რა მისწერა მუამარ კადაფის შვილმა ვლადიმერ პუტინს - "ბლუმბერგი" საიდუმლო გზავნილზე

ლიბიის ყოფილი ლიდერის, მუამარ კადაფის შვილი საიფ ალ-ისლამ კადაფი პოლიტიკური მხარდაჭერისთვის რუსეთის პრეზიდენტს მიმართავს. ამის შესახებ გამოცემა „ბლუმბერგი“ წერს.

სააგენტოს წყაროს ინფორმაციით, საიფ ალ-ისლამ კადაფი დეკემბრის პირველ რიცხვებში რუსეთის საგარეო საქმეთა სამინისტროს თანამშრომლებს და შუა აღმოსავლეთსა და აფრიკაში პუტინის სპეციალურ წარმომადგენელს მიხაილ ბოგდანოვს შეხვდა. მათი საშუალებით პუტინს გაუგზავნა წერილი, სადაც აღნიშნავს, რომ სურს, ლიბიის ლიდერი გახდეს და კრემლს მხარდაჭერას სთხოვს.

გამოცემის ინფორმაციით, ჯერ კიდევ ცოტა ხნის წინ ყველა მიიჩნევდა, რომ კრემლი ხელს უწყობდა ლიბიის ეროვნული არმიის ფელდმარშალს ხალიფა ჰაფთარს, რომელსაც, კადაფის შვილის მსგავსად, პრეზიდენტობა სურს. ჰაფთარი მოსკოვში რამდენჯერმე ჩავიდა. "ბლუმბერგი" წერს, რომ კრემლს არ მიუღია გადაწყვეტილება, ვის დაუჭერს მხარს.

სააგენტო აღნიშნავს, რომ ახლა რუსეთს აქვს შანსი, რეგიონში საკუთარი პოზიციები გაამყაროს. ეს კრემლს საშუალებას მისცემს ხელი მოაწეროს ნავთობის რამდენიმე მილიარდი დოლარის ღირებულების კონტრაქტებს, ასევე - ააშენოს ახალი სამხედრო ბაზა ხმელთაშუა ზღვასთან.

გაერო გეგმავს, 2019 წელს ლიბიაში საპრეზიდენტო და საპარლამენტო არჩევნები ჩაატაროს, რათა ქვეყანა „ჩიხიდან გამოვიდეს“. „ბლუმბერგი“ აღნიშნავს, რომ კადაფს პრეზიდენტობისთვის ბრძოლის შანსი აქვს, იმის მიუხედავად, რომ მასზე საერთაშორისო სისხლის სამართლის ძებნაა გამოცხადებული. მას კაცობრიობის წინაშე ჩადენილ დანაშაულებებში დებენ ბრალს.

საიფ ალ-ისლამის მამა, მუამარ კადაფი ლიბიის ხელისუფლებაში 1969 წელს მოვიდა, როდესაც მისი ხელმძღვანელობით ქვეყანაში მეფე იდრის პირველის მონარქია დაამხეს. კადაფი ქვეყნის მმართველად მომდევნო 42 წლის განმავლობაში დარჩა. ის 2011 წელს გადააყენეს, ამბოხებულებმა კადაფი ჯერ მძევლად აიყვანეს, შემდეგ კი მოკლეს.