რას ჰყვება ბავშვის მამა, რომლის ფოტომ "ფეისბუქი" შეძრა - გოგონას ძმა და დედა გარდაეცვალა

დიდ დიღომში აფეთქების შედეგად დაშავებული მცირეწლოვანი გოგონა, რომლის ფოტომ სრულიად "ფეისბუქი" შეძრა, ცოცხალია, თუმცა მისი მდგომარეობა მძიმეა, ასევე მძიმე მდგომარეობაშია მისი დაც. ამის შესახებ Ambebi.ge-ს იაშვილის კლინიკის პრესსამსახურში განუცხადეს, სადაც დაშავებული დები, ფირალიშვილები არიან მოთავსებული. ხოლო ბავშვების ძმა ცოტა ხნის წინ "იმედის" კლინიკაში გარდაიცვალა.

როგორც Ambebi.ge-მ გაარკვია, აფეთქება სწორედ ფირალიშვილების ოჯახში მოხდა. გარდაცვლილებს შორის ბავშვების დედაც არის.

"სახლში ახალი მისული ვიყავი, აფეთქების ხმა გავიგე, ბავშვების ხროტინის ხმა მესმოდა, ჩემი ხელით გამოვიყვანე ჩემი შვილები" - აცხადებს ბავშვების მამა მინდია ფირალიშვილი Ambebi.ge-სთან საუბრისას.

მისი თქმით, აფეთქების დროს მათთან ოჯახში სტუმრად მისი მეუღლის დაც იმყოფებოდა, რომლის მდგომარეობა ამ დროისთვის მძიმეა.

ნახეთ ვიდეო: ბავშვს პოვნის მომენტში გული არ უმუშავებდა, თუმცა მედიკოსებმა მისი გადარჩენა მოახერხეს

ფირალიშვილების მეზობლის ირინა ბაძგარაძის თქმით, გაზის მძაფრი სუნი კორპუსში მთელი დღის განმავლობაში იგრძნობოდა.

"დღის განმავლობაში მოსული იყვნენ "ყაზტრანსგაზის" წარმომადგენლები, დაათვალიერეს და წავიდნენ. სხვა არანაირი ზომები მიუღიათ. იმდენად ძლიერი აფეთქების ხმა იყო, ვერ აღგიწერთ" - განაცხადა ბაძგარაძემ.

დიდ დიღომში, ავთანდილის ქუჩაზე მდებარე საცხოვრებელ კორპუსში სავარაუდოდ, ბუნებრივი აირის გაჟონვის შედეგად აფეთქება მოხდა. აფეთქება ახალაშენებული კორპუსის მეექვსე სართულზე მოხდა. დაზიანებულია კიდევ რამდენიმე სართული, მათ შორის პირველი სართული. ჩანგრეულია ლიფტი.

თინათინ ზვიადაძე

თეა ხურცილავა

მთავარი ფოტო: გიორგი ჟამერაშვილი