ველისციხეში მომხდარ ინციდენტში მონაწილე კიდევ ერთი პირი სასამართლომ პატიმრობაში დატოვა

გურჯაანის რაიონულმა სასამართლომ 16 დეკემბერს ველისციხეში მომხდარ ინციდენტში მონაწილე თენგიზ ჯანიაშვილი აღკვეთის ღონისძიების სახით პატიმრობაში დატოვა. მას ბრალდება "ნაციონალური მოძრაობის" აქტივისტის, შოთა დალაქიშვილის ცემაში თანამონაწილეობას ედავება.

დაკავებულს ბრალი სხეულის განზრახ ნაკლებად მძიმე დაზიანების მუხლით წაუყენეს, თუმცა ის ბრალს არ აღიარებს. ჯანიაშვილის ადვოკატის ინფორმაციით, მისი დაცვის ქვეშ მყოფი დუმილის უფლებას იყენებს.

ბრალის დამტკიცების შემთხვევაში დანაშაული 3-დან 5-წლამდე ვადით თავისუფლების აღკვეთას ითვალისწინებს. ველისციხესთან მომხდარი ინციდენტის დროს დალაქიშვილის ცემისთვის სხვა ორი პირიც არის დაკავებული.