12
ივნისიდღის ზოგადი ასტროლოგიური პროგნოზი
"ჩემი ცოლის დაქალებში" მეთოთხმეტე სეზონი სადაცაა დასრულდება, ბოლო სერიებში მდგომარეობა ძალიან დაიძაბა. ამის გამო, მაყურებელი გააქტიურდა და სერიებს დიდი ინტერესით ადევნებს თვალ-ყურს. მათ, ვისაც შეწყვეტილი ჰქონდათ სერიალის ყურება, განაახლეს და "დაქალებს" სრულიად ახალი მაყურებელიც შემოუერთდა - ადამიანები ერთი ჩვეულებრივი წყვილის ოჯახური მდგომარეობით დაინტერესდნენ. დიახ, დღეს რატომღაც ყველას უნდა გაიგოს, როგორ განვითარდება მოვლენები მანგაძეების ოჯახში ზაზას ცოლის, ქეთის ღალატის შემდგომ. სერიალში კი სრულიად მოულოდნელად, ამ ამბავს ერთი ეპიზოდური პერსონაჟი დაუკავშირდა და ეს ქეთის დედამთილი ნაირაა. ის შემთხვევით საყვარელთან რძლის სატელეფონო საუბარს შეესწრო და სწორედ მან აიღო საკუთარ თავზე მთელი ტკივილიც. AMBEBI.GE ამ როლის შემსრულებელს, მსახობ ეკა მჟავანაძეს ესაუბრა, რომელიც ამავე დროს სერიალის კასტინგმენეჯერიცაა.
- სულ მინდოდა, მეგრელი ქალის როლი მეთამაშა, მაგრამ ეს არ მოხდა. ამის სურვილი ჯერ კიდევ მაშინ მქონდა და მაშინ შევედი სერიალში, როცა მეგრელების ხაზი ჯერ არც იყო დაწყებული და ნაირას როლს სხვა მსახიობი თამაშობდა. მისი შეცვლა მომიხდა. იმ პერიოდში ვინ იფიქრებდა, რომ ეს სერიალი 14-15 სეზონს "გაქაჩავდა". ჩემი როლი სერიალში ეპიზოდური, მეორე-მესამეხარისხოვანი იყო, ასეთ როლებს გამავალს ვეძახით, როცა პერსონაჟი მთავარ გმირებს სიუჟეტში რაღაც ამბავში ეხმარება. ასე ვიყავით მე და ჩემი პარტნიორი, მსახიობი ალეკო მახარობლიშვილი, სეზონში სულ ერთი-ორ სერიაში რამდენიმე გამავალი რეპლიკით შემოვიფარგლებოდით, იმიტომ, რომ ამბავი ცოლ-ქმარს შორის, ქეთისა და ზაზას შორის ვითარდებოდა და არა ჩვენ შორის. რადგან ერთად ვცხოვრობდით, ეს კონტაქტი აუცილებელი იყო. მერე, როდესაც ამბავი დაიძაბა, ვიფიქრე, ალბათ ჩვენც გამოვჩნდებოდით-მეთქი. თუმცა ამას ვერ წარმოვიდგენდი, თუ სცენარისტი ამ ღალატის ამბის გახსნას მაინცდამაინც ჩემს პერსონაჟს დააკისრებდა. კონკრეტულ სიტუაციაში ყველაფერი მისი გადასაწყვეტი და "მოსაგვარებელი" აღმოჩნდა.
- როდესაც უკვე გაიგეთ, რა იფიქრეთ?
- ორი კვირის წინ ჩემი ასისტენტი მეუბნებოდა, - ახალი სერიის სცენებს თუ გაეცანი, სცენარი შენთვის არის დაწერილიო. არ წამიკითხავს-მეთქი, - ვუთხარი. ახალი წლის წინა დღეები იყო და ამისთვის ვერ მოვიცალე, მერე მეორე ასისტენტმაც მითხრა. საბოლოოდ როცა წავიკითხე, თუ რა და როგორ უნდა მეთამაშა, იმაზე რამდენიმე დღე ვფიქრობდი, ანუ როგორ მომესმინა ცუდი ამბავი...
- ემოციური სცენის ემოციურად თამაში მოგიხდათ...
- 2 დუბლი ჩავწერე, იყო იმპროვიზაციაც... ველოდი, რომ ამ სერიას გამოხმაურება ექნებოდა, რადგანაც მანამდე ქუჩაში ხალხი მხვდებოდა და მეკითხებოდნენ - "თქვენ ოჯახში მოვლენები როგორ განვითარდება, ვინმე ხომ არ კვდებაო?" მოკლედ, ველოდი ხალხის გამოხმაურებას, მაგრამ ასეთ არაფერს, რაც ახლა მოხდა და ხდება... მსახიობისთვის ეს ყველაფერია... როლები თეატრში, სერიალშიც მითამაშია, ვიღაცას მოსწონებია, ვიღაცას - არა. მქონდა წარმატებაც და წარუმატებლობაც. ის, რაც ახლა ხდება, ვიმეორებ, საოცრებაა, - ასე ხალხის სიყვარულით განებივრებული არ ვყოფილვარ. ამ ყველაფერში კი სოციალურმა ქსელმაც დამარწმუნა, როდესაც გუშინ გავიღვიძე, "ფეისბუქი" გავხსენი და სითბოს, სიყვარულის ტალღა დაიძრა...
- ალბათ ესაა უკვე აღიარება...
- კი, მარტო ნიჭი არაფერს ნიშნავს, ხალხს უნდა უყვარდე. თუკი ჩემ მიმართ ვიღაცას სიმპათია აქვს, ამისთვის ყველას დიდი მადლობა. მადლობა ყველას, ვინც გამომეხმაურა, შემაქო, ვინც ერთი-ორი სიტყვა შემაწია... ჩვენი სერიალის "ოჯახური ამბით" დაინტერესდა.
- ზოგადად ოჯახში ცოლის მიერ ღალატზე რას იტყვით?
- ორი ბიჭის დედა ვარ, მართალია, ჯერ დედამთილი არ ვარ, მაგრამ წყვილის ცხოვრებაში და მით უფრო, რძლის ცხოვრებაში დედამთილის ჩარევა ჩემთვის მიუღებელია. ყოველთვის ნეიტრალური უნდა იყო. როცა ოჯახი იქნება, იქ არა მარტო დედამთილის, სიდედრის, მამამთილის, მშობლის და ყველა ზედმეტი ადამიანის ჩარევა დაუშვებელია. ამ კონკრეტულ სიტუაციაში ზედმეტი ჩარევა ხდება... გასაგებია, რომ ღალატი ცუდი რამაა, მაგრამ ტყუილი კიდევ უარესი. რაც გინდა, ქენი, ოღონდ, არ მოიტყუო და არც სხვა აცხოვრო სიცრუეში. ეს არის მთავარი, თორემ ყველას თავის ცხოვრება აქვს. შეიძლება 3-ჯერ და მეტჯერ გათხოვდე, გყავდეს მეგობარი, ამაზე არ არის, ამის სრული უფლება გაქვს, მაგრამ ტყუილში ნუ აცხოვრებ ნურავის.
- რას ამართლებთ დედამთილ ნაირას ქცევაში?
- ეუბნება - წადიო და ამით სიმართლეს ამბობს, რადგან ვერ აიტანა, რომ მის შვილს ცოლმა მოატყუა, სიყალბეში ამყოფა. ხომ ვამბობ, ტყუილის კატეგორიული წინააღმდეგი ვარ, რაც გინდა, მითხარი, - სიმართლეს ავიტან გავიგებ, მივიღებ, ოღოდ, ნუ მომატყუებ!
- გიორგი ბოჭორიშვილთან და სალომე შარვაძესთან პარტნიორობა როგორია?
- არაჩვეულებრი ახალგაზრდები არიან, კარგად აკეთებენ თავის საქმეს და წარმატებულები არიან, მეტ წარმატებას და წინსვლას ვუსურვებ, ყველაფერი წინ აქვთ...
- გარდა იმისა, რომ სერიალში ახლა მოვლენები თქვენს პერსონაჟს დაუკავშირდა, საერთოდ ამ პროექტში უდიდესი როლი გაქვთ, კასტინგმენეჯერი ხართ, მსახიობების შერჩევა და მოძებნა თქვენი პრეროგატივაა. სად და როგორ ახერხებთ ამდენი ადამიანის შეკრებას, თავმოყრას?
- ბევრი კარგი მსახიობი გვყავს. თავიდან, როდესაც სერიალს ვიწყებდით, არ იყო რთული მათი არჩევა და როლისა და პერსონაჟის მიხედვით შერჩევა, მაგრამ ვახერხებდი. ახლა ცოტა სიხალვათეა, თუმცა პატარა ეპიზოდშიც კი, მაინც არ ვიმეორებთ ერთსა და იმავე მსახიობს, რადგანაც თუ ვთქვათ, დღეს თუ პურის გამყიდველს თამაშობს, ხვალ ექიმის შესარულება რომ მოუხდეს, უხერხულია. ამ სეზონში ახალი პრინციპი შევიმუშავეთ, საყოველთაო ქასთინგი გვქონდა, საიდანაც ვარჩევ ადამიანებს, ტექსტებზე, პატარ-პატარა ეპიზოდებზე ვამეცადინებ, ელემენტარულ მსახიობის ოსტატობას ვასწავლი, ვუმოწმებ მეტყველებას და მერე უკვე რეჟისორები წყვეტენ, რომელი მიიღებს მონაწილებას. ახლაც კი, მიუხედავად იმისა, რომ მსახიობები ჭირს, ვიღაცები შემონახული მაინც მყავს "მუთაქაში", რომელზეც გადამღები ჯგუფი სულ მეუბნება - გამოაძვრინე და გამოაჩინეო... მოკლედ, მიხარია, რომ სერიალს, რომელსაც ენერგიას არ ვაკლებთ, მეთოთხმეტე სეზონზეც კი ამდენი მაყურებელი ჰყავს და ისევე აქტუალური და ცოცხალია.
