აფეთქების დროს გარდაცვლილი ოთხი ადამიანიდან ორი კორპუსში სტუმრად იმყოფებოდა

დიდ დიღომში მომხდარი აფეთქების დროს გარდაცვლილი 4 ადამიანიდან ორი კორპუსის მცხოვრები არ იყო. გუშინ საღამოს, აფეთქების მომენტში ნინო ციცვიძე დასთან ნათია ციცვიძესთან იყო სტუმრად. აფეთქებამ დები და ნათიას 4 წლის შვილი იმსხვერპლა.

კიდევ ერთი გარდაცვლილი 30 წლის მამაკაცია. ლევან დავლაძე კორპუსში ასევე სტუმრად იმყოფებოდა. როგორც "კვირის პალიტრა" წერს, ბინის პატრონი ეზოში იყო, ლევანი კი მის ბინაში დარჩენილი გასაღების ასაღებად ავიდა, კარის გაღების დროს კი ძლიერი აფეთქება მოხდა, დავლაძე წნევამ მეექვსე სართულიდან ძირს გადმოაგდო და შემთხვევის ადგილზე მისულ მაშველებს ის უკვე გარდაცვლილი დახვდათ.

დიდ დიღომში გუშინ მომხდარი აფეთქების შედეგად 4 ადამიანი გარდაიცვალა - ნათია და ნინო ციცვიძეები, ნათია ციცვიძის 4 წლის შვილი და ლევან დავლაძე. დაშავდა რამდენიმე ადამიანი, მათ შორის ბავშვები. დაზიანებულია საცხოვრებელი კორპუსი.