ბიზნესიდან ციხეში და პირიქით - როგორია რამდენიმეწლიანი სამართლებრივი დევნის შემდეგ გამართლებული ანზორ ქოქოლაძის ბიზნესპერსონა

ბიზნესმენ ანზორ ქოქოლაძეზე, პროკურატურის შუამდგომლობის საფუძველზე, სისხლის სამართლებრივი დევნა შეწყდა და ის გამართლდა.

საუბარია, 2011 წელს ბიზნესმენისთვის წარდგენილ ბრალდებაზე, რომლითაც გამოძიება მას თაღლითობას და უკანონო შემოსავლების ლეგალიზებას ედავებოდა. თუმცა, პროკურატურის ცნობით, მტკიცებულებების ერთობლიობა ვერ უზრუნველყოფდა გონივრულ ეჭვს მიღმა სტანდარტს, რომლითაც შესაძლებელი იყო გამამტყუნებელი განაჩენის დადგომა. შეგახსენებთ, რომ „ნაციონალური მოძრაობის“ ხელისუფლებაში ყოფნის პერიოდში „ტექნო ბუმისა“ და „ელიტ ელექტრონიქსის“ დამფუძნებელი ანზორ ქოქოლაძე დააკავეს და საპატიმროში 2 წლამდე გაატარა.

გათავისუფლებულმა ბიზნესმენმა ციხეში ყოფნის პერიოდზე, მის საქმეზე და საკუთარ ბიზნეს ისტორიაზე 2016 წელს „პალიტრანიუსის“ ეთერში გადაცემაში „ბიზნესპერსონა ისაუბრა“.

„ბიზნესპრესნიუსი“ გთავაზობთ ამონარიდს ამ ინტერვიუდან:

- ბევრისთვის ალბათ აღმოჩენა იქნება ის, რომ თქვენი პირველი ნაბიჯები ბიზნესში სულ რაღაც 20 დოლარით დაიწყო. რა იყო ეს პირველი მცდელობა?

- ჩემი ისტორია არაფრით განსხვავდება წარმატებული თუ ნახევრად წარმატებული სხვა ადამიანის ისტორიისგან. ალბათ ყველა ასე იწყებს, თუ მემკვიდრეობით არ ერგო ან ლატარიაში არ მოიგო. მე არც გაჭირვებულ, არც მდიდარ ოჯახში გავზრდილვარ. საშუალო დონის ოჯახში გავიზარდე, ყოველ შემთხვევაში არსებობის პრობლემა არ გვქონია, თუმცა არც ზედმეტი გვქონდა. მამა ადრე გარდამეცვალა, ამიტომ იძულებული ვიყავი პასუხისმგებლობა საკუთარ თავზე ამეღო. 5 დედმამიშვილი ვიყავით, სამი და მყავდა, მე უფროსი ბიჭი ვიყავი, აქედან მოდიოდა პასუხისმგელობის გრძნობა: 9 წლის უკვე უფროსი კაცი ვიყავი. შუალედური პერიოდი არ მქონია. 9 წლიდან, შინაგანად, უცბად გავხდი 20 წლის. სკოლის დროს ბიზნესის მიმართ ბუნებრივი განწყობა მქონდა. თუმცა ტერმინები - მარკეტინგი, მენეჯმენტი არ ვიცოდი.

- რა საქმე დაიწყეთ 20 დოლარით?

- ჩამოვაყალიბეთ პატარა ფირმა. ჯიხური გავაკეთეთ, სადაც სავალუტო ოპერაციები იყო, მერე კასეტების გაყიდვები დავიწყეთ. სხვადასხვა მცდელობები იყო. ეს 20 დოლარი ფირმის რეგისტრაციისთვის გვჭირდებოდა. დანარჩენი, ბევრი არ იყო საჭირო.

- როგორ აღმოჩნდით ბიზნესიდან ციხეში? წაიკითხეთ სრულად