როგორ თაღლითობენ მძღოლები ტექდათვალიერების გავლის მიზნით
საქართველოში სავალდებულო ტექდათვალიერება უკვე ერთი წელია მოქმედებს. 2019 წლის პირველი იანვრიდან ტექდათვალიერების მეოთხე ეტაპი დაიწყო, რომელიც ყველა სახის ავტოტრანსპორტს შეეხება. თუმცა, იმის ნაცვლად, რომ ავტოტრანსპორტის მფლობელებმა კეთილსინდისიერად გაიარონ ტექნიკური შემოწმება, მათ იმ გზებისა და ე.წ შავი ხვრელების ძიება დაიწყეს, რაც ტექდათვალიერების გავლას გაუმარტივებთ.
სად არის ეს ე.წ შავი ხვრელები და რა ხრიკებს მიმართავენ ავტომობილების მფლობელები ყველაზე ხშირად? - ამ კითხვით ტექინსპექტირების ორგანოების ასოციაციის ხელმძღვანელს ვაჟა იორდანაშვილს მივმართეთ.
მისი თქმით, როდესაც საუბარია ე.წ შავ ხვრელებზე, რომლებსაც მძღოლებმა მიაგნეს, რამდენიმე მიმართულება უნდა გაიმიჯნოს: რადგან თუ ავტომობილს დაზიანებული აქვს საქარე მინა ან სამუხრუჭე სისტემა, ამ შემთხვევაში წარმოუდგენელია რაიმეს "თხოვება" და შეცვლა, თუმცა ამის გაკეთება მარტივად შეიძლება საბურავების შემთხვევაში. ვაჟა იორდანაშვილის თქმით, პრაქტიკაშიც კი არსებობს ისეთი შემთხვევები, როდესაც მძღოლები დროებით ნათხოვრობენ საბურავებს, რათა ტექდათვალიერება გაიარონ და შემდეგ საბურავებს უკან აბრუნებენ.
რაც შეეხება იმას, როგორ ცდილობენ მძღოლები გამონაბოლქვის დამალვას ტექინსპექტირების მიმდინარეობისას, იორდანიშვილის თქმით, ამ დრომდე კატალიზატორების თხოვების შემთხვევა არ დაფიქსირებულა, რადგან კატალიზატორი 2019 წელს ტექდათვალიერების მოთხოვნებში არ შედის. თუმცა, მისი თქმით იმის გამო, რომ კატალიზატორის მონტაჟი და შემდეგ დემონტაჟი საკმაოდ რთულია, სავარაუდოდ მძღოლები ამ ხრიკის გამოყენებას ვერ მოახერხებენ.
ტექინსპექტირების ორგანოების ასოციაციის ხელმძღვანელის თქმით, დიზელის ძრავიანი ავტომობილის ზოგიერთმა მფლობელმა ასეთ ხრიკს მიმართა: ჭვარტლიანობაზე ანუ შავ კვამლზე შემოწმების დროს, ისინი გარკვეულ ქიმიურ მინარევებს ამატებენ, რომელიც გარკვეული დროით კვამლის გამოყოფის დონეს ამცირებს და შესაბამისად, თუ სპეციალურმა მოწყობილობამ კვამლი ვერ დააფიქსირა, მანქანა ინსპექტირებას უპრობლემოდ გაივლის. როგორც ცნობილია, ამ ხერხს მძღოლები ხშირად მიმართავენ.
კიდევ ერთი საკითხია მარჯვენასაჭიანი ავტომობილების მაშუქი სისტემა. როგორც ცნობილია მარჯვენასაჭიანი ავტომობილების ფარების დახრა მარცხნივ არის მიმართული. შესაბამისად, მოძრაობის დროს საფრთხეს უქმნის შემხვედრ ავტომობილს. შესაბამისად, მარჯვენასაჭიანი ტიპის სატრანსპორტო საშუალებების მქონე მძღოლებს მოუწევთ ფარების გამოცვლა ან სპეციალური სტიკერების გამოყენებით ფარების განათების კუთხის შეცვლა.
"თუ მთლიან მაშუქ ხელსაწყოს მოხსნიან, სხვას დაამონტაჟებენ და ისე მივლენ ინსპექტირებაზე, ცხადია ინსპექტირებას ავტომობილი გაივლის, თუ რა თქმა უნდა აკმაყოფილებს ნათების კუთხით. თუმცა, აქ არ მგონია ხრიკებს მიმართავდნენ, რადგან ბევრად მარტივია ნათების კუთხის შეზღუდვა სტიკერის მეშვეობით, რაც დღეს დასაშვებია. დღეს აკრავენ სტიკერებს რომ შეიზღუდოს საპირისპირო მიმართულებით ნათება, რომელიც შემხვედრ ზოლში მოძრავი ავტომობილის მძღოლის ხილვადობას ზღუდავს.
სტიკერის დაკვრა ევროპაშიც აპრობირებული მეთოდია. თუმცა, საქართველოში მძღოლები ამ სტიკერებს სამწუხაროდ, მხოლოდ ინსპექტირებისთვის იყენებენ და შემდეგ როდესაც გამოდიან გზებზე, აძრობენ ამ სტიკერს. რა თქმა უნდა, ეს სამოქალაქო პასუხისმგებლობის მომენტია" - განმარტა ვაჟა იორდანიშვილმა.
დარღვევები აღმოჩნდა ტექნიკური ინსპექტირების ცენტრებშიც. უფრო კონკრეტულად, 2018 წელს ფინანსურმა პოლიციამ ტექინსპექტირების 10 ცენტრში ყალბი ანგარიშების გაცემის ფაქტები გამოავლინა. ეკონომიკის სამინისტროს ინფორმაციით, ამჟამად ყველა ცენტრი აღჭურვილია ვიდეოკამერებით, რომელიც იწერს ინსპექტირების მთელ პროცესს, ჩანაწერი კი 14 თვის განმავლობაში ინახება.
შსს ინფორმაციით, 14 იანვრიდან ავტომატურ რეჟიმში დაჯარიმდება ის ავტომობილები, რომლებსაც კანონის შესაბამისად არ გაუვლიათ პერიოდული ტექნიკური ინსპექტირება. გარდა ამისა, ვაჟა იორდანიშვილის ინფორმაციით ტექნიკურ რეგლამენტში ცვლილება მზადდება, რომლის შედეგადაც, მანქანების გამონაბოლქვის მონიტორინგი გზებზევე მოხდება და შავი, თვალხილული გამონაბოლქვის გამოყოფის შემთხვევაში, ავტომობილის მფლობელი დაჯარიმდება.
2019 წლის 14 იანვრის ჩათვლით, ტექნიკური ინსპექტირება გაიარა 21 276 ავტოსატრანსპორტო საშუალებამ, საიდანაც გამართულად ჩაითვალა 11 666 ერთეული. ტექნიკური ინსპექტირებისას დახარვეზდა 9 613 ავტომანქანა, ხოლო განმეორებით დახარვეზდა - 189. გზაზე გადაადგილება აეკრძალა - 75 ავტოსატრანსპორტო საშუალებას.
"საქართველოში უკვე შემოვიდა 25 ათასი დოზა გრიპის საწინააღმდეგო ფრანგული ვაქცინა" - ამირან გამყრელიძე განმარტავს, ვინ ისარგებლებს პირველ ეტაპზე
საქართველოში კორონავირუსისგან კიდევ ერთი, 92-ე პაციენტი გარდაიცვალა
