იპოვეს.

"ვუსამძიმრებ ქართველ ხალხს! ქართველი მეგობრები მყავს და გაოცებული ვიყავი მათი სოლიდარობით - აფეთქების შედეგად დაზარალებული საცხოვრებელი კორპუსის ბინადრებს ყველა თავისებურად ეხმარებოდა და ჰპირდებოდა მხარდაჭერას... რამდენი ტრაგედია მოხდა ჩვენთან, სავაჭრო ცენტრის დაწვის შედეგად ბავშვებიც დაიხოცნენ, მაგრამ საზოგადოებრივი სოლიდარობა არ მახსენდება, არადა, ამ დროს რამდენს ნიშნავს ეს..." - წერს ინტერნეტმომხმარებელი მაქსიმ პეტერბურგსკი.

"ქართველებმა ტრაგედიის დროს მხარდაჭერა იციან, ეს კავკასიელი ხალხის თვისებაა, თუმცა, საქართველო საინტერესოა იმითაც, რომ კავკასიური ქვეყანაა ევროპული და აზიური ღირებულებებით... რუსეთშიც არ გვაკლია აფეთქებები, მაგრამ ჩვენთან ასეთ საკითხებს სახელმწიფო აგვარებს და რამდენად კარგად, ეს უკვე სხვა საკითხია..." - წერს ინტერნეტმომხმარებელი ოლგა კრავეცი.

"შემძრა ბავშვის ფოტომ... მთელი რუსეთი ნაღმზე ზის, დღემდე კომუნისტების დროს აშენებული ბინებია, იმ წლებში დამონტაჟებული გაყვანილობებით... ახალი მშენებლობები, თუ "დაკრიშულია", არ კონტროლდება. არადა, ვიცით, რომ რუსეთში "დაკრიშული" ბიზნესი ხარობს... პარალელისთვის - როგორც რუსეთში, ასევე საქართველოშიც, სავარაუდოდ, დაბალ ფენაზე გადატყდება ჯოხი. ვერ დავაღწიეთ თავი საბჭოთა შტრიხებს..." - წერს ინტერნეტმომხმარებელი ილია გუდიევი.

"რამდენი წელი გავიდა საბჭოთა კავშირის დაშლის შემდეგ? საქართველო, შეიძლება ითქვას, განვითარების ხარისხით ყველაზე წინ არის სამხრეთ კავკასიაში, მაგრამ რაც უნდა ცინიკური იყოს, ყველა სახელმწიფოს, რომელიც ამ კავშირში იყო გაერთიანებული, დღემდე თითქმის ერთი და იგივე პრობლემები აქვს - კორუფცია, არაპროფესიონალიზმი, საქმისადმი გულგრილი დამოკიდებულება... ეს არის სენი, რომელიც საბჭოთა კავშირმა თაობებს დაუტოვა და თანდათან ვიხდით, სისხლითა და მსხვერპლით..." - მიაჩნია ინტერნეტმომხმარებელ ვლად აბრამოვს.